¹ Kanaafuu, amma iyyuu kakuun boqonnaa isaatti galuu sun waan dhaabbatee jiruuf, kottaa ni sodaannaa, akka isin keessaa namni tokko illee kakuu sana irraa hin hir’annetti. ² Nuyis akkuma isaanii hoduu gammachiisaan sun nutti himameeraatii. Garuu ergaan sun warreen abboomaman waliin tokko hin ta’iniin hin fayyadne. ³ F Nuyi warreen amanne akkuma inni jedhe sanatti boqonnaa isaatti ni gallaatii, "Akkuman aarii koo keessatti kakadhetti, Isaan tasa boqonnaa kootti hin galan." Yoo inni kun ta’e iyyuu, hojiin isaa uumama biyya lafaa irraa kaasee raawwatameera. ⁴ Inni waa’ee guyyaa isa torbaffaa bakka ta’etti dubbateeraatii: ⁵ Ammas irra deebi’ee barreeffamuma kana keessatti akkana jedhe, "Waaqayyos guyyaa isa torbaffaatti hojiiwwan isaa irraa ni boqote." "Isaan tasumaa boqonnaa kootti hin galan." ⁶ Kanaafuu, boqonnaa sanatti galuun kan namoota muraasaa ta’ee hafa, warri dursee oduu gammachiisaan sun itti labsame sababii abboomamu dhabuu isaaniitiif itti hin galleetii. ⁷ Kanaafu Waaqayyo ammas guyyaa tokko beellameera, akkana jedhee isa waamuudhaan "Har’a," yommuu karaa Daawitiin dubbatetti jechoota dursee caqafamaniin: "Har’a yoo sagalee isaa dhageessan, yaada garaa keessanii hin jabeessinaa." ⁸ Iyyaasuun otuu boqonnaa isaaniif kennee jiraatee, Waaqayyo wa’ee guyyaa kan biraa hin dubbatu tureetii. ⁹ Kanaafuu Sanbanni kan biroon sabni Waaqayyoo akka itti boqotuuf ol kaa’ameef tokko ni jira. ¹⁰ Namni inni boqonnaa Waaqayyootti galu innis ofii isaatii hojiwwan isaa irraa ni boqotaatii, akkuma Waaqayyo hojiiwwan isaa irraa boqotetti. ¹¹ Kanaafuu boqonnaa sanatti galuudhaaf haa hawwinu, eenyu illee abboomamuu dhabuu isa akka warri sun qabaatanii turaniitti akka hin galleef. ¹² Dubbiin Waaqayyoo jiraataadhaa fi kan hojii irra jiruu dha haaduu qara lama qabu irra qaramaa aka ta’etti. Inni hanga lubbuudhaa fi hafuura, hiddaa fi ribuu addaan baasuttii fi yaadaa fi karoora yaada garaa namaa hanga hubatutti keessa gadi ni seenaatii. ¹³ Wanti uumame kan Waaqayyo duraa dhokachuu danda’u tokko illee hin jiru, garuu ija isa nuyi amanachuu qabnu fuul-duratti wanti marti qullaadhaa fi banamaa dha. ¹⁴ Kanaafuu, nuyi luba isa ol aanaa isa samiiwwan keesa darbe, Yesuus Kiristoos Ilma Waaqayyoo waan qabnuuf, kottaa amantii keenyatti haa jabaannuu. ¹⁵ Nuyi luba ol aanaa isa dadhabbii keenyatti garaa nuuf hin laafne hin qabnuutii. Qooda kanaa, isa akkuma keenya cubbuu irraa kan hafe waan maratti qorame qabna. ¹⁶ Egaa kottaa amantiidhaan gara teessoo ayyaanaa ni deemnaa, kan yeroo barbaachisaa ta’etti nu gargaaru araaraa fi ayyaana akka argannuuf.