¹ Yesu ndje ebotami iyo a Beteleme wa Yudea, poko ya Kumu Erode, eneke bhaaseedhi na ndjotso baidhoa a Yerusaleme bodjonga saa (pamba ekapundje dhiiso dha bhusa), ² pe baibuka: Kumu wa bayuda odjongi ibho bhobhota ake saase? eyeni mondjotso ma nde saa Dhiko, mainanga edhoi iso bhodhamogbueme midhi. ³ Kumu Erode bhooka bhoa, mayele maimobudjoana, pe Yerusaleme mosusu naande siyo emoti. ⁴ Aitaedjana banganga-Nzambe bhaneebhanee basusu pe bhadhei bhitumba, bho bamodjeedje siyo nde yaabotama Klistu. ⁵ Baibuka naa nde: a Beteleme wa Yudea; bhoo profeta aadhila bho: ⁶ Pe we, Beteleme, ndebha dja Yuda, otike maa mbendjo tei ya gbata dja Yuda, akpuli bho Kumu oobho waakamba Isalaele, litungu dha mbi aadjonga (aaimwa) pamba ya we. ⁷ Oko haa Erode aibhea bhaaseedhi na ndjotso, pe aibhahedjo poko nde yaabanda boenedje mondjotso. ⁸ Lingongo dhaina aibalinda a Beteleme, aibuka naabhu: Keeni,hedjoni ngando susu djiseli waana ona; omamodhisani, dhoani odjeedjeni, bho mbi pe nikee bokamogbueme midhi. ⁹ Bomadjaka booka Kumu, baikee. Seleke, mondjotso mwaene ibho saa Dhiko moasomba liboso dha bhu pe moikaemaa dhiko dha siyo yaadhaka waana. ¹⁰ baeneke mondjotso, baiyasepa menemene. ¹¹ Baingia a eise, baiyene waana na nyango Malia, baisusuma pe baimogbueme midhi; lingongo dha ina baidhupua miina ma bhu, pe baimobonzela wolo, paka pe mila. ¹² Nakina, baeneke a ndjotsi bho bhaekumbe dhea pamba ya Erode, baihana a ngando yaabhu na ndjia edii. ¹³ yaakee idho, seleke anzelu wa Kumu aiayenedje na Yozefu a ndjotsi, aibuka naande: Djowo (Angoo), tomba waana na nyango, tia a Ezipeti, pe dhaa hoo tee poko yaabukia mbi; bhoo Erode akanukana wana bho amowoo. ¹⁴ Yozefu adjowoko, aitomba waana na nyango, pe bulubulu aikee a Ezipeti. ¹⁵ Aidhaa hoo tee yogo ya Erode, bhoo mokando mwadjeedja Kumu na ndjia ya profeta mokomeene: Niabhea waana mbi tiambo ya Ezipeti. ¹⁶ Erode, aaneke bho bhaaseedhi na ndjotso bhaamokosa, aitobha na gbeku menemene, pe ailinda bho bhaawe baana basusu bha bhiyanga bhibhale pe tina ya bhiyanga bhibhale bhabho bhaadhaaka a Beteleme pe a bokumu bhande basusu, bhodjuana na poko yaamodjeedja bhaaseedhi na ndjotso. ¹⁷ Haa bhoa mokando mwatelee profeta Yelemia moikomeene: ¹⁸ Bhaiyoka makelele a Rama, mabhiye manene pe bhoatata: Rashele akaeya bhaana bhande, pe apaliti bho bhamogbutidje molema, akpulibho bhatike dhea. ¹⁹ Erode agwaaka, anzelu wa Kumu aimopudjia Yozefu a ndjotsi, a Ezipeti, ²⁰ pe aibuka naande: Djowo, tomba waana na nyango, pe kee a Isalaele, bhoo bhabho bhaapalakati ehele ya waana bhagwi. ²¹ Yozefu aidjowo, aitomba waana na nyango, pe aiikee a Isalaele ²² Kasi, aokaka bho Arkelaus aatoba Kumu a siyo ya sango Erode, aitobha na bhoo, yeakee a Isalaele; pe aeneke ndjotsi, aikee a Galileya, ²³ pe aikadhaa a Nazarete, akpulibho mokando mwatelee bhaprofeta mokomeene: Bamobhea mogendja wa Nazarete