¹ Mongbakedhi mohoaka, bhakumu bha bhasali bha Akongo bhasusu pe mbange bha litungu bhaingia likita bho bhawoo Yesu. ² Lingongo dha bhomonyanga panga, bhaikee naande, bhaikamoyee pambe ya Posio Pilato, Kumu wa gbata. ³ Yudasi, oobho waamokabha, aeneke bho bhamokesei etumbu, aiyoka iwa a molema, pe aikahandedja bhibhonda tuku djisato bha fanga pambe ya bhakumu bha bhasali bha Akongo na mbange, ⁴ aibuka: Nikoi lisumu ndje ekabhi mbi mogendja atike na mokando. Bhaimohulidja: Masu nde? Moseli we. ⁵ Yudasi aidhumba bhibhonda bha fanga a tepelo, aiysua pamba, aikasepee. ⁶ Bhakumu bha bhasali bha Akongo bhaidjiandoa, pe bhaibuka: Ekokiti bhodjiisa a libhenga dha ekalo, bhoo djidjongi a makiya. ⁷ Lingongo dhabhu bhaingia londo, bhaihenda na fanga djia mokonda ma ayowedhi na teni, bhoo bhawusiake bhapaya. ⁸ Mainanga ekabhee ibho tee bheendee mokonda mua mokonda ma makiya. ⁹ Mokando moabuka mosakoli Yelemiya moingemene: Bhaitomba bhibhonda tuku djisato bha fanga, motuya moangemedje bhana bha Isalayele; ¹⁰ pe bhaidjinyea akpuli ya mokonda ma ayowedhi na teni, ndje yaalindani Kumu. ¹¹ Yesu aisamba libhoso dha Kumu wa gbata. Aimohedjoo: We Kumu wa bhayuda? Yesu aimohulidja: Obuki dhea. ¹² Kasi yeanoo a madjongedji ma bhakumu bha bhasali bha Akongo na ma mbange. ¹³ Pilato aibuka naande: Otikaoka matatoli ma maloa makanyea ibho liko dha we? ¹⁴ Kasi ye Yesu agbale, Kumu wa gbata aikamwa mingi. ¹⁵ na bhiyenga bhisusu, Kumu wa gbata amesooko bhoifa mogendja omoti a boloko, bhodjuana na posa ya mongindi. ¹⁶ Bhaadhaaka na mogendja wa boloko omoti waadjeana mingi, liina dhande Balaba. ¹⁷ Yaadhaaka ibho lisanga, Pilato aibuka naabhu: Opalini bho niifeini nda? Balaba, too Yesu okabheya ibho Klistu? ¹⁸ Bhoo aadjea bho bhaakabha Yesu a molema mobhehu. ¹⁹ Yaadhaaka iyo aasambedja, wadhi waande aidhabuka naande: Todhaa na mokando na mosembo oobho; bhoo ninyokoloni bheendee bhobia a ndjotsi akpuli yaande. ²⁰ Bhakumu bha bhasali bha Akongo na mbaange bhaibuka na mongindi bho moonge Balaba, pe bhatitidjeYesu a yogo. ²¹ Kumu wa gbata atombaka buka, aibhahedjoo: Tei yaabhu bhabhale, opalini bho niifeini nda? Bhaiyanoa: Balaba. ²² Pilato aibuka naabhu: Nikoo ye na Yesu, okabheya ibho Klistu? Bhasusu bhaiyanoa: Bhamogbeme a ekulusu! ²³ Kumu wa gbata aibuka: Mokando nde mobhehu mokoi iyo? Bhaikpoloa koto bhobia: Bhamogbeme a ekulusu! ²⁴ Pilato aeneke bho atike na eyoma edhisake, pe makelele makakonda, aitomba dhua, aiyasosa mabho libhoso dha mongindi, pe aibuka: Nidjeiti mokando ma mosembo oobho. Mooseli io bheene. ²⁵ Litungu lisusu dhiyanoa: Makiya mande masunyeane liko dhasu pe dha ngbongi bhasu! ²⁶ Pilato aibhaifia Balaba; lingongo dha bhokutidja Yesu fimbo, aibhanyea naande bho bhamogbeme a ekulusu. ²⁷ Mbulunga bha Kumu wa gbata bhaikee na Yesu a eise ehindo pe bhailokoo litungu dha mbulunga padhi naande. ²⁸ Bhaimotubha bhisindje bhande pe bhaimowadjaa mokoti mokpetu. ²⁹ Bhaiyowa ngundu ya ndjubha, bhaimowdjaa naayu a molo, pe bhaimopedjaa mombambaka aebho ya dhibhaami; bhaasuaka bhohadhi naande, bhamosekeke, bhabukaka: Agbaya, Kumu wa bhayuda! ³⁰ Pe bhamotuheeke masoi, bhatombaka mombambaka, bhomobhomaka a molo. ³¹ Bhamadjaka bhomoseke, bhaimotubha mokoti, bhamowadjaa bhisindje bhande, pe bhaikee naande bho bhamogbeme a ekulusu. ³² Bhapundjaka, bhaitana na mogendja omoti wa kilene, liina dhande Simono, bhaimolinda na ngudhu awaa ekulusu ya yesu. ³³ Bhatobhaka a siyo ebheyi ibho