¹ Bhokumu bha dhiko bhayaani na bhaseka djomi bhatombi tala djabhu bho bhakataana na moomi odjongi bhooso. ² Bhatano bhaadhaaka bhilema, bhatano na ndata. ³ Bhilema bhaatombati monye poko yaatomba ibho tala; ⁴ Kasi bha ndata bhaatomba tala djabu pe monye a moongo. ⁵ Yaemeke moomi na bhotobha, ibho bhasusu bhaiyembee pe bhainyoo na hiyo. ⁶ Na bhulu tei, bhaikpoloa; Moomi atobhi, keeni bhokamosepa! ⁷ Bhaseka bhaa bhasusu bhaisusua, pe bhaibhongedje tala djabhu. ⁸ Bhilema bhaibuka na bha ndata: Enyeani monye manu, tala djasu djikadhimee. ⁹ Bha ndata bhaiyanoa: Kati; motike monene akpuli yaasu naanu; keeni bhokahenda manu pambe ya bhabho bhaka bhakaengedje. ¹⁰ Yakeeke ibho bhokahenda monye, moomi aitobha; bhabho bhaalengele bhaingia naande siyo emoti a eise ya lipati, pe bhaidhipa modhipe. ¹¹ Tsielee, bhaseka bhaa bhadii bhaidhoa, pe bhaibuka: Kumu, Kumu, edhipia. ¹² Aibuka naabhu: Nikaadjeedjani menemene, niidjeitini. ¹³ Abhaneani, bhoo odjeitini dhasu na poko. ¹⁴ Moadhaa ibhi oko bhoa na moomi omoti waa kee mondo esika bhohadhi, dibhea bhasali bhande, pe aibhayeyee dhoma dhande. ¹⁵ Ainyea omoti taleta djitano, odii taleta djibhale, pe emoti na oobho wa bhasato, bhodjuana na ngudhu ya omoti na omoti,pe aikee. ¹⁶ Oobho waadhisa taleta djitano aikee, aihombedja, pe aidhisa taleta djidii djitano. ¹⁷ Oko bhoa oobho waadhisa taleta djibhale aidhisa djidii djibhale. ¹⁸ Oobho waadhisa oko emoti aikalonga libhea a ndebha, pe aiwusia efanga ya Kumu waande. ¹⁹ Masu manene mainyoo, Kumu wa bhasali bhaa aihula, pe aibhaonga bho bha bhamonyee mosambo ma elemo yaabhayeyee iyo. ²⁰ Oobho waadhisa taleta djitano aidhoa na taleta djidii djitano, pe aibuka: Kumu, waayeyeeni taleta djitano; sele , nidhisi djidii djitano. ²¹ Kumu waande aibuka naande: mosali mopele pe wa bhotosi; onongidji bhotosi a ngando dja bhodjelele, nianyea neenee; ingia a mosepi ma Kumu wawe. ²² OObho waadhisa taleta djibale pe aidhoa, aibuka: Kumu, waanyeani taleta djibhale; sele, nidhisi djidii djibhale. ²³ kumu waande aibuka naande:mosali mopele pe wa bhotosi; oningidji bhotosi bhotosi a ngando dja bhodjelele, nianyea neenee; inia a mosepi ma Kumu wawe. ²⁴ Oobho waadhisa oko taleta emoti aidhoa, pe aibuka Kumu, nikadjee bho odhi moomi wa likakala, okapoo mbuma siyo yaonati we, pe okaukee oho yaaheheti we; ²⁵ niadhaa na bhoo, pe niikawusia taleta ya we. ²⁶ Kumu aimohulidja: Mosali mobhehu pe aminyaa, waadjea bho nikapoo oho yaonati mbi, pe nikaukee oho yaaheheti mbi; ²⁷ yaadhaaka bho onyee bhakomedhi na mimbongo fanda dja mbi, na maa mbakea. ²⁸ Mokatoani taleta yaande, pe enyeani na oobho oke naadju djomi. ²⁹ Bhoo bhanyea oobho oke na eyoma, pe atobha na bhogumake, kasi oobho atike na eyoma bhaamokatoa nako eebhe eke iyo nayu. ³⁰ A moseli mosali ona mobhehu, modhumbani a modhidhi ma tiambo, hoo yaadhaa mabhiye pe bhosaka miinyo. ³¹ Yaodhoa Wana wa Moto a heku yaande, siyo emoti na bhandjelu bhande, aadhaa a ngbende yaande ya heku. ³² Mangando masusu maapundja libhoso bhande. Aagbaa mamoti na madina, ndje ekagbaa mokengeli pata na meme; ³³ pe aisa pata a ebho yaande ya dhibhadhi. ³⁴ Lingongo aabukana bhabho bhaadhaa a ebho yaande ya dhibhaami: Dhoani, ino bhabho Yaa abhapamboi; tombani bhokumu bhwalengele ibho akpuli yaanu oko a litange dha mongali. ³⁵ Bhoo niadhaa na ndjaa, waanyeani eyakake; niadhaa na ekalala, waanyeani enungake; niadhaa mopaya, pe waayambaini; ³⁶ niadhaa mbundu, aiwadjaini; niadhaa na epeko, oiseleini; niadhaa a boloko, oidhoani pambe ya mbi. ³⁷ Bhasembo bhamohulidja: Kumu, poko nde yaayene iso we odhaaka na ndjaa, pe eienyea eyakake; odhaaka na ekalala, eienyea eyakake; odhaaka na ekalala, eienyea enungake? ³⁸ Poko nde yaayene iso mopaya, pe eieyamba; too mbundu, eiewadjaa esindje? ³⁹ Poko nde yaayene iso na epeko, too a boloko, pe eidhoa bhodhaasele? ⁴⁰ Kumu aabhahulidja: Nikaadjeedjani menemene, poko susu yaakoo ino ngando djia na omoti wa bhan'ima bhabho bha bhodjelele, waakomeeni mbi. ⁴¹ Lingongo aabuka na bhabho bhaadhaa a ebho yaande ya dhibhadhi: Djawani padhi na mbi, ino bhaabele ibho; keeni a moosa temodhimee moalengele ibho akpuli ya amembo na bhandjelu bhande. ⁴² Bhoo niadhaa na ndjaa, ye onyeini eyakake; niadhaa na ekalala, ye onyeini enungake; ⁴³ niadhaa mopaya, ye oyambeni; niadhoa mbundu, ye owadjaini esindje; niadhaa na epeko pe a boloko, ye odhaseleini ⁴⁴ Bhaahulidja pe: Kumu, poko nde yaayene iso adhaaka na ndjaa, to na ekalala, mopaya, mbundu, na epeko, too a boloko, ye eesalise? ⁴⁵ Pe aabuka naabhu: Nikadjeedjani menemene, poko susu djiakooti ino ngando djia na omoti wa bhabho bha bhodjelele, waakomeetini mbi. ⁴⁶ Pe bhabho bhakee a etumbu ya seko, bhasemboa ehele ya seko.