¹ Yesu aipundja a tepelo, yaadhoaka iyo aakee, bhayekoli bhande bhaidhoa bhodhatete naande liko dha bhobhongu bha tepelo. ² Kasi iyo aibuka naabhu: Okaeneni dhoma dhia dhisusu? Nikaadjeedjani menemene, libhanga nako dhimoti dhitadhikaa liko dha dhidii, masusu maanyelee. ³ Aidhoa liko dha mokodhi ma bhaoliva. Bhayekoli bhaidhoa ibho bheene bhodhamohedjoo: (Edjeedja) poko nde yaakomeene mokando mwa, elembo nde yaaningidja bhodhoa bhawe pe dhasu dha suka ya mongali? ⁴ Yesu aibhahulidja: Abhaneani bho tebhaakoseni. ⁵ Bhagendja bhanene bhaodhoa na liina dhambi, bhaabuka: Mbi Klistu oobho. Pe bhaakosa bhagendja bhatutu. ⁶ Waokani mosambo pe miteli ma bhila: tosusumeni, bhoo ngando djia susu djiadhoa. Kasi etadhaa mee suka. ⁷ Ngando emoti yaanedja ngando edii, bhokumu bhomoti bhoanedja bhokumu bhodii, pamba susu yaadhaa ndjaa pe mongali moaliga. ⁸ Ngando djia susu djiadhoa litange dha maboale. ⁹ Bhaadhumbani a mabho ma bhagendja bho bhayenedjeni maboale pe bhayoweni; bhaalonani pamba susu akpuli ya liina dhambi. ¹⁰ Poko ena bhagendja bhanene bhaakwaa, bhaakabha bhaamina'bhu, bhaalonana. ¹¹ Bhasakoli bha maloa bhanene bhaadhoa, bhaakosa bhagendja bhatutu. ¹² Ngando bhehu djiabheka, bhondima bha bhagendja bhatutu bhoadeke. ¹³ Kasi oobho waanyanga mplema tee suka aahela. ¹⁴ Bhaatelee mboli epele eebhe ya bhokumu bha dhiko a mongali mosusu, bhoo nbando susu djidjee mokamdo mua. Lingongo suka yaadhoa. ¹⁵ "Mainanga, yaene ino bhopundjwa bha nyaali bhoabuka mosakoli Daniele, bhokomeene a siyo esatu, oobho okalanga akoo keba! ¹⁶ na limoti, bhabho bhaadhaa a Yudea bhatie a mikodhi; 7 oobho waadhaa liko dha mwandja teatite bho atombe eyoma eke a eise yaande; ¹⁸ pe oobho waadhaa a eyanga teakumbe lingongo bhokatomba mokoti mande. ¹⁹ Iwa na bhadhi bhaadhaa na meemi pe na bhabho bhanungidjaka masu maa! ²⁰ Abhelani bho bhotidhi bhanu tebhodhaa poko pela, kati pe bhusa bha yenga. ²¹ Bhoo, modjengetano maadhaa ibhi monene bhobia oko ndje edhaakini ibhi imo ma bhokopo bhua oko yaatangea mongali tee bheebho, pe motadhaa ibhi dhea. ²² Pe, teedhaake bho masu maina maahula bhotsedhu, nako mogendja omoti atahela ibhi; kasi akpuli ya bhabho bhahoono, masu maa maakokoono. ²³ Bhamabuka naanu: Klistu ake aabho, too: Ake oho, tondimeni. ²⁴ Bhoo bha Klistu pe bhasakoli bha maloa bhaadhoa; bhaakoo ngando neenee pe makamwisi makwedjeke, edii poko, nako bhabho bhahoono. ²⁵ Ina bhoa, niidjeedjini gala. ²⁶ Bhamabukani naanu: Iyo oobho, ake a ngbengee, tokeeni; iyo owaho, aagbomi a eise, tondimeni. ²⁷ Bhoo, okondje ekadjawe liiso dha bhusa saa liko pe dhianingidje