¹ Kanaafuu nuyi wanneen dhageenye sanaaf xiyyeeffannaa guddaa kennuu qabna, isa irraa akka hin gorretti. ² Ergaan inni karaa ergamoota Waaqayyootiin dubbatamee ture amanamaa yoo ta’eef, irra daddarbaanii fi abboomamuu dhabuun inni kam iyyuu kafaltii irra deebii fudhata, ³ nuyi egaa yoo fayyina isa gudda sana tuffanne, akkamittiin of oolchina ree? Fayyinni kun isa jalqaba irratti Gooftaadhaan labsamee booda immoo warra isa dhaga’een nuuf mirkanaa’ee dha. ⁴ Yeruma tokkichatti Waaqayyos mallattoodhaan, dinqiiwwanii fi raajiiwwan adda addaatiin, akkasumas kennaawwan Hafuura Qulqulluu akka fedha isaatiitti namootaaf kennuudhaan ni dhugoomse. ⁵ Addunyaa isa nuyi akka inni dhufuuf jiru waa’ee isaa dubbannu kana Waaqayyo ergamootatti hin laanneetii. ⁶ Garuu namni tokko bakka tokkotti akkana jechuudhaan mirkaneesseera, "Akka ati waa’ee isaa irratti yaadduuf namni maali? Yookaan ilmi namaa, akka ati isaaf yaadduuf? ⁷ Ati nama xiqqoodhuma ergamoota Waaqayyoo irra xiqqeessitee; Ati isa ulfinaa fi kabajaan isa gonfitee. F ⁸ Ati waan hundumaa miilla isaa jala galchiteefii." Waaqayyo waan mara kan inni kenne isattiitii. Waan kamiin iyyuu otuu isatti hin kenning hin hanbifne. Garuu nuyi amma wanti marti harka isaa keessa galee hin arginu. ⁹ Garuu nuyi isa Yesuus isa yeroo xiqoodhaaf ergamoota xiqqoo gad aanaa ta’ee ture sana argina, akka inni sababa dhiphinaa fi du’a isaatiif ulfinaa fi ulfinaa fi aangoodhaan gonfame sana, innis namoota maraaf ayyaana Waaqayyootiin du’a dhandhamate. ¹⁰ Kunis kan inni ta’e Waaqayyoof wanti marti isaaf karaa isaa jiraachuun qajeelaa waan t’eefi, ilmaan hedduus gara ulfinaatti fiduun. Isaaf fayyina namootaaf bu’ura isa ta’e Goofticha akka inni dhiphachuu isaatiin kana raawwatu gochuunis qajeelaa ture. ¹¹ Inni qulqulleessus ta’e warreen qulqulleeffaman lamaanuu burqaa tokkicha qabuutii. Kanaafuu inni obboloota jedhee isaan waamuudhaaf hin yeellane. ¹² Inni akkana jedha, "Ani maqaa kee obboloota kootti nan labsa, Ani yaa’ii keessaa waa’eekee nan faarfadha." ¹³ Ammas immoo, "Ani isa nan amanadha." Ammas immoo, "Ilaalaa, anii fi ijoolleen koo warreen Waaqayyo naaf kenne kunoo ti." ¹⁴ Kanaafuu, ijoolleen immoo foonii fi dhiiga waan hirmaataniif, innis wanneen kanneen haaluma kanaan hirmaateera, isa aangoo du’aa qabu sana akka balleessuu danda’uuf, innis immo seexana. ¹⁵ Kun kan inni ta’eefis warreen bara isanii guutuu soda du’aa jala jiraataa turan akka isaaniin biliisa baasuufi. ¹⁶ Dhugaatti inni kanneen inni gargaaru ergamoota Waaqayyoo mitiitii, garuu dhaloota Abraahaami malee ¹⁷ Kanaafuu inni waan maraan akka inni obboloota isaa fakkaatuuf barbaachisaa ta’ee argameera, akka inni waan maratti iyyuu Waaqayyoof isa araara qabuu fi luba ol anaa ta’uu akka inni danda’uufi, cubbuu namootaatiifis akka inni gatii baasuuf. ¹⁸ Yesuus ofii isaatiif dhipatee fi qoramee waan tureef, isaan warreen qoraman gargaaruudhaaf dandeetti qaba.