¹ И сыр саро адава прогия, сыр сыс царёса Артаксерксо, царё Персидско, Ездра, чяво Сераиёскиро, чяво Азариёскиро, чяво Хелкиёскиро, ² чяво Шаллумоскиро, чяво Садокоскиро, чяво Ахитувоскиро, ³ чяво Амариёскиро, чяво Азариёскиро, чяво Маройофоскиро, ⁴ чяво Захариёскиро, чяво Уззиёскиро, чяво Буккиёскиро, ⁵ чяво Авишуёскиро, чяво Финеесоскиро, чяво Елеазароскиро, чяво первонэрашаёскиро Аароноскиро, -- ⁶ Ездра выгия Вавилоностыр, и ёв сыс сыклякирдо до Законо Моисеёскиро, саво дыя Яхвэ, Дэвэл Израилёскиро. И дыя лэскэ царё саро со ёв мангья, дякэ сыр васт Яхвэ, лэскирэ Дэвлэско, сыс пэ лэстэ. ⁷ И выгинэ бут чявэ Израилёскирэ, и рашая, и левиты, и долэ кон багэл, и кон ракхэл вудары, и слуги до кхэр Дэвлэскиро, и выгинэ ёнэ до Иерусалимо до эфтато бэрш сыр сыс царёса Артаксерксо. ⁸ И явья ёв до Иерусалимо дэ панджто чён эфтато бэрш царёскиро. ⁹ Пал одава со дэ перво дэвэс первонэ чёнэскиро ёв лыя тэ выджял Вавилоностыр, а дэ перво дэвэс панджтонэско чёнэскиро ёв явья до Иерусалимо, дякэ сыр Дэвлэскиро васт сыс пэ лэстэ. ¹⁰ Ездра лыя илэстыр тэ сыклёл до Законо Яхвэ и тэ дживэл пир лэстэ, и тэ сыклякирэл Израилёс сарэскэ со чиндо до Законо. ¹¹ Гэна адасаво лыл, саво царё Артаксерксо дыя рашаскэ, Ездраскэ, сыклымарёскэ саво сыклякирэлас законоскэ Дэвлэскирэскэ Яхвэ до Израилё: ¹² Артаксерксо, царё царенгиро, Ездраскэ, рашаскэ, саво сыклёкирэл законо Дэвлэскиро саво до болыбэн. ¹³ Мэ прыпхэнав, соб дэ миро царство сарэ кон Израилёскирэндыр манушэндыр, и лэнгирэ рашая и левиты, савэ камэн тэджян до Иерусалимо, мэк джян туса. ¹⁴ Дякэ сыр, царёстыр и эфта лэскирэндыр советникэндыр ту бичявэс тэ уджинэн пал Иудея и Иерусалимо, сыр ёнэ дживэн пир законо Дэвлэскиро саво ту рикирэс до васта, ¹⁵ и тэ янэн руп и сумнакай, саво царё и лэскирэ советники дынэ кокорэ пэстыр Дэвлэскэ Израилёскирэскэ, Саво дживэл до Иерусалимо, ¹⁶ и сари руп и сумнакай сави дэна тукэ до Вавилоно, мануша и рашая кокорэ пэстыр, ваш Дэвлэскэ, Саво до Иерусалимо. ¹⁷ Пал адава сыгэс кин пэ адалэ ловэ гурувэн, бакрэн, бакрорэн, и маро, и ксил, и вино и ян лэн по жэртвенико кай кхэр тумарэ Дэвлэскиро саво до Иерусалимо. ¹⁸ И со ту и тырэ пшала камэн тэ кэрэн ловэнса савэ ачнэпэ, -- то кэрэн пир тумарэ Дэвлэскири воля. ¹⁹ И посуда, сави дынэ тукэ пэ служэние до кхэр кэ тыро Дэвэл, чив ангил Дэвлэстэ Иерусалимоскирэстэ. ²⁰ И саро со трэби до кхэр ваш тырэскэ Дэвлэскэ, -- лэ кхэрэстыр кай ракхэлпэ барвалыпэн царёскиро. ²¹ И мэ царё Артаксерксо, припхэнав сарэнгэ конэстэ ракхэнпэ ловэ, савэ дживэн пал рэка, соб саро со пхэнэла тумэнгэ рашай Ездра, сыклымарё пир законо Дэвлэскиро кэрэнте илэстыр: ²² Дэньтэ лэскэ трин тонны и триншэла килы рупунэ ловэ, и ко шэл хомеры пшеница и дуйбаря дуйшэла литры вино, и дякитци ксил, а лонд -- на гин. ²³ Дыкхэн саро тэ кэрэлпэ ваш Дэвлэскэ саво до болыбэн илэстыр, и саро тэ вхтылэл до кхэр ваш Дэвлэскэ саво до болыбэн. Пал со тэ холясол Дэвэл пэ царстово царёскиро и пэ лэскирэндэ чявэндэ? ²⁴ И амэ тумэнгэ долыджяс, со сарэ рашая, левиты, долэ кон багэл, кон ракхэл вудары, мануша савэ служынэн до кхэр Дэвлэскиро, -- пхэнав лэндыр тэ налэн подати, налоги и пошлины. ²⁵ А ту Ездра, кэр годяса сави тутэ Дэвлэстыр, чив манушэн савэ авэна шэралэнса и сэндарен, соб ёнэ тэ сэндякирэн сарэн манушэн савэ дживэн пал рэка, -- сарэн, кон джинэл Дэвлэски законы, а савэ на джинэн одолэн сыклякирэн. ²⁶ И одолэс кон на лэла тэ дживэл пир закого тырэ Дэвлэскиро и законо царёскиро, -- мэк лэс сэндякирэн: чи умарэн, чи вытрадэн, чи мэк залэн барвалыпэн чи чивэн до бэшибэн". ²⁷ Слава тукэ Яхвэ, Дэвэл амарэ дадэнгиро, саво ковлякирдя ило царёскиро, и гожакирдя кхэр Яхвэ, саво до Иерусалимо, ²⁸ и Дэвэл сыкадя пэскиро камлыпэн кэмэ дякэ со царё и лэскирэ советники и барэ мануша закамнэ тэ подрикирэн ман дэ буты и дынэ саро со трэби тэ докэрэн кхэр Дэвлэскиро, и мэ зоралыём пал одова со васт Яхвэ мирэ Дэвлэскиро сыс пэ мандэ, и мэ скэдыём Израилёстыр шэралэн, соб ёнэ тэ джян манса.