tee saa tina, yaadhaa ibhi bhohula bha Wana wa Moto okobhoa. ²⁸ Ndjo bhakaukee oko a siyo ekadhaa ekpongbo. ²⁹ Masu maa ma modjengetano mamanyoo, liiso dha bhusa dhiatobha modhidhi, songe ata. kpandja dhea, ndjotso bhaakwaa bhodjonga liko, pe ngudhu dja dhiko djiasia. ³⁰ Poko ena elembo ya Wana wa Moto yapundja liko, matungu masusu ma mongali maatataka, pe maene Wana wa Moto aatita na ndombele bhodjonga liko na ngudhu pe na heku enene. ³¹ Aalinda bhandjelu bhande na limbili dhiaboma, pe bhaisa bhabho bhahoono siyo emoti bhodjonga pamba djinei dja mongali, bhodjawa songo emoti ya dhiko na edii. ³² Dhisani bhoyebi na ndjia ya litsatsa dha mole ma vino. Bhitape bhande bhimatobha bhoongo, pe kasi djigbaa, odjeeni bho gala etobhi padhi. ³³ oko bhoa, omaeneni ngando djia susu, djeani bho Wana wa Moto atobhi padhi, ake a modhipe. ³⁴ Nikaadjeedjani menemene, ekeke eebhe etanyoo, oko mokando mwa mokomenekini. ³⁵ Liko na ndhebha djialimwa, kasi buka djambi djitalimwa ibhi. ³⁶ A mubho moseli dhasu na poko, mogendja nako omoti adjeiti, ye nako bhandjelu bha dhiko, ye nako Wana, oko yaa iyo mbuki. ³⁷ Mubho moakomeene poko ya Nowa moakomene pe poko yaadhoa Wana wa Moto. ³⁸ Bhoo, a masu ma libhoso dha pela enene, bhagendja bhaakaka pe bhanungaka, bhaasoko pe bhaasedjeke ngbongi djabhu, tee bhusa owaingia Nowa a bwato; ³⁹ pe bhaakamwati na mokando nako momoti, tee yadhoa pela enene pe eibhadhindjidja bhasusu: yaadhaa ibhi imo oko bhoa poko yaadhoa ibhi Wana wa Moto. ⁴⁰ Tei ya bhami bhabhale bhadhaaka a eyanga, bhatomba omoti pe bhayee odii; ⁴¹ tei ya bhadhi bhabhale bhadhaaka bhainda moteke, bhatomba omoti pe bhayee odii. ⁴² Abhaneani, bhoo odjeitini bhusa bhoadhoa Kumu waanu. ⁴³ Musuani bhopele, meene eise adjeake na poko nde ya bhulu yadhoa mogendja wa huubha, ndje atahee bhoo mogendja wa huudha teabhuke mobhukulu ma eise yaande. ⁴⁴ Mainanga, ino pe, kengeleni, bhoo Wana wa Moto aadhoa na poko eebhe etikaleene ino. ⁴⁵ Mosali nde wa bhtosi pe wa bhokengi, oobho waisa Kumu waande Kapita wa bhagendja bha eise yaande, bho abhanyeake dhia na poko yana? ⁴⁶ Mosepi ma mosali oobho waatana Kumu waande aakoo bhoa a lihula dhande! ⁴⁷ Nikaadjeedjani menemene, aamoisa mokengeli wa dhoma dhande dhisusu. ⁴⁸ Kasi emadhoa mosali mobhehu, oobho okabukia iyo meene: Kumu wambi akaemee , ⁴⁹ amatangea bhokuta bhaamina'nde, bhoaka pe bhonunga na bhalangbi, ⁵⁰ Kumu wa mosali ona aadhoa bhusa bhubho bhotikaleene iyo pe na poko eebhe edjeiti iyo, ⁵¹ aamokesee etumbu enene, pe bhamokoo ndje ekakoo ibho bhagendja bha mbanda djibhale: hoo yadhaa mabhiye pebhosaka miinyo.