¹ И гэна мануша, лэнгирэ сэмьи и лэнгиро родо саво выгия манса Вавилоностыр сыр сыс царёса Артаксерксо: ² чявэндыр Финеёскирэндыр -- Гирсоно, чявэндыр Ифамароскирэндыр -- Даниило, чявэндыр Давидоскирэндыр -- Хаттушо, ³ чявэндыр Шеханиёскирэндыр, чявэндыр Парошоскирэндыр -- Захария, и лэса до лыла сыс зачиндэ шэл панджэша муршэн, ⁴ чявэндыр Пахаф-Моавоскирэндыр --Эльегоенаё, чяво Зерахиёскиро, и лэса дуйшэла муршэн, ⁵ чявэндыр Шеханиёскирэндыр --чяво Яхазиило, и лэса триншэла муршэн, ⁶ чявэндыр Адиноскирэндыр -- Еведо, чяво Ионафаноскиро, и лэса пандждэша муршэн, ⁷ чявэндыр Еламоскирэндыр -- Иешаиё, чяво Афалиёскиро, и лэса эфтадэша муршэн, ⁸ чявэндыр Сафатиёскирэндыр -- Зевадиё, чяво Михаилоскиро, и лэса охтодэша муршэн, ⁹ чявэндыр Иоаваоскирэндыр -- Овадиё, чяво Иехиилоскиро, и лэса дуйшэла дэшохто муршэн, ¹⁰ чявэндыр Шеломифоскирэндыр -- чяво Иосифиёскиро, и лэса шэл шовдэша муршэн, ¹¹ чявэндыр Беваёскирэндыр -- Захаро, чяво Беваёскиро, и лэса дуйдэша охто муршэн, ¹² чявэндыр Азгадаёскирэндыр -- Иоханано, чяво Гаккатаноскиро, и лэса шэл и дэш муршэн, ¹³ чявэндыр Адоникаманоскирэндыр -- гэна сыр лэн кхарэн: Елифелето, Иеиело и Шемаиё, и лэса шовдэша муршэн, ¹⁴ чявэндыр Бигваёскирэндыр -- Уфаё и Заббудо, и лэса эфтадэша муршэн. ¹⁵ И мэ скэдыём лэн кэ рэка, сави пэрэл дэ Агава, и амэ протэрдыям одой трин дэвэс, мэ дыкхавас пэ манушэндэ и рашаендэ, и никонэс чявэндыр Левиёскирэндыр на попэём. ¹⁶ И тэнче мэ бичявдём пал Елиезеромостэ, пал Ариэломостэ, пал Шемаиеёстэ, и пал Элнафаномостэ, и пал Иаривомостэ, и пал Элнафаномостэ, и пал Нафаностэ, и пал Захариёстэ, и пал Мешулламостэ -- шэралэпдэ, и пал Иояривомостэ, и пал Элнафаномостэ -- савэ сыс годявир мануша. ¹⁷ И припхэндём лэнгэ пал Иддостэ, саво сыс шэрало до штэто Касифье, и пирипхэндёл лава соб ёнэ тэ пхэнэн Иддоскэ, и лэскирэнгэ пшалэнгэ савэ служинэн Дэвлэскэ до штэто Касифье, соб ёв тэ бичявэл манушэн савэ лэна тэ кэрэн буты до кхэр ваш амарэскэ Дэвлэскэ. ¹⁸ И дякэ сыр сыс Дэвлэскиро васт пэ амэндэ, то ёнэ бичявдэ кэ амэ, годявирэс манушэс чявэндыр Махлиёскирэндыр, чявэс Лэвиёскирэс, чявэс Израилёскирэс, и Шеревиёс, и лэскирэн чявэн, и лэскирэн пшалэн -- дэшохто; ¹⁹ и Хашавиёс, и лэса Иешаиёс чявэндыр Мерариёскирэндыр, и лэскирэн пшалэн, и лэнгирэн чявэн -- биш; ²⁰ адякэж лэнса явнэ дуйшэла биш манушэн савэн Давидо чивдя тэ служинэн левитэнгэ, сарэ ёнэ зачиндэ пир лава. ²¹ Паш рэка Агав, мэ пхэндём