¹ Yaatita Yesu a mokodhi, mongindi monene moimodjua. ² Seleke, mogendja wa mabala aiyadinda aigbueme midhi liboso dha nde, pe aibuka: Kumu, omapala, opetoleni. ³ Yesu aidjamba ebho, aimopoto, pe aibuka: Nipali, petolama. Oko na poko ena, mapala mande maisia. ⁴ Lingongo dha ina, Yesu aibuka naande: Abhanea bhotelee mokando mubho; kasi kaaningidje pambe ya mobhudhi wa Akongo, pe nyea likabho dhiayee Moize, bhoo mokando mwa modha elembo akpuli yaabhu. ⁵ Yaingiaka Yesu a Kafarnaum, Kumu monene wa mbulunga wa baloma aiyadinda padhi naandee, ⁶ aiyatato naande pe aibuka: Kumu, mosali wa mbi asamike a eise, atikasomba pe ekamopeka mingi. ⁷ Yesu aibuka naande: Niake, pe niamoheledja. ⁸ Kumu wa mbulunga aihulidja: Kumu, nibhongiti bhoo oingee pambe ya mbi; kasi buka oko egendja emoti, pe mosali wa mbi aahela. ⁹ Bhoo, mbi oobho okadjue makumu mambi, nike na mbulunga bakadjueni; pe nikabuka na omoti: Kee! pe akee; na odii: Dhoa! pe adhoo; pe na mosali wa mbi: Koo bho! pe amokoo. ¹⁰ Amadjaka bhmooka, Yesu aigwa bhokamusa, pe aibuka bhabo bhaa modjuaka: Nikaadjeedjani menemene, nako a Isalayele nataniti bhondima bhonene ndje bhubho. ¹¹ Nzokande, nikaadjeedjani bho bhanene bhaadjongaibhi saa dhiko na saa tina, pe bhaadhaaibhi a mesa siyo emoti na Abalama, Izaka na Yakobo, a bhokumu bha dhiko. ¹² kasi bhaadhumbaibhi ngbongi bha bhokumu a modhidhi ma tiambo, oho yaadhaaibhi mabhie pe bhoaka miinyo. ¹³ Lingongo Yesu aibuka na Kumu wa mbulunga: Kee, mokomeene na we bhodjuana na bhondima bha we. Oko na poko ena mosali aihela. ¹⁴ Yesu aidhakee pambe ya Petelo, aitana bhokio bhande wa wadhi asami, duka amokooko. ¹⁵ Aipoto ebho yaande, pe duka aimosia; adjawaka, aimolomea. ¹⁶ Na mokoo, bhaimowayea Yesu bhagendja bhanene bha bhilimo bhibhehu. Aibhengana bhilimo na buka yaande, pe aiheledja bhagendja bhasusu bha bhipeko, ¹⁷ bhoo mokando moabuka mosakoli Izaya mongemene: Aitomba bhobhehu bhasu, pe aiwaa bhipeko bhasu. ¹⁸ Bhoene mongindi monene bhomohika, Yesu aibuka bho bhoeke sena edii. ¹⁹ Adhiledhi wa bhitumba omoti aiyadinda padhi naande, pe aibuka naande: Molakisi, niadjua pamba susu djiakee we. ²⁰ Yesu aimohulidja: Gambala bhadhi na tutu, pe mbudhu bha dhiko bhaadi na meebhu; kasi Waana moto atike na siyo eisake iyo molo mande. ²¹ Odii, omoti wa bhabho bhakadjue, aibuka naande: Kumu, yee mee mbi nikee bhokawusia yaa. ²² Kasi Yesu aimohulidja: Djuani, pe yee bhagendja bhabho bhawusee bhibembe bhabhu. ²³ Aikonda a bwato, pe bhayekoli bhande bhaimodjua. ²⁴ Na mbala emoti, mopepe monene moikoo dhiko dha dhua na bhokopo bho bwato bhoiluma na bhisokpongbo. Pe iyo, aheeke. ²⁵ Bhayekoli bhaadindaka padhi naande, bhaimosusudja, pe bhaibuka: Kumu, eheledja, yaagwa! ²⁶ Aibuka naabhu: Aye eke ino na bhoo, bhagendja bha bhondima bha bhotsedhu? Adjawaka, aipamea mipepe pe dhua, pe kimya enene eingia. ²⁷ Bhagendja bhaa bhaikamwa mingi pe bhaibuka: Nda oobho, mipepe na dhua djiimotosa? ²⁸ Atobhaka sena edii ya dhua, a ngando ya bhagadeleni, bhagendja bhabale bha bhilimo bhibhehu, bhaipundja a kunda, bhaidhataana naande. Bhaaadhaaka na kandja bhobiya, mogendja nako omoti aanyookoti na ndjia ena. ²⁹ Pe seleke, bhaitangea bhopama: Bhotuunde naasu, Waana wa Akongo? Odhoi aabho bho oetungise libhoso dha poko? ³⁰ Litungu dhinene dha ngulu dhianyooko bhohadhi naabhu. ³¹ Bhadjabulu bhaiyatata na Yesu, bhabukaka: Omoebhengana, elinda a litungu dhia dha ngulu. ³² Aibuka naabhu: Keeni! Bhaipundja, pe bhaingia a ngulu. Pe seleke, litungu dhisusu dhiitita modjulua a dhua, pe bhaigwaa. ³³ Bhakengeli bhaitia, pe bhaikee a gbata bhokatangusa mokando ndje yaakomeene imo pe mudho moatobhea bhagendja bha bhilimo bhibhehu. ³⁴ Gbata esusu eipundja bhodhataana na Yesu; bhamoeneke, bhaiyongo naande bho apundje a ngando yaabhu.