¹ Aeneke mongindi, Yesu aikonda a mokodhi; pe adhaaka, bayekoli bhande bhaiyandinda padhi naande. ² Lingongo dhaina, aidhupua monoko, aitangea bhobhalakisa, pe aibuka: ³ Mosepi ma bhagendja bha molema modjangake, akpuli bho bhokumu bha dhiko bhoke akpuli yaabhu! ⁴ Mosepi ma bhagendja bha bipeko, akpuli bho bhaabhagbutidja milema ⁵ Mosepi ma bhagendja bha iwa, akpuli bho bhaakondja ndebha! ⁶ Mosepi ma bhagendja bhake na ndjaa pe ekalala ya menemene, akpuli bho bhaagola! ⁷ Mosepi ma bhagendja bha milema ma iwa, akpulia bhobhaabhaokea iwa! ⁸ Mosepi ma bhagendja bha molema bhoongoo, akpuli bho bhayene Akongo! ⁹ Mosepi ma bhagendja bhakanyee bhogoo, akpuli bho bhaabhabhea bhaana bha Akongo! ¹⁰ Mosepi ma bhabho bhakanyokole ibho akpuli ya menemene, akpuli bho bhokumu bha dhiko bhoke akpuli yaabhu! ¹¹ Mosepi manu, poko yaakuta ibho mbomo, yaayowa ibho pe yaabhukia ibho malowa ma ndenge susu akpuli ya mbi. ¹² Asepani pe dhaani na mosepi motutu, akpuli bho lifuti dhanu dhiadha linene a dhombe; yaanyokolo ibho bhaprofeta bhabho bhaadhoa liboso dhanu oko bhoa. ¹³ Okeni mokwa ma ndebha. Mokwa momasi monyamu maina, bhaamohulidja na ye? Yaadhikaa dhako bhamodhumbe tiambo, pe bhamobudhaake na mako. ¹⁴ Okeni bhohoyee bha mongali. Gbata ekadhaa dhiko dha mokodhi teyaabombe; ¹⁵ tebhayoodje bhopoko bho bhabhoise tina ya ebhoka, kasi bhakabhobhakee dhiko dha edhika, pe bhoyene djeke eise esusu. ¹⁶ Yeenibhohoyee bhanu bhoenene a miiso ma bhagendja, akpuli bho bhaene misala manu mipele, pe bhahekedje Sangwa'nu wa dhiko. ¹⁷ Toingeni bho nidhoi bhodhaawa mobeko too bhaprofeta; nidhoiti bhodhaawa, kasi bhodhangemedje. ¹⁸ Bhoo, nikaadjeedjani menemene, oko dhiko na ndebha djinyookini, nako maa eyoma ya bhotsedhu too maa ndjia emoti ya letele etadjawa, a mobeko, tee mokando muwa mosusu motobhe. ¹⁹ Oobho waadjodje mobeko momoti tei ya mibho ma maabhodjelele, pe aaningidja bhagendja bhokoo bhoa, bhaamobheya mogendja wa maabhotsedhu a bhokumu bha dhiko; kasi oobho waamibhanea pe waaningidja bhadii bhomibhanea, bhaamobheya mogendja monene a bhokumu bha dhiko. ²⁰ Bhoo, nikaadjedjani, bosembo bhanu bhobiiti bha bhakomedhi na bhitumba pe bha bhafalisayo, otaingianibhi a bhokumu bha dhiko. ²¹ Waaokani bhaibuka na bhasuku: Otaowa; obho waowa adhisa etumbu. ²² Kasi mbi, nibuki naanu bho oobho okaisee maanyango gbeku bhamosambedja; oobho akaene maanyango ndje edangadingi bhaamosambedja a likanda; pe oobho okabuke naande: Ligboma! ebhongi naande bhoaongoo a moosa ma dhifelo. ²³ Omakee na likabho dhawe a lotale, pe omatima bho maangwa ake na mokando na we, ²⁴ yee likambo dhawe haa liboso dha lotale, kee mee okabhongedje ino na mangwa; lingongo nga okanyea likabo dhawe. ²⁵ Longea