¹ Yesu aitangea nakina bhobuka naabhu na matsaatsa, aibuka: ² Bhokumu ma dhiko bhoyaani na Kumu waako lipati dha libhala akpuli ya palanga waande. ³ Ailinda bhasali bhande bhakabhea bhagendja a lipati; kasi yebhale bhodhoa. ⁴ Ailinda bhasali bhadii, aibuka naabhu: Bukani na bhagendja bhabei mbi a lipati: Nikalei lipati; niowi ngombe na tito djambi dja miita, nikoi kpaa, dhoani a lipati . ⁵ Yebhaapeyee naamu, bhaikee odii a eyanga, odii a mombongo mande; ⁶ bhadii bhaidunga bhasali, bhaibadopo mombomo pe bhabhaawa. ⁷ Kumu aikendjoo makasi; ailinda mbulunga bhande, bhaiyowa bhayowedhi bhaa, pe bhaiyongodja ngando yaabhu. ⁸ Lingongo aibukana bhasali bhande: Ngando kpaa djingemi akpuli ya lipati; Kasi bhagendja bhabhei mbi bhalongeaniti. ⁹ Keeni a ndjilapanda, bheani bhagebdja bhasusu bhaatana ino hoo. ¹⁰ Bhasali bhaikee, bhailokoo bhagendja bhasusu bhaatana ibho a mokenge, bhabhehu na bhapele, eise eiluma. ¹¹ Kumu aingia bhoo asele bhabho bhaadhoo, aiyene mogendja omoti waawaati esindje ya lipati. ¹² Aibuka naande: Bala, aingei aabho ndenge nde ye bhoo owaa esindje a lipati? Yeagbale. ¹³ Kumu aibuka na mabho, modhumbani tiambo a modhidhi, hoo yaadhaa mabhiye pe bhasaka miinyo. ¹⁴ Bhanene bhadhi bhabheake, bhahonoke bhotsedhu. ¹⁵ Bhafalisayo bhaikee londo bho bhanukane bhokopo bho teedjeneke ibho Yesu nabuka djande. ¹⁶ Bhaimolindia bhayekoli bhabhu na bhagendja bha Erode bhabuke naande: Molakisi,edjei bho okabuke oko menemene, pe okaningidje bhagendja ndjia ya Akongo na sembo, ye na bhoo, bhoo toasele mbanda dja bhagendja. ¹⁷ Edjeedja maleeni ma we: Efute pako ya Kaisala too teefute? ¹⁸ Kasi aidjea maleeni mabhehu mabhu, aiyanoa: Okaisiaini bhikumu aye? ¹⁹ Ningidjaini embemba akafute ino naayu pako. Bhaimoningidja denalio emoti. ²⁰ Aibhahedjoo: Mbanda pe midhilo ma nda mibho? ²¹ Bhaihulidja: Ma Kaisala.Yesu aibuka naabhu: Nyeani Kaisala dja Kaisala, pe nyeani Akongo dja nde. ²² Bhaokaka buka dja, bhaikamwa mingi, bhaimoyee pe bhainyoo bhabhu. ²³ Oko bhusa bhua, bhasadukeyo, bhabho bhakabuke bho lisekwa dhiti, bhaidhoa pambe ya Yesu, pe bhaimohedjoo. ²⁴ Molakisi, Moize aabuka: Mogendja omoti magwaa pe abhotiti, maanyango aose wadhi waande, amobhotee ngbongi. ²⁵ Nzokande, yaadhaa pambe yaasu bhana bhami sambo. Oobho wa libhoso aiyoso,pe aigwaa; yaabhotati iyo, aiyeyee manyie waande wadhi. ²⁶ Moikomeene okobhoa na oobho wa mibhale, wa misato, tee wa sambo. ²⁷ Lingongo dha bhu bhasusu, wadhi pe aigwaa. ²⁸ Bhusa bha lisekwa, aadhaa wadhi wa nda? Bhoo ibho bhasusu bhaamooso. ²⁹ Yesu aibhahulidja: Okeni a libhunga, akpuli bho odjeitini Midhilo, odjeitini pe ngudhu ya Akongo. ³⁰ Lingongo dha lisekwa, dhosi dhitadhaa dhea,kasi bhaadhaa ndje bha anzelu bha Akongo liko. ³¹ Akpuli ya lisekwa, olangitini buka dja Akongo oyo yaabuka iyo naanu: ³² Nike Akongo wa Abalama, wa Izaka, pe wa Yakobo? Ye Akongo wa bhago, kasi bha mou. ³³ Mongindi bhooka buka djia, moikamwa mingi na mateya ma Yesu. ³⁴ Bhafalisayo bhaokaka bho Yesu aadhipa bhasadukeyo monoko, bhaikee londo, ³⁵ omoti naabhu, motei wa mibheko, aimohedjoo, bho amoisee ekumu: ³⁶ Molakisi, mobheko nde mobii na bhonene a buku ya mibheko? ³⁷ Yesu aihulidja: Waapala Kumu Akongo wa we na molema ma we mosusu, na agbonda wa we mosusu, pe na maleeni mawe masusu. ³⁸ Mobheko ma libhoso mobii monene mua. ³⁹ M mibhale moiyaana naamu mubho: Waapala aminawe ndje ekaapale we meene. ⁴⁰ Ngando susu djike a buku ya mobheko pea bhitumba bha bhasakoli djidjongi a mibheko mia mibhale. ⁴¹ Yaukia bhafalisayo siyo emoti, Yesu aibhahedjoo, ⁴² Akpuli yaanu Klistu adhi nda? Adhi waana wa nda? Bhaiyanoa: Wa Davidi. ⁴³ Yesu aibuka naabhu: Moengeni bho Davidi, Elimo amolindaka, aimobhea Kumu, poko yaabuka iyo: ⁴⁴ Kumu Akongo aibuka na Kumu wambi: Dhaa a ebho ya mbi ya libhaami, tee yaakwedje bhanguna bha we tina ya mako ma we? ⁴⁵ Davidi amamobhea Kumu, aadhaa waana waande na bhokopo nde? ⁴⁶ Ye bhamogbalee. Oko bhusa bhua, bhaamohedjoo kati dhea mokando.