¹ Mabhila makadjonge saase, pe mibukiano mikadjonge saase tei yaanu? Ye a posa djanu bhehu djikaane tei ya bhikenge bhanu bha makumu. ² Okaluleni, pe toodhiseni. Odhini bhayowedhi pe na bholuli, pe okokitini bhodhisa eyano; okeni mibukiano pe na mabhila, pe otadhisani, akpuli bho toongeni. ³ Okaongeni, pe toodhiseni, akpuli bho okaongeni bhobhehu, akpulia bhokokedja posa djanu bhehu. ⁴ Bhagendja bha ekodho! Odjeitini bho bhopala mongali eke bholona Akongo? Oobho opali bhodhaa bola wa mongali akaatobhedja monguna wa Akongo. ⁵ Okaingani bho likomi dhikabuke edjegi? Akongo akapale molimo mwa isa iyo tei yaasu na bholuli? ⁶ Akanyee grasya yaanyoo bhopele; maina nga likomi dhiibuka, "Akongo akaemeane na bhagendja bha lolendo, kasi akakomee bhagendja bhakaatitidje ngolu." ⁷ Ndimani Akongo; emeanani na mondili, pe aatia bhohadhi naanu. ⁸ Adindani padhi na Akongo, pe iyo aatinda padhi naanu. Sosani mabho manu, bhasumuki; petalani milema manu , babhendja bha milema migbaanake. ⁹ Okani iwa ya bhodjanga bhanu; dhaani a eduma pe na mbisodhi; bhoseke bhanu bhaahombee eduma, mosepi manu iwa. ¹⁰ Atitidjani liboso dha Akongo, pe aadjoodjeni. ¹¹ Tobukeni bhobhehu ino na ino, bhana bha ima. Oobho okabuke bhobhehu na maanyango, too akasambedje maanyango, akabuka bhobhehu na mobeko pe akasambedja mobeko. Nzokande omasambedja mobeko, otikamoisa a misala, kasi waatobhedji zuzi wa mobeko. ¹² Omoti odhi akomedhi mobeko pe zuzi, oobho odhi na makoki ma bhoheledja pe bhoowa; kasi we, oke nda bho asambedja aminawe? ¹³ Naanu ndjebhondjebho bhakabuke, "Bheendee too kombi yaakee a gbata songolo, yaanyodjoo eyanga mobimba hoo, yaaengedje pe yaadhisa faanga." ¹⁴ Ino bhabho bhadjeiti mubho moatobha kombi, bhoo, ehele yaanu eyomande? Okeni mohudhi mokapundje akpulia maa poko bhotsedhu pe lingongo monyuwee. ¹⁵ Ebongi, naanu bhobuka, "Akongo amapala, yaahela, pe yaakoo bho na bho." ¹⁶ Kasi ndjebhondjebho waahekedjkani na maleeni manu ma lolendo. Bhoahekedja bhoa eke bhobhehu. ¹⁷ Oobho odjei bhokoo bhopele, pe teabhokoo, akoi lisumu.