¹ И сыр саро скэрдям подгинэ кэ мэ шэралэ и пхэндэ: "на отпхэндэпэ мануша, Израилё, и рашая, и левиты, тэ кэрэн бэзэха сыр кэрэн бэзэх мануша авирьятыр пхувьятыр: хананеи, хеттеи, ферезеи, иевусеи, аммонитяни, моавитяни, египтяни и аморреи, ² пал одова со ёнэ лынэ тэлэн ромнем адалэндыр манушэндыр пэскэ и пэскирэнгэ чявэнгэ, адалэса иудеи хаскирдэ пэскиро свэнто рат, и перво кон кэрэлас адава бэзэх сыс барэ шэралэ. ³ И сыр шундём адалэ лава, мэ починдём пэ пэстэ идя, и чинавас пэ пэстэ бала по шэро и пэ барба, и сыс розмордо. ⁴ И кэ мэ подгинэ сарэ кон дарэл Дэвлэскирэстыр лавэстыр и ракирасас пал одова со на сыс чячунэнса мануша савэ явнэ пленостыр, и мэ сыс бэшто розмардо кэ бэвэлитко жэртва. ⁵ И бэвэляко сыр янэнас жэртва мэ вштыём дэ починды идя, и бэстём пэ чянга, и гадыём пэскирэ васта ко Яхвэ мирэскэ Дэвлэскэ, ⁶ и пхэндём: "Дэвэл миро! Мангэ ладжява тэ гадав мирэ васта, кэ Ту Дэвла, пал одова со амарэ бэзэха гадынэпэ упрэдыр амарэстыр шэрэстыр, и амаро бангипэн рэсэл ко болыбэн. ⁷ Дэвэсэндыр сыр дживэнас амарэ дада и кэ адава дэвэс амэ до бангипэн пал амарэ бэзэха, и Ту домэкьян со залынэ -- амэн, амарэн царен, амарэн рашаен -- и отдынэ до васта царенгэ авирьятыр пхувьятыр, тэ умарэн, тэ лэн до плено, тэ обчёрэн и ладжякирэн амэн, сыр дэ адава дэвэс. ⁸ А акана Тутыр Дэвла Яхвэ амэ дыкхас лачипэн, одова со ачямпэ джидэ и Ту яндян амэн дэ адава свэнто штэто, набут лошалыя амаро ило и амэ оджидыям амарэстыр пхарипнастыр. ⁹ Нэ амэ ачяспэ рабэнса, и амаро Дэвэл амэн на ачкирдя и Ёв сыкадя пэскиро камлыпэн ангил царендэ дэ Персия, дякэ со царя домэкнэ амэн тэ скэрас розмардо кхэр амарэско Дэвлэско, и тэ дживас тал Тыро васт дэ Иудея и Иерусалимо. ¹⁰ Акана со тэ пхэнас Тукэ Дэвла? Адякэ сыр амэ ачядям Тырэ заповеди, ¹¹ савэ Ту дыян Тырэнса пророкэнса, савэ ракирэнас: "Пхув, дэ сави тумэ джян, тэ авэн хулаенса, -- адая пхув нанэ жужи ёй бэзэхалы одолэндыр манушэндыр савэ дживэн одой и кэрэнас бэзэх пир сари пхув. ¹² И пал адава тумарэн чяен на отдэн пал лэнгирэндэ чявэндэ, и лэнгирэн чяен на лэн пал паскирэндэ чявэндэ, и на родэн лэнса лачипэн и ни саво рындо, соб тумэнгэ тэ авэл куч и тэхан маро адалатыр пхувьятыр и тэ ачявэн дая пхув пэскирэнгэ чяворэнгэ пэ саро родо". ¹³ Нэ пал сарэ амарэ на лаче рынды и пал амаро баро бангипэн, Ту Дэвла на мардян амэн сыр амэ молас, пал амарэ бэзэха, нэ зарахьян и рискирдян амэн пэ амари пхув, -- ¹⁴ чи ласа амэ акана тэ на кандас Тыро лав и тэ кэрас бьява адалэнса манушэнса савэ дживэн дэ бэзэха? Чи на лэла Тут тэнче бари холы пэ амэндэ со Ту умарэса амэн и на ачявэса джидэнса ни конэс? ¹⁵ Яхвэ, Дэвэл Израилёско! Ту сын чячуно, пал адава со ачядян амэн дадывэс джидэнса. И гэна амэ тэрдэ ангил Тутэ, пэскирэса бангипнаса, и ладжяво амэнгэ амарэндыр бэзэхэндыр и нанэ со тэ пхэнас Тукэ пал адава".