¹ И пхэндя́ ла́кэ Ноеми́нь ла́ки свикру́ха: «Чай мири́ хиба́ на ла́ва мэ тэродэ́ ту́кэ кай тэдживэ́с, со́б ту́кэ тэ явэ́л куч? ² И кана́, Воозо хиба́ нанэ́ амэ́нгэ пэ́скиро, — служанкэ́нса савэ́нса ту исы́с? Гэ́на, ёв дэ дая́ рат пирэкэдэ́л до анга́ро зёрно́. ³ Умо́рпэ и пома́кхпэ, ури́ пэ пэ́стэ ґо́жо и́дя пэ́скири, и джя до анга́ро. На сыка́впэ лэ́скэ, кэ дова́ сыр ёв на ха́ла и на пье́ла. ⁴ Сыр жэ ёв пасёла тэсовэ́, ту уджи́н лэ́ско штэ́то кай ёв пасёл, тэ́нче явэ́са откэрэ́са лэ́стэ до гэра́ и пасёса, а ёв пхэнэ́ла ту́кэ со тэкэрэ́». ⁵ Руфь тэ́нче пхэндя́ ла́кэ: «Саро́, со ту ракирэ́с, мэ кэра́ва». ⁶ Ёй ґия́ до анга́ро и кэрдя́ саро́ адя́кэ, сыр пхэндя́ ла́кэ свикру́ха. ⁷ И выхая́пэ Воо́зо и выпия́пэ и полоша́лыя лэ́скиро йило́. Ёв явья́ и пасия́ пэ кра́ё ски́рда дэ пхуса́. Ёй тихэ́с подґия́, откэрдя́ и пасия́ пашэ́ лэ́скирэ гэра́. ⁸ И исы́с: до паш рат здара́ндыя одова́ ману́ш и пирискирдя́пэ, и гэ́на дыкхэ́л, манушны́ пашлы́ лэ́стэ до гэра́. ⁹ И пучья́ ёв: «Кон ту?» И пхэндя́ ёй: «Мэ Руфь, тэри́ бутярны́. Откэ́р пэ́скиро васт пэ тэрья́тэ бутярня́тэ, пал одова́ кай ту пэ́скиро ма́нгэ — кай ман викинэ́са». ¹⁰ И пхэндя́ Ёв: «Бахталы ту Дэвлэ́стэр, мири́ чай! Куч, со кана́ ту кэрдя́н, хвэды́р первонэ́ моло́стыр, со ту кэрдя́н, пал одова́ кай ту на ґия́н пало́ тэрнэ́ндэ: ни па́лэ чорорэ́ндэ, ни па́лэ барвалэ́ндэ. ¹¹ А кана́, чай мири́, на́дарпэ: саро́ со ту пхэндя́н, мэ кэра́ва ту́кэ, пал одова́ кай джинэ́н сарэ́ мануша́ дэ кхэр миро́, со ту лачи́ манушны́. ¹² И кана́, чачё, со мэ ту́кэ пэ́скиро ману́ш саво́ тут выкинэ́ла, нэ адя́кэ ж исы́н ещё ману́ш пэ́скиро саво́ тут может тэ выкинэ́л, ту́кэ пашыды́р ма́ндыр. ¹³ Ра́ткир адая́ рат ада́й, а утро́са: коли́ ёв викинэ́ла тут, то куч, мэк выкинэ́л, а коли́ на закамэ́ла тэ выкинэ́ тут, то мэ выкина́ва тут. Джидо́ Дэвэ́л! Сов кэ у́тро». ¹⁴ Ёй сутя́ до лэ́скирэ гэра́ кэ у́тро и вштыя́ кэ дова́, сыр ману́ш мог тэ дыкхэ́л авирэ́с манушэ́с. И пхэндя́ ёв: «Мэк на джинэ́н, со явэ́лас ада́ манушны́ до анга́ро». ¹⁵ И пхэндя́ ёв: «Подэ́ упратуны́ и́дя, сави́ пэ ту́тэ, и пори́кир ла». Ёй рикирэ́лас ла, а ёв откэдыя́ шов ме́ры зёрно, чудя́ пэ ла́тэ и ґия́ дэ фо́ро. ¹⁶ И явья́ ёй кэ пэ́скири свикру́ха. И доя́ пхэндя́: «Кон ту мири́ чай?» И роспхэндя́ ёй ла́кэ пал саро́, со кэрдя́ ла́кэ одова́ ману́ш. ¹⁷ И пхэндя́: «Адалэ́ шов ме́ры зёрно ёв дыя ма́нгэ, пал одова́ со ёв пхэндя́: «На джя́ би нисо́ско кэ пэ́скири свикру́ха». ¹⁸ И пхэндя́ ёй: «Побэ́ш чай мири́, по́ки на уджинэ́са, со явэ́ла дурэды́р. Пал одова́ кай адава́ ману́ш на улэ́лапэ, сыр ёв накэрэ́ла адава́ саро́ дадэвэ́с».