bhogala ino na monguna wawe oko edhi ino andjia, bhoo teadhumbe pamba ya zuzi, bhoo zuzi teadhumbe pamba ya akesedhi na ngbanga, bhoo tebhaingidje a boloko. ²⁶ Nikaadjeedja menemene, otapundja hoo oko omadjakini bhofuta likuta dha maa bhotsedhu. ²⁷ Waokani bhaibuka: Otapala wadhi wa aminawe. ²⁸ kasi mbi, nibuki naanu bho oobho okasele wadhi ma miiso mabhehu amopali tei ya molema ²⁹ Liiso dha we dha moomi dhimaalinda a ndjia ebhehu, dhidhongoo pe dhidhumba bhohadhi na we; bhoo ebii bhopele bho ekenge ya we ya mokuku emoti edjawo, bhoo mokuku mawe mombimba tebhamodhumbe a lifelo. ³⁰ Pe ebho ya we ya dhibhaami emalinda a ndjia ebhehu, ekese pe edhumba, ekese pe edhumba bhohadhi na we; bhoo ebii bhopele bho ekenge ekenge ya we ya mokuku emoti edjawa, bhoo mokuku mawe mobimba temokee a lifelo. ³¹ Bhaabhuka: Oobho okakie wadhi waande amonyee etumba ya bhoowa moki. ³² Kasi mbi, nibuki naanu bho oobho akakie wadhi waande, edhaiti oko akpulia bhondumba, akamolinda a ekobo, pe oobho okaose wadhi waakia ibho a moki, akakoo ekobo. ³³ Waokani pe bho bhaabuka na bhataata: Otangana bholapa bha we, kasi waangemedje mubho mwalapa we pamba ya Kumu. ³⁴ Kasi mbi, nibuki naanu bho tolapeni, ye nako na dhombe, akpuli bho eke ngbende ya Akongo; ³⁵ Ye na ndebha, bhoo eke adjunu wa mako mande; ye na Yeruzaleme, bhoo eke gbata ya Kumu monene. ³⁶ Tolape pe na molo ma we, akpuli bho okokiti bhohombedja mosee ma we momoti motobhe mohindo too bhopee. ³⁷ Buka yaanu edha bhoa akpulia bhoa, kati akpulia kati; mokabhakee ibho madjongi pamba ya mokosi. ³⁸ Waokani bhaibuka: liiso akpulia liiso, liinyo akpulia liinyo. ³⁹ Kasimbi, nibuki nanu toemyeneni na mokosi. Bhamaalaa mbata a likeke dha moomi, molambea pe dhibho bhidii. ⁴⁰ Bhamakoo bho bhasambe na we bhoo bhaakatoo simisi wawe, moyeyee pe mokoti ma we. ⁴¹ Mogendja omoti amaadunga na makasi bho okoo mako koto emoti, koo ino nande mako koto djibale. ⁴² bhamaayonga nyea, tonganee pe oobho okanukana bhoamba pamba ya we. ⁴³ Waokani bhaibuka: Waapala amina nawe, pe waalona monguna wa we. ⁴⁴ Kasi mbi, nibuki: Palani bhanguna bhanu, pamboani bhabho bhakaabeleni, kooni bhopele na bhabho bhakaaloneni, pe abhelani akpulia bhabho bhakaaanyokoleni pe bhaayowakani, ⁴⁵ bhoo odhaani bhana bha Sangwanu oke dhiko; akpuli bho akakpandjedje liiso dha bhusa dhande dhiko dha bhagendja bha kandja na bhapele, pe ayoodjeke koma dhiko dha bhagendja bha alima na bhabho bhati na alima. ⁴⁶ Omapalani oko bhabho bhakaapaleni, waadhisani lifuti nde? bhafutidji bha pako tebhakoo bhoa? ⁴⁷ Omanyeani oko bhamaangwanu agbaya, mokando nde nga mokakoo inoma susuma? bhapagano pe tebhakoo bhoa? ⁴⁸ Dhaani bhayengebene ndje Sangwanu wa dhiko edhi iyo moyengebene.