¹ Nígbàtí mo tọ̀ yín wá, ará, èmi kò wá pẹ̀lú ọ̀rọ̀ dídùn tàbí ọgbọ́n orí nígbàtí mo kéde ìjìnlẹ̀ òtítọ́ Ọlọ́run fún un yín. ² Nítorípé èmi pinnu wípé èmi kò ní mọ ohunkóhun nígbàtí mo wà láàrin yín bíkòṣe Jésù Krístì, Ẹnití a kàn mọ àgbélèbú. ³ Èmi wà pẹ̀lù yín nínú àìlera, nínú ẹ̀rù àti nínú ìwárìrì púpọ̀. ⁴ Ọ̀rọ̀ mi àti ìkéde mi kìí ṣe pẹ̀lu ọgbọ́n ènìyàn tí a fi ń yí ni lọ́kàn padà. Bíkòṣe nípa ìfihàn ti Ẹ̀mí ati agbára. ⁵ Kí ìgbàgbọ́ yín mába dúró nínú ọgbọ́n ènìyàn, sùgbọ́n nínú agbára Ọlọ́run. ⁶ Nìsinsìnyí àwa ń sọ̀rọ̀ ọgbọ́n láàrin àwọn tí ó dàgbà, sùgbọ́n kìí ṣe ọgbọ́n ayé yìí, tàbí ti alásẹ ayé yìí, tí yóò kọjá lọ. ⁷ Ṣùgboń àwa ń sọ̀rọ̀ ọgbọ́n Ọlọ́run nínú ìjìnlẹ̀ òtítọ́, ìjìnlẹ̀ ọgbọ́n tí Ọlọ́run ti pinu tẹ́lẹ̀ saájú ìpilẹ̀ṣẹ̀ ayé fún ìṣelógo wa. ⁸ Kò sí ọ̀kan nínú àwọn aláṣẹ ayé yìí tí ó mọ ọgbọ́n yìí, nítorípé tí wọ́n bá ní òye yìí ní àkókò náà, wọn kì bá tí kan Olúwa ògo mọ́ àgbélèbú. ⁹ Ṣùgbón gẹ́gẹ́ bí a ti kọ ọ́ pé, "Àwọn ohun tí ojú kò tíì rí, tí etí kò tíì gbọ́, tí ọkàn kankan kò tíì rò, àwọn ohun tí Ọlọ́run ti pèsè sílẹ̀ fún àwọn tó fẹ́ràn Rẹ." ¹⁰ Ìwọ̀nyí ni àwọn ohun tí Ọlọ́run ti fi hàn nìpasẹ̀ Ẹ̀mí Rẹ̀. Nítorípé Ẹ̀mí a má a wadi ohun gbogbo, àní àwọn ohun ìjìnlẹ ti Ọlọ́run. ¹¹ Nítorí tani ó mọ àwọn èrò enìkan bíkòṣe ẹ̀mí ẹni náà nínú rẹ̀? Bákannáà enìkan kò mọ àwọn ohun ìjìnlẹ Ọlọ́run bíkòse Ẹ̀mí Ọlọ́run. ¹² Ṣùgbọ́n àwa kò gba ẹ̀mí ti ayé, bíkòṣe Ẹ̀mí tí ó wà làti ọ̀dọ̀ Ọlọ́run, kí àwa kí ó lè mọ àwọn ohun tí Ọlọ́run fifún wa lọ́fẹ̀ẹ́ ¹³ Àwa ńsọ àwọn ǹkan wọ̀nyí ni ọ̀rọ̀ ti ọgbọ́n ènìyàn kò lè kọ́ni, ṣùgbọ́n tí Ẹ̀mí ńkọni. Ẹ̀mí a má túmọ̀ àwọn ọ̀rọ̀ ti ẹ̀mí pẹ̀lu ọgbọ́n ti ẹ̀mí. ¹⁴ Ènìyàn nípa ti ara kò gba àwọn ohun ti o jẹ́ ti Èmí Ọlọ́run, nítorípé wèrè ni wọ́n jásí fún un. Òun kò lè mọ̀ wọn nítorípé nípa ẹ̀mí ni a fi ń wádi wọn. ¹⁵ Ẹnití ó jẹ́ ẹni ẹ̀mí ń wádi ohun gbogbo, ṣùgbọ́n òun kò wà lábẹ́ ìwádìí ẹnikẹ́ni. ¹⁶ Nítorí tani ó le mọ ọkàn Olúwa, ti yó fi ma kọ́ Ọ? "Ṣùgbọ́n àwa mọ ọkàn Krístì."