¹ Nígbàtí Ọ̀dọ́-Àgùtàn náà ṣí èdìdì keje náà, gbogbo ọ̀run pa rọ́rọ́ fún bíi ọgbọ̀n ìṣẹ́jú. ² Lẹ́yìn náà ni mo rí àwọn áńgẹ́lì méje tí wọ́n dúró níwájú Ọlọ́run, a sì fún wọn ní àwọn fèèrè méje. ³ Áńgẹ́lì míràn sì wá, pẹ̀lú àwokòtò tùràrí wúrà lọ́wọ́ ọ rẹ̀, ó sì dúró níwájú pẹpẹ tùràrí. A sì fún un ní tùràrì púpọ̀ kí ó le fi rúbọ pẹ̀lú àdúrà gbogbo àwọn onígbàgbọ́ níwájú ìtẹ́ tùràrí wúrà náà. ⁴ Èéfín tùràrí náà, pẹ̀lú àwọn àdúrà àwọn onígbàgbọ́, sì gòkè tọ Ọlọ́run lọ láti ọwọ́ ańgẹ́lí náà. ⁵ Áńgẹ́lì náà sì gbé àwokòtò tùràrí náà ó sì fi iná orí pẹpẹ kún inú rẹ̀. Lẹ́yìn náà ló lẹ̀ ẹ́ mọ́lẹ̀, ó sì fọ́nká pẹ̀lú ààrá, ìrọ́kẹ̀kẹ̀, ìtànsán mọ̀nàmọ́ná àti ilẹ̀-mímì. ⁶ Àwọn áńgẹ́lì méje tí wọ́n ní fèèrè méje lọ́wọ́ náà ti múra tán láti fọn wọ́n. ⁷ Ańgẹ́lì àkọ́kọ́ fọn fèèrè rẹ̀, òjò dídì àti iná tí ó dàpọ̀ mọ ẹ̀jẹ̀ sì bo ilẹ̀ tóbẹ̀ tí ìdá kan nínú mẹ́ta ilẹ̀, àwọn igi àti gbogbo koríko tútù fi jóná dànù. ⁸ Áńgẹ́lì kejì fọn fèèrè rẹ̀, a sì sọ nǹkan tí ó dàbi òkè ńlá tí ó ń jó fún iná sínú òkun. Ìdá kan nínú mẹ́ta òkun náà sì di ẹ̀jẹ̀, ⁹ idá kan nínú mẹ́ta àwọn ẹ̀dá-alààyè inú òkun náà sì kú, bẹ́ẹ̀ni ìdá kan nínú mẹ́ta àwọn ọkọ̀ ojú omi sì bàjẹ́. ¹⁰ Áńgẹ́lì kẹta fọn fèèrè rẹ̀, ìràwọ̀ ńlá kan tí ó ń jò bí iná sì já láti ojú òfurufú sí inú ìdá kan nínú mẹ́ta àwọn odo àti àwọn orísun omi. ¹¹ Iwọ sì ni orúkọ ìràwọ̀ náà. Ìdá kan nínú mẹ́ta àwọn omi náà sì di kíkorò bíi iwọ, ọ̀pọ̀lọpọ̀ ènìyàn sì kú láti ipasẹ̀ àwọn omi tí ó di kíkorò náà. ¹² Áńgẹ́lì kẹ̀rin sì fọn feèrè rẹ̀, a sì kọlu ìdá kan nínú mẹ́ta òrùn, òsùpá àti àwọn ìràwọ̀. Fún ìdí èyi, ìdá kan nínú mẹ́ta wọn ṣókùnkùn; kò sì sí ìmọ́lẹ̀ ní ìdá kan nínú mẹ́ta ojú-ọjọ́ àti ìdá kan nínú mẹ́ta alẹ́. ¹³ Mo wò, mo sì rí ẹyẹ idì kan tí ó ń fò ní agbede méjì òfurufú, tí ó sì ń kígbe ní ohùn rara pé, "Ègbé, ègbé, ègbé, ni fún àwọn tí ó ń gbé inú ayé nítorí àwọn ohùn ìpè yókù tí àwọn áńgẹ́lì mẹ́ta yókù fẹ́ fọn."