¹ Yesu amadjaka bhobuka bhoa, aibuka na bhaayekoli bhande: ² < Odjeini bho lingongo dha masu mabhale yadhaa Pasika, pe bhaakabha Wana wa Moto bho bhamogbemea ekulusu.> ³ Bhakumu bha bhasali bha Akongo na mbange bhange bha litungu bhaadhaa likita a egbingi ya mosali wa Akongo monene, wa liina dha Kaifa; ⁴ pe bhainukana ndjia edungake ibho Yesu na ememe ebhehu pe emoawake ibho. ⁵ Kasi ibho bhaibuka: < Temoedhaa poko ya lipati, bho yikiyiki teedhaa tei ya litungu.> ⁶ Yaadhaaka Yesu a Betania, a eise ya Simoni wa mabala, ⁷ wadhi omoti apedhi molangi ma malasi ma motiyo monene aiyadinda padhi naande; yaadhaaka Yesu aaka, aisunyia malasi a molo mande. ⁸ Bhayekoli bhaeneke bhoa, bhaindungubhana pe bhaibuka: Bhobomedja bhoa akpuli ya ye? ⁹ Ndje bhaengedji malasi maa motiyo makasi, pe bhanyee bhabola fanga dja ina. ¹⁰ Yesu adjeaka bhoa, aibuka naabhu: Okaokedjani wadhi ona iwa aye? Akoini mokando mopele; ¹¹ Okadhaani na bhabola poko susu, kasi otadhaani na mbi poko susu. ¹² Bhasungiani a mokuku, akoi bhoa a bhoningidja kunda yambi. ¹³ Nikaadjeedjani menemene, pamba susu yaatelee ibho mboli epele eebhe, a mongali mosusu, bhaatelee pe akpuli ya bhotimidja mokando mokoi wadhi oobho. ¹⁴ Lingongo omoti wa bha djomi na bhabhale, liina bhande Yudasi Iskarioti aikee pambe ya bhakumu bha bhasali bha Akongo, ¹⁵ pe aibuka: Waanyeaini yoma nde bho niikabheeni naande? Bhaimonyea fanga bhibhonda tuku djisato. ¹⁶ Oko poko ena, aibhanda bhonukana ndjia epele ekabhake iyo Yesu. ¹⁷ Dhasu dha dhibhoso dhikaake ibho mapa ma bhoko, lokolo, bhayekoli bhaibuka na Yesu: Opali bho eekalee dhiya dha Pasika saase? ¹⁸ Aihulidja: Keeni a gbata pambe ya akali, pe bukani naande: Molakisi abuki: Poko yambi etobhi padhi; niaka lipati dha Pasika pambe ya we siyo emoti na bhayekoli bha mbi. ¹⁹ Bhayekoli bhaikoo ndje yaabuka Yesu naabhu, pe bhailengele Pasika. ²⁰ Mokoo motobhaka, aikonda a mesa na bha djomi na bhabhale. ²¹ Yaadhaaka ibho bhaaka, aibuka: Nikaadjeedjani menemene, omoti naanu aakabhani. ²² Bhaiyoka iwa mingi, pe omoti na omoti abukaka naande: Eke mbi, Kumu? ²³ Aiyanoa: Oobho aisi na mbi ebho siyo emoti a saani, iyo waakabhani. ²⁴ Wana wa Moto akakee, ndje yaadhila ibho akpuli yaande. Kasi iwa na mogendja oobho bhaakabha wana wa Moto na ndjia yaande! Enyoi bhopele akpuli ya mogendja ona ndje aabhotamati. ²⁵ Yudasi, oobho waamokabha, aibuka: Eke mbi, Moteyi? Yesu aimohulidja: Obuki dhea. ²⁶ Yaakaka ibho, Yesu aitomba lipa; pe, lingongo dha bhonyea matondi, aidhibhuka, pe aidhinyea na bhayekoli, aibuka: Tombani , akani, eebhe eke mokuku(mulu) ma mbi. ²⁷ Lingongo aitomba ekpaka; pe lingongo dha bhonyea matondi, aibhanyea naayu, aibuka: Enungani