¹ Lingongo dha sabato, bhusa bha libhoso bha poso, Malia wa Magadala na Malia odii bhaikee bhokasele kunda. ² Pe seleke, ndebha djiiliga; andjelu omoti wa Kumu aitita bhodjonga liko, adhaaka aahulungidja libhanga, pe aidha liko dha ino. ³ Mbanda yaande ekpandjake ndje liiso dha bhusa, pe esindje yaande bhopee ndje lilanga(mapata). ⁴ Bhakengeli bhaihala na bhoo, pe bhaitobha ndje bhago. ⁵ Kasi andjelu aibuka na bhadhi: Todhani na bhoo, nidjei bho okanukanani Yesu waagbeme ibho a ekulusu. ⁶ Atike dhea aabho; aekwi ndje yaabuka iyo. Dhoa oseleni siyo esamaki iyo. ⁷ Keeni ebhango bhokadjeedja bhayekoli bho asekwi tei ya bhago. pe seleke, anyei libhoso dhanu a Galileya: Waamoeneni hoo. Nidjeedjini gala. ⁸ Bhaidjawa ebhango a kunda, na bhoo pe na mosepi monene, pe bhaipota ebhango bhokotelee bhayekoli masambo. ⁹ Pe seleke, Yesu aidhataana naabhu, pe aibuka: Agbaya waanu. Bhaiyadinda bho bhadunger mako mande, bhaigbueme midhi libhoso dhande. ¹⁰ Yesu aibuka naabhu: Todhaani na bhoo; kadjeedjeni bhan'ima bho bhakee a Galileya: Bhaeneni hoo. ¹¹ Yaadhaaka ibho bhaakee, bhamoti tei ya bhakengeli bhaitobha libhoso a gbata, pe bhaitelee bhakumu bha bhasali bha Akongo kando susu djiakomeene. ¹² Lingongo dhabhu bhosangana na mbange pe bhoingia likita, bhabho bhainyea mbulunga fanga tutu, ¹³ bhaibuka: Bukani: Bhayekoli bhande bhadhamohibi na bhulu, eheeki iso. ¹⁴ Kumu wa gbata amaoka mokando mua, yaamogbutidja molema, pe yaakoo bho todhaani na mokando. ¹⁵ Mbulunga bhaitomba fanga, pe bhaitosa mitindo miabhanyea ibho. ¹⁶ Bhayekoli djomi na omoti bhaikee a Galileya, a mokodhi mwa bhaningidja Yesu. ¹⁷ Bhamoeneke, bhaigbueme midhi libhoso dhande. Kasi bhadii bhaandimakati. ¹⁸ Yesu aiyadinda pe aibuka naabhu: Bhanyeini bhokumu bhosusu a dhombe pe a ndebha. ¹⁹ Keeni, tobhedjani mamgando masusu bhayekoli bhambi, bhabatisani na liina dha Yaa, dha Wana pe dha Molimo Mosatu, ²⁰ pe bukani naabhu bhabhanee ngando susu djiidjeedjini mbi. Pe mbi, nike naanu masu masusu tee suka ya mongali.