Gologota, einingidja siyo ya ekulusu, ³⁴ bhaimonyea maana maibodjono na saya; kasi amaengeke, ye apale dhea bonunga. ³⁵ Bhamogbeme a ekulusu, bhaigbaana bhisindje bhande, bhakuaka djege, bho buka ya mosakoli engemene: Bhaigbaana bhisindje bha mbi, pe bhaikua mokoti ma mbi djege. ³⁶ Lingongo bhaidhaa, pe bhamokengeleke. ³⁷ Bho bhadjeedje tina nde yaamowa ibho, bhaidhila liko dha molo ma nde: Yesu oobho, Kumu wa bhayuda. ³⁸ Bhaagbeme bhayowedhi bhabhale a ekulusu siyo emoti naande, omoti a ebho ya dhibhaami, odii a ebho ya dhibhadhi. ³⁹ Bhabho bhanyoko a ndjia bhamosekeke, pe bhalingidjaka molo, ⁴⁰ bhabukaka: We okabhuka tepelo, pe okaeinda lingongo dha masu masato, aheledja we meene! Omadhaa Wana wa akongo, tita a ekulusu! ⁴¹ Bhakumu bha bhasali bha Akongo siyo emoti na bhateyi ba mibheko na mbange, bhamosekeke pe, bhabukaka: ⁴² Aaheledja bhadii, aaheledjete iyo meene! Amadhaa Kumu wa Isalayele, atite a ekulusu, pe yaamondima. ⁴³ Aanyea na Akongo; Akongo amoheledje ndjebho ndjebho, amamopala. Bhoo abuki: Nike Wana wa Akongo. ⁴⁴ Bhawoyedhi bhagbemi ibho a ekulusu naande siyo emoti bhamobokoko oko bhoa. ⁴⁵ Bhobhanda saa ya motobha tee ya libwa, modhidhi moingia a nbando mobimba. ⁴⁶ Bhodjua saa ya libwa, Yesu aikpoloa na mohodhi makasi: Eli, Eli, lama sabaktani? ⁴⁷ Bhamoti na bhabho bhaadhaaka haa, bhaokaka bhoa, bhaibuka: Akabhea Eliya. ⁴⁸ Oko na poko ena omoti naabhu aipota ebhango bhokatomba esindje, aiyedumee a maana ma saya, aiyebhatea a mombambaka, pe aimonyea bho anunge. ⁴⁹ Kasi bhabukaka: Moyee, yaene inga Eliya aadhoa moheledja. ⁵⁰ Yesu aikpoloa edii mbala, pe aifa mohudhi. ⁵¹ Seleke, litambala dha tepelo dhiitsalea bhikenge bhibale, bhodjawa liko tee a ndebha, mongali moiliga, mabhanga maiyalea. ⁵² Kunda djiidhupuana, pe mikpoto ma basatu bhanene bhagwa miisekwa. ⁵³ Bhapundjaka a kunda, bhaingia a gbata mosatu lingongo dha lisekwa dha Yesu pe bhaipundjia bhagendja bhanene. ⁵⁴ Kumu wa mbulunga wa bhaloma na bhabho bhaadhaaka naande siyo emoti bho bhakengele Yesu, bhoene mongali ndje yaliga imo pe mubho moakomeene, bhaitobha na bhoo menemene, pe bhaibuka: Sooti, mogendja oobho adhaaki Wana wa Akongo. ⁵⁵ Yaadhaaka haa bhadhi bhanene bhaseleke bhohadhi; bhabho bhadjuakaYesu bhodjawa Galileya, bho bhamolomeake. ⁵⁶ Tei yaabhu yaadhaaka Malia wa Magadala, Malia, naa Yakobo na Yozefu, pe naa ngbongi bha Yebedeyo. ⁵⁷ Mokoo modhoaka, mogendja omoti wa bhogumake wa Alimoteyo aidhoa, liina dhande Yozefu, aadhaaka pe moyekoli wa Yesu. ⁵⁸ Aikee pambe ya pilato, pe aiyonga mokpoto ma Yesu. Pilato ailinda bho bhamonyee. ⁵⁹ Yozefu aitomba mokpoto, aimobhombo na esindje ya bhopee, ⁶⁰ pe aikamoisa a kunda enyie, yaalongedja iyo a mabhanga. Lingongo aidinda libhanga linene a liinge dha kunda, pe aikee. ⁶¹ Malia wa Magadala na Malia odii bhaadhaaka haa, edhie bhaseleneke na kunda. ⁶² Kombi yana, lingongo dha bhusa bha bholengele sabhato, bhakumu bha bhasali bha Akongo na bhafaliseyo bhaikee mongindi pambe ya Pilato, ⁶³ pe bhaibuka: Kumu, eyatimidji bho mogendja wa maloa oobho aabuka, yaadhaaka iyo na bhomoi: Niasekwa lingongo dha masu masato. ⁶⁴ Linda bho bhakengele kunda tee dhasu dha misato, bhoo bhayekoli bhande tebhadhahibhu mokpoto, pe bhabuke na litungu: Asekwi a bhago. Maloa mabho maabia ma libhoso. ⁶⁵ Pilato aibuka naabhu: Okeni na bhakengeli; keeni, ekengeleni ndje epali ino. ⁶⁶ Bhaikee, bhaisa bhakengeli a kunda, lingongo dha bhonyanga libhanga na monyololo.