¹ Тэнче царё Дариё припхэндя тэ роздыкхэн лыла савэ ракхэнпэ до кхэр кай пашло барвалыпэн до Вавилоно. ² И попэнэ дэ Мидия до форо Екбатано, екх лыл дэ саво сыс чиндо дякэ:" ³ Дэ перво бэрш сыр сыс царёса Киро. Царёстыр Киростыр выгия лав саво сыс зачиндо до лыл пал кхэр Дэвлэскиро саво до Иерусалимо: мэк кэрэн кхэр пэ дова штэто, кай янэн жэртвы, и мэк зачивэн фундаменто; и лэскиро вучипэн авэла шовдэша локти, и буглыпэн шов локти, ⁴ мэк чивэн трин ряды барэндыр и екх рядо нэвэнса каштэнса, а пал саро мэк покинэн царёскирэстыр кхэрэстыр. ⁵ Адякэж сумнакуны и рупуны посуда сави Навуходоносоро вылыджия Дэвлэскирэстыр кхэрэстыр саво до Иерусалимо, и яндя до Вавилоно, мэк рискирэн и отлыджян до кхэр, до Иерусалимо пэ пэскиро штэто, и чивэна до кхэр Дэвлэскиро. ⁶ Акана Фафнаё, шэрало форэнгиро савэ пал рэка, и Шефар-Бознаё, и тумарэ мануша афарсахеи, савэ пал рэка, рикирэнпэ дурэдыр лэндыр. ⁷ Ачявэн манушэн савэ кэрэн буты дэ Дэвлэско кхэр и на приячен кэ ёнэ! Мэк шэралэ иудеенгирэ и пхурипэн иудеенгиро докэрэн адава кхэр Дэвлэскиро пэ пэско штэто. ⁸ Гэна со мэ прыпхэнав тумэнгэ тэ кэрэн адалэнса иудейсконэнса пхуромэнса, мэк ёнэ кэрэн кхэр Дэвлэскиро, и мэк далэнгэ манушэнгэ авэла выпокиндо саро росходо царсконэстыр кхэрэстыр, налогэндыр савэ дэн мануша пал рэка, тэ натэрдёл буты. ⁹ И скици трэби лэнгэ гуроворэн, бакрэн, и бакрорэн тэ схачкирэн ваш Дэвлэскэ, маро, лонт, вино и ксила, дакици кицы пхэнэна рашая савэ до Иерусалимо, тэ дэн лэнгэ дэвэс до дэвэс тэ на зарикирэн, ¹⁰ соб рашая тэ янэн жэртвы Дэвлэскэ саво до болыбэн и тэ мангэнпэ пал джиипэн царёскиро и лэскирэндэ чявэндэ. ¹¹ И мэ прыпхэнав, со мануш саво парувэла адава лав: мэк вытырдэн кашт лэскирэстыр кхэрэстыр и гадэна лэс пэ адава кашт и ублавэна пэ лэстэ, а лэскиро кхэр пал адава размарэна. ¹² И Дэвэл, Саво сыкадя пэс до Иерусалимо, мэк счурдэла царёс саво тэ на авэл и манушэс саво протырдэла васт, соб тэ парувэл чи тэ розмарэл адава кхэр Дэвлэскиро, саво до Иерусалимо. Мэ Дариё, припхэнав адава, и мэк кэрэн и ничи наумэкэн!" ¹³ Тэнче Фафнаё, шэрало форэнгиро пал рэка, Шефар-Бознаё и лэнгирэ мануша кэрэнас сарэса илэса, сыр прыпхэндя царё Дариё. ¹⁴ И пхурипэн иудеенгиро кэрэнас сыгэс кхэр Дэвлэскиро, дякэ сыр ракирдэ пророки Аггеё и Захария, чявэ Аддоскирэ. И саро докэрдэ сыр пхэндя Дэвэл Израилёскиро и пир лав Кироскиро, Дариёскиро, и Артоксерксоскиро, Персидсконэндэ царендэ. ¹⁵ И докэрдо сыс адава кхэр кэ трито дэвэс до чён Адаро, до шовто бэрш сыр сыс царёса Дариё. ¹⁶ И лынэ тэ свэнтякирэн адава Дэвлэскиро кхэр лошаса чявэ Израилёскирэ, рашая и левиты, и авирта мануша савэ явнэ пленостыр. ¹⁷ Соб тэ свэнтякирэн адава кхэр Дэвлэскиро ёнэ яндэ шэлэн гурувэн, дуйшэла бакрэн, штаршэла бакрорэн, и дэ жэртва пал бэзэх пал саро Израилё, дэшудуй козлы сыр дэшудуй роды Израилёскирэ. ¹⁸ И чивдэ рашаен и левитэн тэ лыджян служба дэ Дэвлэскиро кхэр саво до Иерусалимо кажно дэ пэскиро дэвэс, сыр чиндо до лыл Моисеёскиро. ¹⁹ И дэ дэшуштарто дэвэс первонэ чёнэско пролыджинэ свэнко Патради иудеи савэ рисинэ пленостыр, ²⁰ пал дава со сарэ рашая и левиты жужакирдэпэ,-- сарэ ёнэ ачнэ жужэ. И зачиндэ бакрорэс ваш патрадитко свэнко, ваш сарэнгэ кон рисия пленостыр, и ваш рашаенгэ, и ваш пэскэ. ²¹ И ханас чявэ Израилёскирэ, савэ рисинэ кэ ёнэ пленостыр, и сарэ кон отпхэндяпэ бэзэхэндыр савэ кэрэн авирта народы, соб тэ родэн Яхвэ Дэвлэс Израилёскирэс. ²² И лошаса пролыджянас свэнко преснонэ мариклитко эфта дэвэса, пал одова со подрикирдя лэн Дэвэл Яхвэ и обрискирдя кэ ёнэ ило Асирийсконэ царёскиро, соб тэ зоралён лэнгирэ васта сыр ёнэ кэрэнас кхэр Дэвлэско -- Дэвэлэскиро Израилёскиро.