¹ Bhana bha ima, tei yaanu teedha na bhagendja bhanene bhanyeake na elomo ya bhoteya, bhoo odjeni bho bhaesambedja menemene. ² Iso bhasusu ekatsakaa bhoko na bhokopo. Oobho tootsakaa na buka, ake mogendja mongemeneke, oke na makoki ma bhonyanga mokuku ma nde mobimba na mondiki. ³ Emanyanga monoko ma punda na mondiki bho bhaetose, ekasombedje pe mokuku mabhu mobimba. ⁴ Seleni masuwa, nako madhaa maneemanee pe makadinde mipepe makasi makasombe na maa ebhonda bhotsedhu, ndje ekapale asombedhi wana. ⁵ Oko bhoa, edhadha edhi maa ekenge bhotsedhu, pe ekahekedje na nganda neenee. Seleni ndje moosa bhotsedhu ekaongodje imo mokonda monene. ⁶ Edhadha pe edhi mwosa; eke mongali ma dhikakala. Edhadha edhi emoti ya bhikenge bha su, ekatobhedje mokuku mobimba mbindo, ekaongodje ehele yaasu, akpuli bho lifelo dhikaeyongodje. ⁷ Makopo masusu ma tito pe ma mbudhu, ma ndjo pe ma tito bha dhua, mogendja akamabhokoo. ⁸ Kasi edhadha, moto nako omoti teyaebhokoo; eke bhobhehu bhubho tebhohone ibho bhobhapamea; bhoaluma ndjongo ya yogo. ⁹ Ekapamboo Kumu Sangwasu naayu, pe naayu ekabele bhagendja bhaakoo ibho na esii ya Akongo. ¹⁰ Pamboo na mobele djikapundje a monoko momoti. Bhana bha ima, moedhaa bhoa. ¹¹ Mongongo mokaife a esoa emoti dhua ya bhode pe dhua ya saya? ¹² Mole ma mapa, bhana bha ima, mokabhote mbuma dja vino, too mole ma vino mbuma dja mapa? Mongongo momoti temoife dhua ya mokwa pe dhua ya bhode. ¹³ Nda tei yaanu ake na ndata pe na agbonda? Aningidje misala ma nde na ehele epele ya bhopolo bha ndata. ¹⁴ Kasi omadhaani na bholuli bha saya pe na molimo ma bhobhukiana a molema manu, toahekedjeni pe todhukeeni bhosembo likuta. ¹⁵ Ndata ena etike eebhe edjongi dhiko; kasi eke ya mongali, ya mulu, ya mondili. ¹⁶ Bhoo oho edhi bholuli bha saya pe molimo ma mobukiano, eke bhokobhokobho pe ngando bhehu dja bhokopo na bhokopo. ¹⁷ Ndata ya dhiko edhi mee liboso peto, lingongo ekaise kimia, bhodee, ekahulidje bhoyokani, yaaluma iwa pe mbuma pele, ye bhokwaa pamba emoti, milema mibhale te. ¹⁸ Embuma ya soolo bhaeyoni akimia na bhabho bhakanukane kimia.