¹ Kanaafuu akkuma ijoollee jaalatamootti Waaqa kan fakkaattan ta'aa. ² Akkuma Kiristoos waan nu jaalateef nuuf jedhee mataa isaa kenna urgaa'aa fi aarsaa godhee Waaqayyotti ol kenne sana isinis jaalalaan jiraadhaa. ³ Garuu sagaagalummaa fi yookiin xuraawummaa gosa kamiittiyyuu yookiin sassatummaan gonkumaa jidduu keessanitti hin dhaga'amiiniyyuu, wantootni kun qulqulloota Waaqayyoo biratti kan hin barbaqchifnee dha. ⁴ Gallateeffachuu malee haasaan faayidaa hin qabne, fi dubbiin badaan fi qoosaan inni hin barbaachifne hundi jidduu keessan hinjiraatiin. ⁵ Namni sagaagalu yookin xuraa'umni, yookin sassatuun, sunis Waaqa tolfamoo kan waaqeffatan akka mootummaa Kiristoosii fi Waaqayyoo keessaa dhaala tokkollee hin qabne isinuu ni beektu. ⁶ Sababa waan kanaaf dallansuun Waaqayyoo warra hin ajajamne irratti dhufuuf namni kamiyyuu dubbii faayiidaa hin qabneen hin gowwoomiin. ⁷ Kanaafuu isaan waliin gonkumaa wal hin qunnamiinaa. ⁸ Isin kanaan dura dukkana turtanii, amma garuu Gooftaadhaan ifa dha. Kanaafuu akka ilmaan ifaatti deddebi'aa. ⁹ (Firiin ifaa gaarummaa, qajeelummaa fi dhugaa hunda keessatti argama,) ¹⁰ waan Gooftaa gammachisuu qoraatti mirkaneeffadhaa. ¹¹ Hojii dukkanaa homaa firii hin qabne saaxilaa malee waliin hin hirmaatiinaa. ¹² Waan isaan dhooksaatti godhan dubbachuun illee qaanii dha. ¹³ Garuu yammuu waanti hunduu ifatti bahu; gara muldhachuutti dhufa. ¹⁴ Waantii hunda akka muldhatu kan godhu ifaadha. Kanaafuu akkana jedhe. "Ati, inni raftu dammaqi, du'a keessaas ka'i Kiristoosis sii ibsaa." ¹⁵ Isin akkamitti akka deddeebitan of eegadhaa, akka warra qaroomaniitti malee akka warra hin qaroomneetti hin deddebi'inaa. ¹⁶ Guyyoonni kunis badaa waan ta'aniif bara kana oolchaa. ¹⁷ Kanaafuu eyyamni Gooftaa maal akka ta'e hubadhaa malee gowwoota hin ta'iinaa. ¹⁸ Daadhii wayinii isa gara yaada xifaafireetti nama qahelchu dhuguun hin machaayinaa, Hafuura Qulqulluutiin guutamaa malee. ¹⁹ Faarfanaadhaan faarfachaa fi weedduu fi faaruu hafuuraatiin tokko tokkoon keessan waliin haasayaa, onnee keessan keessaas Gooftaadhaa faaruu qooqa gaariin weeddisaaf. ²⁰ Yeroo hunda waan hundaaf maqaa Gooftaa Iyyasuus Kiristoosiin Waaqa Abbaaf galata kennaa. ²¹ Kabaja Kiristoosiif qabdaniin wal kabajaa. ²² Haati manootni, akkuma Gooftaa kabajitanitti abbaa manaa keessanis kabajaa. ²³ Akkumaa Kiristoos qaama (nafa) isaa fayyisuuf mataa waldaa ta'e, akkasuma abbaan manaas mataa haadha manatii dha. ²⁴ Garuu akkuma waldaan Kiristoosiif of kennitee ajajamtu, akkasuma haatii manaas karaadhuma hundaan abbaa manaa isaanitiif ta'u. ²⁵ Yaa abbaa manootaa, akkuma Kiristoos waldaa jaalatee mataa isaas isheef of kenne, haadha manoota keessan jaaladhaa. ²⁶ Kanaafuu innis karaa dubbii isaatii fi bishaaniin ishee dhiqee qulqulleessuun, ²⁷ akkasuma waldaanis xurii fuula ishii fi waan akkanaa tokkollee hin qabnee fi qulqulluu hirdhina hin qabnee godhe ulfinaan of dura ishii dhaabuuf jedhee waantoota kanneen hunda godhe. ²⁸ Karaadhuma kana fakkaatuun abbaa manootaas haadha manoota isaanii akkuma qaama(nafa) ofii isaaniitti jaalachuu qabu, namni inni haadha manaa isaa jaalatu of jaalata. ²⁹ Enyumtuu foon ofii nyaachisuu fi kunuunsuu malee akka hin jibbine, akkasumatti Kiristoosis waldaa isaatiif nyaachisa, kunuunsasa. ³⁰ Sababnis nuti miseensota qaama isaatii dha. ³¹ Waan kana ta'eef namni abbaa fi haadha isaa dhisee haadha manaa isaanitti maxana, isaan lamaanuus foon tokko ta'u. ³² Kun iccitiin dhugaa kun yaaddaadha, ani garuu waa'ee Kiristoosii fi waa'ee waldaan dubbadha. ³³ Haa ta'uutii, isin tokko tokkoon keessanis akkasuma haadha manaa ofi akka mataa isaatti haa jaalatu, haati manaas abbaa manaa ishii haa kabajju.