манушэнгэ соб ёнэ тэ нахан и тэ напьен, а тэ мангэнпэ ангил амарэстэ Дэвлэстэ, соб Ёв тэ зракхэл амэн, и амарэн чяворэн, и амаро барвалыпэн саво сыс амэнса до дром, ²² пал одова со мангэ сыс ладжяво тэ мангав ко царё манушэн савэ зракхэна амэн до дром врагэндыр, и амэ ракирдям царёскэ: Со Дэвэл зракхэла пэскирэ вастэса одолэн кон родэл Лэс, адякэж Лэскири холы пэ одолэндэ кон ачядя Лэс. ²³ И пал адава амэ на хасас и на пьясас нэ мангасас амарэс Дэвлэс, и Ёв шундя амэн. ²⁴ И мэ выкэдыём дэшудуен манушэн рашаендыр: Шеревиёс, Хашавиёс и лэнса дэш лэнгирэ пшала. ²⁵ И, чивдём по весы, руп и сумнакай и посуда и отдыём лэнгэ, -- саро со дынэ ваш Кхэр амарэскэ Дэвлэскэ, царё и лэскирэ советники, и лэскирэ шэралэ, и саро Израилё, саво сыс одой. ²⁶ И мэ чивдём по весы, и дыём лэнгэ пэ васта руп биштаекх бари и панджшэла килы, рупуны, посуда трин тоны триншэла килы и сумнакай -- сыс трин тоны триншэла килы, ²⁷ и биш сумнакунэ тахтая, по охто и паш кило дэ екх тахтай, и дуй посуды лачятыр медятыр -- сави дрого сыр сумнакай. ²⁸ И мэ пхэндём лэнгэ: "Тумэ свэнта ваш Яхвэ, и посуда свэнто, а руп и сумнакай -- яндэ мануша илэстыр Дэвлэскэ Яхвэ. ²⁹ Дыкхэн и ракхэн, кэ дова сыр на отдэна саро со лынэ ангил рашаенгирэндэ шэралэндэ, и левитэндэ, и авиртонэндэ шэралэндэ до родо Израилёскиро до Иерусалимо, кай ракхэнпэ дрогипэна до кхэр Яхвэ". ³⁰ И чивдэ по вэсы и прылынэ рашая и левиты саро сумнакай и руп, и посуда, соб тэ лыджян до Иерусалимо, до кхэр амарэско Дэвлэско. ³¹ И амэ гиям рэкатыр Агава дэ дэшудуйто дэвэс дэ перво чён, соб тэ джяс до Иерусалимо, И Дэвлэскиро васт сыс пэ амэндэ, И Ёв зракхэлас амэн сарэндыр врагэндыр до амаро дром. ³² И амэ явьям до Иерусалимо и сыс одой трин дэвэс. ³³ И по штарто дэвэс, руп, и сумнакай, и посуда амэ чывдям по весы и отдыям до кхэр амарэско Дэвлэско, до васта Меремофоскэ, чяваскэ Уриёскирэскэ, рашаскэ, и Елеазароскэ чявэскэ Финеёскирэскэ, и Иозавадоскэ чявэскэ Иисусоскирэскэ, и Ноадиноскэ чявэскэ Биннуёскирэскэ, левитэнгэ -- ³⁴ саро погиндо, и взважино. И сыс саро зачиндо дэ дова дэвэс. ³⁵ Иудеи савэ рисинэ пленостыр яндэ Дэвлэскэ Израилёскирэскэ жертвы савэ схачкирэнас пэ яг пал саро Израилё: дэшудуен гурувэн, инядэша шовэн бакрэн, эфтадэша эфта бакрорэн, дэшудуй козлэн пал бэзэх. Саро адава -- схачкирдэ ваш Яхвэ. ³⁶ И ёнэ пиридынэ со припхэндя царё шэралэнгэ пир сарэ форы пал рэка, тэ подрикирэн манушэн Израилёскирэн и кхэр Дэвлэскиро.