¹ Inako okasuswani na Klisto, dhukana dhoma dha dhiko sase Klisto adhai pamba ya dhibhaami dha Akongo. ² Anyeakani na ngando dja dhiko, ye dja mongayi. ³ Akulia bho agwini ehele yanu ebhaneani na Klisto ateyi ya Akongo. ⁴ Poko Klisto ehele yanu awenene, ino pe wanene nande a kembo ena ⁵ Owani ngando dja ndebha a mokuku, dhibhadja, nyali, bhiposa bhibhehu, maleni, bhopala bha falanga, eke dhisambo dha bhikeko. ⁶ Na ngando djia gbeku ya Akongo ekadho dhiko dha ngbongi bhatombokoke, ⁷ na endenge ebhe ya sombaka ino, na bhohela ateyi ya mabehu. ⁸ Na djebho kiani dhoma dhisusu na gbeku, na bhosoni, na ekadha, mogedhe, na buka dja mapepe djikapaino bhodjifa a minoko. ⁹ To ayiseni, bhabho na bhadina, ino opudjini ateyi ya mogendja wana misaa mande, ¹⁰ owaini mogedja monyiye obho wanedja ateyi ya bhodjea, nde esii ya obho wa koo. ¹¹ Obho moyuda to moela atike, ekese dhiombe to obho akesiti, wa bhoome to mopele te, mobhudhi to kati mobhudhi Klisto ake akulia bhasusu. ¹² Na mena dje bhabho bha hoo Akongo, bhasantu pe ngiana dhaani na iwa, na bhobhongu, bhoatitidja na bhopolo, na molema mabhogoo. ¹³ Waneni a milema obho na wahoo inako omoti akadhaa na bha eyana pambea odina, limbisanani ngando susu na endenge Klisto alimbisa ino pe limbisanani. ¹⁴ Kasi na suka ya susu dhaani na dhipalano imo monyango ma bhobhongo. ¹⁵ Pe na bhongo bha Klisto wa bheani okooni mokuku momoti mokodje milema manu pe odhakeni matondi. ¹⁶ Ye buka ya Klisto edha ateyi yaanuna bhonene; na bhoanedjani, na bhileho bhabho na bhabho na ndata, adjia ya bhiombo, bhiombo bhihuliake, na eyombo ya molimo, na bhomohekedja Akongo a milema na bholeneke ngolu. ¹⁷ Ina ko okakooko mokando nde ekadha na buka to misaa kookoni susu na dhina dha Yesu Kumu na bhoneaka mokako ma ngolu na Akongo Yaa. ¹⁸ Bhadhi atitidjani pambea bhaami bhanu, dje ebhongi ateyi ya Kumu. ¹⁹ Bhaami pala bhadhi bhanu obhakomeni bhobhehu. ²⁰ Ngbongi tosani bhaboti, bho eke bhopele ateyi ya Kumu. ²¹ Bhayaa onyokooni ngbongi bhobhaiyembe mokuku. ²² Bhabhudi tosani na ngando susu na makumu manu, ye oko a miso mabhu dje bhoawenedje na bhagedja, kasi na bhoatitidja bha molema ateyi ya bhoo bha Kumu. ²³ Susu djibho djiakoonoko oko akulia Kumu ye akulia bhagedja, ²⁴ djeani wa djiasani ekima dje embano ya bhokomee Klisto Kumu. ²⁵ Obho wakoona elongosa, adhisa elongosa bho iyo tahoo mogedja.