ino bhasusu; ²⁸ bhoo eebhe eke makia ma mbi, makia ma libala dhinyie, masunyiani akpuli ya bhagendja bhatutu, a bholimbisi bha masumu. ²⁹ Nikaadjeedjani, nitanungaibhi dhea embuma eebhe ya vino, tee bhusa bwaenunga mbi enyie siyo emoti naanu a bhokumu bha Yaa. ³⁰ Bhamadjaka bhoemba eyombo, bhaikee a mokodhi ma bhaoliva. ³¹ Yesu aibuka naabhu: Ino bhasusu waatsakani ekumu bhulu bhubho akpuli ya mbi; bhoo bhaadhila:Niakuta mokengeli, pe pata bhaabombo. ³² Kasi, lingongo dha mbi bhasekwa, niatobha libhoso dhanu a Galileya. ³³ Petelo aibuka naande: nako bhasusu bhatsakaa ekumu akpuli ya we, ye mbi. ³⁴ Yesu aibuka naande: Nikaadjeedja menemene, oko na bhulu bhubho, libhoso bho koko abhekue, waanganani mbala djisato. ³⁵ Petelo aimohulidja: Emadhaa nako bho nigwe na we siyo emoti, nitaangana. Bhayekoli bhasusu bhaibuka oko bhoa ³⁶ Lngongo dhaina, Yesu aikee naabhu a siyo emoti ekabhee ibho Getesemani, pe aibuka na bhayekoli: Dhikaani aabho, mbi nikakee pamba bhokaabhela. ³⁷ Aitomba Petelo na ngbongi bhabhale bha Zebedeyo, pe aitangea bhooka iwa. ³⁸ Aibuka naabhu: Molimo mambi moke na iwa padhi na yogo; dhikaani iei, ekengele siyo emoti. ³⁹ Aadindaka maa bhotsedhu libhoso, aititidja mbanda a ndheba pe aitangea bhoabhela: Yaa, momangemene, ekpaka eebhe ekee bhohadhi na mbi! Nakobhoa, ye ndje epali mbi, kasi ndje epali we. ⁴⁰ Aikumba pambe ya bhayekoli, aibhatana bhayedhi, aibuka na Petelo: Ohonitini bhokengele saa emoti siyo emoti na mbi! ⁴¹ Kengeleni pe abhelani, akpuli bho teokwaani a masenginya; molimo moke ina, kasi mokuku moembi. ⁴² Aiyasua edii mbala pamba, pe aiyabhela bho: Yaa, mongemeniti bho ekpaka eebhe ekee bhohadhi na mbi ye bhoonienunge, mokano ma we mokomeene! ⁴³ Aikumba, aibhatana kato bhahedhi; bhoo miiso mabhu maadhaaka malitake. ⁴⁴ Aibhayee, pe, atobhaka bhohadhi, aiyabhela mbala ya misato, akumbiaka oko buka djimoti. ⁴⁵ Lingongo aikee pambe ya bhayekoli bhande, pe aibuka naabhu: Heeni ndjebhondjebho, pe hemani! Poko etobhi padhi, bhakabhi Wana wa Moto a mabho ma bhasumuki. ⁴⁶ Djawani, ekee; oobho okakabhani atobhi padhi. ⁴⁷ Yaadhaaka iyo aabuka, Yudasi, omoti wa bha djomi na bhabhale, aitobha, pe naande siyo emoti mongindi monene mopedhi makongo na bhingbongbo, bhakumu bha bhasali bha Akongo na mbange bha litungu bhaibhalinda. ⁴⁸ Oobho okamakabha aabhanyea etalisi eebhe: Oobho waaene ino niakpobha naande iyo ona; mahuloani. ⁴⁹ Na mbala emoti, aiyadinda padhi na Yesu, aibuka: Agbaya, Mateyi! pe aiyakpobha naande. ⁵⁰ Yesu aibuka naande: Bola, modhoyei we, mokoo. Bhagendja bhaa bhaiyadinda, pe bhaidunga Yesu. ⁵¹ omoti wa bhabho bhadhaaki siyo emoti na yesu ailamba ebho, aifa poka waande; aibhuyee mosali