¹ Naanu ndjebhondjebho, bhazwi! Eyani pe anyokoloni akpulia ngando bhehu djiadho yeani ino. ² Misolo manu mopoi, pe nyelinyeli bhaaki bhisindje bhanu. ³ Wolo waanu pe palata yaanu djigagi; pe bhogaga bha ina bhoadhaa elembo akpuli yaanu, pe bhoaakaa mili manu ndje moosa. Olokoini misala a masu ma suka. ⁴ Seleni, lifuti dha basali bhaaloma a bhiyanga bhanu,pe bhaatungisa ino dhikapama, pe pama dja bhasali djitobhi tee a bhiyokedhi bha Akongo meene mongali. ⁵ Ohelini a ndebha tei ya sepi pe ya bhogumake, ogeledjini milema manu ndje busa bha lisase. ⁶ Otitidjini, oowini moto sembo ye bho aayemeeni. ⁷ Nyangani milema, bhaana bha ima, tee yaahula Kumu. Seleni, ayonedhi wa eyanga akaambe embuma ya motuya ya ndebha, aningidjaka bhonyanga molema pambe yaayu, tee yaadhisa iyo koma bha ebandeli pe bhasuka. ⁸ Ino pe, nyangani milema, gbutidjani milema manu, lihula dha Kumu dhike padhi. ⁹ Toanyeni ino na ino, bhaana bha ima, bhoo tebhaasambedjeni. Seleni, zuzi ake a modhipe. ¹⁰ Bhaana bha ima, tombani ndje ndaki ya bhonyanga molema tei ya minyoko baprofeta bhabho bhaabuka a dhiina dha Kumu. ¹¹ Ekabuka masepi ma bhabho bhaanyanga molema. Waaokani mosambo ma bhonyango molema ma Yobo, pe waaeneni lifuta dhiamonyea Kumu, bhoo Kumu aaluma bholimbisi masumu pe bhookeea iwa. ¹² Liboso dha ngando susu, bhaana bha ima, tolapeni, edhaa na dhiko, na ndebha, nako na bhokopo bhodii. Kasi iyo waanu adhaa iyo, pe kati waanu adhaa kati, bhoo tookwaani a esambiseli ¹³ Omoti naanu amadhaa na epeko? Aabhele. Amadha na mosepi? Aembe bhiyombo. ¹⁴ Omoti naanu amadhaa na epeko? Abhee bhasusu bha Ekalo, bhasuku bhaabhele akpuli yaande, bhamosinge monye na dhiina dha Kumu. ¹⁵ Libondeli dha bhondima dhiaheledja mogendja wa epeko, pe Kumu aamodjoodje; ingako akooki masumu, bhaamolimbisa. ¹⁶ Tubelani masumu manu ino na ino, pe abhelani bhamatiakpulia bhadii, bhoo oheleni. Libondeli dha mogendja sembo dhidhi na ngudhu enene. ¹⁷ Elia aadhaa mogendja oko ndje iso. Aabhelana bhoembe te bhoo koma teayoo, pe koma aayooti bhiyanga bhisato na songe motoba. ¹⁸ Lingongo aiyabhila koto, pe dhombe dhiinyea koma, pe ndebha djiibhota mbuma. ¹⁹ Bhaana bha ima, omoti naanu amabhunga bhohadhi na bosembo, pe odii amamohulidja a ndjia, ²⁰ adjee bho oobho waaifa mosumuki a ndjia yaabhungaka iyo aaheledja molimo momoti a yogo pe aabombo masumu manene.