¹ Na poko ena Yoane Mobatisi audhusidje, akeeke bhokasakole a ngbengee ya Yudea. ² Abukaka: Hombedjani milema, akpuli bho bhokumu bha dhiko bhotobhi padhi. ³ Yoane ake oobho waatelee profeta, Isaya, poko yaabukaka iyo: Aabho eke dhoi dha mogendja oobho okakpoloa a ngbengee: Bhongedjeni ndjia ya Kumu, djulidjani mikodhi mande. ⁴ Yoane aawaka esindje ya ngungi dja tito, pe mokabha ma eyopo ya tito a bhongo bhande. Aakaka bhapepe pe ndjoi ya mokonda. ⁵ Matungu ma Yeruzaleme, ma Yudea pe ma ngando esusu padhi na Yordani maakeeke pampa yaande; ⁶ pe, bhamatubela masusu mabhu, bhadhisaka libatisa a mabho mande a Yordane. ⁷ Kasi, bhaene bho bafarizeo banene na basadukeo bakadhoa bhodhisa libatisa dhande, aibuka naabhu: Matungu ma mabhate, nda ooningidjini botia gbeku ekadhoa? ⁸ Ifani embuma ebhongi na bhohombedja molema, ⁹ pe tobukeni ino bheene: Eke na sango wasu Abalama! Bhoo nikaadjeedjani bho akongo abhongi bomonyea Abalama bhaana na ndjia ya mabanga maabho. ¹⁰ Mokwele monene moemai a ndjedhi dja mele: baakwele mole mosusu temobote mbuma pele pe baamodhumba a mosa. ¹¹ Mbi nibatisani na dhua, bhoo ohombedjeni milema; kasi oobho okadhoa lingongo dhambi abii mbi na ngudhu, pe nitike na bhokopo bhodhupuake ndiki dja bhikoto bhande. Iyo, aabatisani na Molimo Mosatu pe na moosa. ¹² Ake na lungu yaande a mabho; aaomboo egbingi yaande, pe aaukia milona mande a edhika, kasi aaongodja ndjani a moosa tema dhimee ¹³ Yesu aidjawa a Galileya aikee a Yordani pamba ya Yoane bho amobatise. ¹⁴ Kasi Yoane bhopala bhoa te aibuka: Mbi nga oke na posa bho obatiseni, we koto okadhoa pamba ya mbi! ¹⁵ Yesu aimohulidja: Yee modhaa bhoa ndjebhondjebho, bhoo ebhongi bho mokando kpaa moke menemene mokomeene. Yoane aamoemea ti dhea. ¹⁶ Yesu amadjaka bhodhisa libatisi, aipundja a dhua. Pe seleke, dhoombe dhiadhupua, pe aiyene Molimo ma Akongo moatita ndje edhua bhodhoa pamba yaande. ¹⁷ Pe seleke, dhoi djidjonga dhiko dhiibuka: Oobho ake Waanambi okapale mbi, niisi lipalano dhambi dhisusu pamba yaande.