wa Kumu monene wa bhasali bha Akongo, aimokese litoyi. ⁵² Yesu aibuka naande: Manedja poka wawe a kafa; bhoo bhasusu bhabho bhaatomba ngwaa bhaagwa na ngwaa. ⁵³ okainga bho nibheiti Yaa, waalindiani ndjebhondjebho mapinga djomi na mabhale ma bhandjelu? ⁵⁴ Makomi maangemene bhokopo nde, mabho mabuki bho moadhaa bhoa? ⁵⁵ Poko ena, aibuka na mongindi: Odhoini bhodhadungani na makongo pe na bhingbongbo, bdje awoyedhi, masu masusu nidhaaki naanu siyo emoti, niteyaka a tepelo, pe yeodungeini. ⁵⁶ Kasi ngando djia susu djitobhi bho makomi ma bhasakoli mangemene. Bhayekoli bhasusu bhaimoyee, bhatiya. ⁵⁷ Bhabho bhaadunga Yesu bhaikee naande pambe ya Kumu monene Kaifa, oho yaasangana bhatei bha mibheko na mbange. ⁵⁸ Petelo aimodjua lingongo tee a egbingi ya Kumu monene, aingia, pe aidhaa siyo emoti na bhasali, bhoene ndje yaasiya mokando mua. ⁵⁹ Bhakumu bha bhasali bha Akongo na bhadjadji bhaanukanaka mokando ma maloa dhiko dha Yesu bho bhamowoo. ⁶⁰ Kasi ye bhadhise, nako bhagendja bhanene bhaenene. Lingongo, bhabhale bhaidhoa, bhaibuka: ⁶¹ Mogenja oobho abuki: Niabuka tepelo ya Akongo, pe nieinde lingongo dha masu masato. ⁶² Kumu monene aidjawa, pe aibuka naande: Ohulidjiti eyoma? Aye bhagendja bhabho bhasusu bhakabuka ngando dja maloa dhiko dha we? ⁶³ Yesu aidhaa bhobii. Kumu monene atombaka egendja, aibuka naande: Niilapei, na liina dha Akongo wa bhomoi, edjeedja inga oke Klistu, Wana wa Akongo. ⁶⁴ Yesu aimoanea: Obuki dhea. Nikaadjeedjani, waeneni Wana wa Moto adhai a ebho ya dhibhaami dha ngudhu ya Akongo, pe aadjonga a mapata ma liko. ⁶⁵ Kumu monene aitsala bhisindje bhande, aibuka: Aabhei Akongo! Enukane koto matatoli ma bhagendja? Ookini ndje eyabhei iyo Akongo. Obukini bho? ⁶⁶ Bhaiyanoa: Abhongi na yogo. ⁶⁷ Na buka djia, bhaimotuhee masoi a mbanda, bhadii bhaimolaa mikoso pe mbata bhabukaka: ⁶⁸ Klistu, sakola; edjeedja nda ookuti. ⁶⁹ Ngisa Petelo aadhaaka tiambo a egbingi.. Mosali omoti wa wadhi aibuka naande: We pe, waadhaaka siyo emoti na Yesu Mogalileya. ⁷⁰ Kasi aingana libhoso dha bhagendja bhasusu, aibuka: Nidjeiti ekanukana we bhobuka. ⁷¹ Yaadhaaka iyo aakee saa modhipe, mosali odii wa wadhi aimoene, pe aibuka na bhabho bhaadhaaka haa; oobho pe aadhaaka siyo emoti naa Yesu wa Nazarete. ⁷² Aingana koto nakina, ailapa: Nidjeiti mogendja ona. ⁷³ Lingongo bhotsedhu, bhabho bhaadhaaka haa bhaiyandinda pe bhaibuka na Petelo: Menemene we pe oke a mongindi ma bhagendja bhaa, bhoo egendja ya we ekaadjeedja. ⁷⁴ Aitangea bholapa pe bhodhumba mibele: Nidjeiti mogendja ona. Oko na poko ena, koko aibhekua. ⁷⁵ Petelo aiyatimidja buka ya Yesu: Libhoso bho koko abhekue, waanganani mbala djisato. Apundjaka, aitoo na mabhiye.