¹ Molimo mwawa Yesu pe moikee naande a ngbengee, bho mondili amoengee. ² Lingongo dha bhohee ndjaa masu tuku djinei pe bhulu tuku djinei, ndjaa eimokoo. ³ Mondili, aidinda padhi pe aibuka naande: Omadhaa Waana wa Akongo, buka na mabanga maabho maahombee mapa. ⁴ Yesu aimohulindja: Bhaadhila bho: Mogendja teahele oko na ebhuke, kasi na buka kpaa ekadlonga pamba ya Akongo. ⁵ Mondili aimowaa a gbata esatu, aimobhakea liko dha tepelo, ⁶ pe aibuka naande: Omadhaa Waana wa Akongo, alimia a ndheba; bhoo bhaadhila: Aalindia bhaanzelu bhande; pe bhaawa a mabho, bho tootsakaa ekumu. ⁷ Yesu aibuka naande: Bhaadhila pe: Okokiti bhoengee Kumu, Akongo wawe. ⁸ Mondili aidhamowaa koto liko dha mokodhi ma bhodongaa, aimoningidja makumu masusu ma mongali na heku dja ina, ⁹ aibuka naande: Nianyea looma dhibho dhisusu, omagbueme midhi pe onyeeini heku. ¹⁰ Yesu aibuka naande: Djawa, Satana! Akpuli bho bhaadhila: Waanyea heku na Kumu, Akongo wawe, pe waamolomea oko iyo mbuki. ¹¹ Na haa mondili aimonyee. Pe seleke, baanzelu bhaidhoa padhi na Yesu, pe bhamolomeaka. ¹² Yesu aokaka bho bhamodunga Yoane, aisua a Galileya. ¹³ Aidjowo a Nazarete, aikee bhokadhaa a Kafarnaume, padhi na dhua enene, a ndebha dja Zabilo na Neftali, ¹⁴ bhoo mokando moatelee profeta Izaya mongemene: ¹⁵ Litungu dha Zabilo na Neftali, dha ndebha padhi na dhua enene, dha ngando saa dhiko dha Yordani, dha Galileya wa Bapagano. ¹⁶ Litungu dhiadhaaka tei ya modhidhi, dhieni bhohoyee bhonene; pe bhabho bhadhaaka a siyo pe modhidhi ma yogo Bohoyee bhonene bhoidhusua. Oko na poko ena Yesu aibanda bhoteya, pe abukaka: Hombedjani milema, akpuli bho bhokumu bha dhiko bhotobhi padhi. ¹⁸ Oko yaadhaaka aasomba padhi na dhua enene ya Galileya, aiyene bhaana bha linyango babale, Simoni, akabhee ibho Petelo, na Andele maanyango, bhaadhumba (bhaakooa) nduka, akpuli bho bhaadhaaka bagbuta. ¹⁹ Aibuka naabhu: Djuaini, pe niatobhedjani bagbuta bha bhagendja. ²⁰ Oko na poko ena, bhaiyee nduka djabhu, bhaimodjua. ²¹ Aadindaka maa bhohadhi, aiyene bhaana bhaadii bha linyango bhabale, Yakobo, waana wa Zebedeyo, na Yoane, maanyango, bhaabhongebdje nduka djabhu a bwato siyo emoti na Zebedeyo, sangwa'bhu. Aibhabheya, ²² pe oko na poko ena, bhaiyee bwato na sangwa'bhu, bhaimodjua. ²³ Yesu aasomba Galileya mobimba, bhokaatee a bhasinagoga, bhokaatelee mboli epele ya bokumu, bhokaaheledje bhipeko pe bhiemee bhisusu atei ma matungu. ²⁴ Poko yaande eisomba a Siria bhokpa, pe bhamodhoyaka bhagendja bha bhipeko bhopoko na bhokopo, bhangedja bha bhaamembo, bhibhosono; pe abhaheledjaka. ²⁵ mongindi kpongidho moimodjua, bhodjawa Galileya, Dekapole, Yeruzaleme, yudea, pe bhobiya Yordane.