¹ Bhana bha ima, yeeni bhondima bhanu pamba ya Kumu waasu wa heku Yesu Klistu tebhodjue ngando dja bhagendja. ² Ebuke mee bho mogendja omoti aiwaa dhipete dha wolo pe esindje ya motiyo aingia a likita dhanu, pe mobola aiwaa esindja ebheebhe. ³ Omahombedjani miiso manu pamba ya oobho owai esindje ya motiyo, obukeni naande" We, dhaa aabho a siyo ya lokumu! " pe obukeni na mobola, " We, emaa haa! " too "Dhaa a ndebha a mako mambi," ⁴ ye bhoisa bhokeseni tei yaanu bhwa, pe otikasembedjani bhodjuana na maleeni mabhehu? ⁵ Okani, bhanima bhakapale mbi: Akongo aahooti bhabola a miiso ma mongali, bho bhadhaa bhazwi atei ya bhondima, pe bhasangoli dhibula dha bhokumu bhoabhunia iyo bhabho bhakamopale? ⁶ pe ino, wenekeni mobola pamba! Ye bhazui bhakaanyokoleni, pe bhakeeke naanu a siyo dja bhokese ngbanga? ⁷ Ye ibho bhakabhehedje dhiina dhibhongu dhiawaa ino? ⁸ Omangemedjeni mobeko ma Kumu, ndje ebuki Likomi: Waapala aminawe we ndje we meene, okakomi bhopele. ⁹ Kasi omadjuani ngando dja bhagendja, okakooni lisumu, mobeko moapeyani ndje bhagendja bhakoi bhobhehu. ¹⁰ Bhoo oobho okatose mobeko, kasi akoo lisumu na ndjia emoti, atobhi mobhehu na mobeko mosusu. ¹¹ Oobho waabuka: Otapala wadhi wa amina we, aabuka pe: Otaowa, Nzoknde, opaliti wadhi wa amina we, kasi oowe, obhuki mobeko. ¹² Bukani pe kooni ndje bhagendja bhaasombedja ibho na mobeko ma somi. ¹³ Bhoo ngbanga eti na iwa ya oobho oningidjiti iwa. Iwa ebii ngbanga. ¹⁴ Bhana bha ima, moto amabuka bho ake na bhondima yaamokoo ye, adhaiti na misala? Bhondima bhokoki bhomoheledja? ¹⁵ Maangwasu moomi too wadhi bhamadhaa mbundu pe bhadjange dhia dhasu na dhasu. ¹⁶ Pe omoti tei yaanu abuke naabhu, "Keeni na boboto, ayangani a mosaa pe golani." Bhobhanyea eebhe esengeli bhobhasunga a mokukute, eke na litomba nde? ¹⁷ Imo bhoa na bhondima: bhobhotiti mbuma, bhogwi ibho bheene. ¹⁸ Kasi odii aabuka, "We, oke na bhondima, pe mbi, nike na misala." Ningidjani bhondima bhawe bhoti na misala,pe mbi, nianingidja bhondima na misala ma mbi. ¹⁹ Ondimi bho Akongo adhi omoti, okoi bhopele. Bhaamembo pe bhakandima bhoa, pe bhahalaka. ²⁰ Opali bho odjee, we waadjanga mayele, bho bhondima bhoadjanga misala bhoti na tina? ²¹ Sangwasu Abalama aapundjati moto sembo a misala mande, poko yaakabha iyo waana waande Izaka a lotale? ²² Okaene bhopele bho bhondima bha nde bhoalomaka siyo emoti na misala ma nde, pe na misala bhondima bha nde bhoitobha peto. ²³ Haa bhoa mubho moabhuka likomi moingemene, "Abalama aandima Akongo, pe mokando mua moimotobhedja bhosembo," pe bhaamobhea bola wa Akongo. ²⁴ Weenini bho mogendja atobhi sembo a misala ma nde, ye oko akpulia bhondima mbuki. ²⁵ Rahabu wadhi ndumba aatobhati sembo oko bhoa a misala ma nde, poko yaadjisa iyo bhabho bhaalinda ibho pe aibhanyodjoo na ndjia edii? ²⁶ Mokuku moti na molimo modhi mogwake, oko bhoa bhondima bhoti na misala bhodhi bhogwake.