¹ Lẹ́yìn àwọn ǹ kan wọ̀nyí mo rí ańgélì kan sọ̀kalẹ̀ láti ọ̀run. Ó ní àṣẹ ń lá, ògo rẹ̀ sì tan ìmọ́lẹ̀ yí ayé ká. ² Ó kígbe ní ohùn rara, wípé, "Óṣubú, Bábílónì ńlá ṣubú! Ó ti di ibùgbé fún àwọn ẹ̀mí òkùnkùn, ibi ìsádi fún àwọn ẹ̀mí àìmọ́ gbogbo, ibi ìsádi fún gbogbo ẹyẹ àìmọ́ àti ìríra. ³ Nítorí gbogbo orílẹ̀ èdè ti mu ọtí i wáìnì ìfẹ́kúfẹ̀ẹ́ rẹ̀. Àwọn ọba ayé ti ṣe ìfẹ́kúfẹ̀´ pẹ̀lú u rẹ̀. Àwọn oníṣòwò ayé ti di ọlọ́rọ̀ nípasẹ̀ agbára ìgbé ayé ìfẹ́kúfẹ̀ẹ́ rẹ̀." ⁴ Nígbà náà ni mo gbọ́ ohùn kan láti ọ̀run wí pé, "Jáde kúrò nínù rẹ̀, ẹ̀yin ènìyàn mi, kí ẹ má baà pín nínú ẹ̀ṣẹ̀ rẹ̀, kí ẹ̀yin kí ó sì má ṣe ní ìpín nínú àjàkálẹ̀ àrùn rẹ̀. ⁵ Ẹ̀ṣẹ̀ ẹ rẹ̀ ti ga dé ọ̀run, Olúwa sì ti rańtí iṣẹ́ ibi rẹ̀ gbogbo. ⁶ San án padà fún un bí ó ti ṣe san án padà fún àwọn ẹlòmíràn, san án padà fún un ní ìlọ́po méjì ohun tí ó ti ṣe; aago tí ó ti pò pọ̀, pòó ní ìlọ́po méjì fún un. ⁷ Bí ó ti ṣe ara rẹ̀ lógo tí ó sì ń gbé nínú ọrọ̀ púpọ̀, fi ìyà púpọ̀ jẹ ẹ́ àti ìwúwo ọkàn. Nítorí ó wí ní ọkàn rẹ̀ pé, 'Mo jókòó bí Ayaba; è mi kìí ṣe opó, bẹ́ẹ̀ ni è mi kì yóò rí ọ̀fọ̀.' ⁸ Nítorí náà, ní ọjọ́ kan ni àjàkálẹ̀ àrùn rẹ̀ yóò dé: ikú, ọ̀fọ̀, àti ìyàn. Iná yóò jẹ ẹ́ run, nítorí alágbára ni Olúwa Ọlọ́run, òn sì ni onídàjọ́ọ́ rẹ̀." ⁹ Àwọn ọba ayé tí ó ṣe ìfẹ́kúfẹ̀é pẹ̀lú u rẹ̀ tí o sì ṣi ìwà hù pẹ̀lú u rẹ̀ yóò sọkún, wọn yóò sì pohùn réré ẹkún lórí i rẹ̀ nígbà tí wọ́n bá rí èéfín sísun rẹ̀. ¹⁰ Wọn yóò dúró ní òkèèrè jíjìn réré, ìjìyà a rẹ̀ bà wọ́n lẹ́rù, wípé, "Ègbé, ègbé sí ìlú ńlá náà, Bábílónì, ìlú alágbára náà! Nítorí ní wákàtí kan ṣoṣo ìjìyà a rẹ dé." ¹¹ Àwọn oníṣòwò ayé sọkún, wọ́n sì ṣọ̀fọ̀ fún un, nígbà tí ẹnikẹ́ni kò ra ọjà a rẹ̀ mọ. ¹² Ọjà wúrà, fàdákà, òkúta iyebíye, píálì, aṣọ ọ̀gbọ̀ dáradára, elése àlùkò, sílíkì, aṣọ pupa, oríṣiríṣi igi olóòórùn dídùn, gbogbo ohun èlò eyín erin, ohun èlò tí a fi igi olówó iyebíye ṣe, idẹ, irin, òkúta mábù, ¹³ Sínámónì, ata olóòórùn dídùn, tùrààrí oríṣiríṣi, ọtí wáìnì, òróró, ìyẹ̀fun kíkúnná, ọkà, mààlúù àti àgùntàn, àwọn ẹṣin àti kẹ̀kẹ́ ogun, àti ẹrú àti àwọn ènìyàn. ¹⁴ Èso tí ó pòǹgbẹ fún pẹ̀lú agbára a rẹ̀ ti bọ́ lọ́wọ́ ọ rẹ̀. Gbogbo ọrọ̀ àti ọlá a rẹ̀ ti parẹ́, a kì yóò tún rí wọn mọ́. ¹⁵ Àwọn oníṣòwò ọjà wọ̀nyí tí ó ti di ọlọ́rọ̀ nípasẹ̀ rẹ̀ dúró takété sí i lókèèrè nítorí ìbẹ̀rù ìpọ́njú rẹ̀, ẹkún àti ìpohùn réré ẹkún rẹ̀. ¹⁶ Wọn yóò wípé, "Ègbé, ègbé sí ìlú ńlá náà tí ó wọ aṣọ ọ̀gbọ̀ dáradára, elése àlùkò, aṣọ pupa, tí a fi wúrà ṣe lẹ́ṣọ̀ọ́, ẹ̀ṣọ́ olówó iyebíye, àti píálì! ¹⁷ Ní wákàtí kan, gbogbo ọrọ̀ náà ti di ègbé. "Gbogbo ọ̀gá ọkọ̀ ojú omi, àwọn arìnrìnàjò lójú omi, àwọn atukọ́, àti àwọn tí ó ń ṣòwò lójú omi, dúró lókèèrè réré. ¹⁸ Wọ́n kígbe sókè nígbàtí wọ́n rí èéfín sísun rẹ̀. Wọ́n wípé, "Ìlú wo ló dàbí ìlú ń lá náà?" ¹⁹ Wọ́n da erùpẹ̀ sí orí ara wọn, wọ́n kígbe sókè, wọ́n ń sọkún, wọ́n sì ń ṣọ̀fọ̀, "Ègbé, ègbé, sí ìlú náà nípasẹ̀ ẹni ti àwọn tí ó ní ọkọ̀ ojú omi ti di olówó nípa ọrọ̀ ọ rẹ̀. Nítorí pé, ní wákàtí kan a sì paárun." ²⁰ "Yọ̀ lórí i rẹ̀, ọ̀run, ẹ̀yin onígbàgbọ́, ẹ̀yin àpóstélì, àti ẹ̀yin wòlíì, nítorí Ọlọ́run tí mú ìdájọ́ yín wá sórí i rẹ̀!" ²¹ Ańgẹ́lì ńlá kan sì gbé òkúta ńlá kan bí ọlọ ńlá, ó sọ ọ́ sínú òkun wípé, "Bẹ́ẹ̀ gẹ́gẹ́, Bábílónì, ìlú ńlá náà, ni a ó fi ipá fàá lulẹ̀, a kì yóò sì rí i mọ́. ²² Ìró àwọn tí ń lu Háàpù, àwọn oní fèèrè, àwọn akọrin, àwọn tí ó ń fun ohùn ìpè, àwọn tí ó ń fun fèèrè ni a kì yóò gbúròó nínù rẹ mọ́. A kì yóò rí oníṣẹ́ ọnà kankan nínú ù rẹ. A kì yóò gbọ́ ìró ọlọ nínú rẹ mọ́. ²³ Ìmọ́lẹ̀ àtùpà kì yóò tàn nínú u rẹ̀ mọ́. Ohùn ọkọ ìyàwò àti ti ìyàwó ni a kì yóò gbọ́ nínú u rẹ̀ mọ́, nítorí àwọn oníṣòwò rẹ ni àwọn ọmọ aládé ayé, a sì tan àwọn orílẹ̀ èdè jẹ nípa ìṣe oṣó ò rẹ. ²⁴ Nínú rẹ̀ ni a gbé rí ẹ̀jẹ̀ àwọn Wòlíì àti àwọn onígbàgbọ́, àti ẹ̀jẹ̀ gbogbo àwọn tí a ti pa ní ayé.