¹ И ракиренас пророки Агеё и пророко Захария, чяво Аддоскиро, ракирнас иудеенгэ, савэ дэ Иудея и дэ Иерусалимо, ёнэ сыс бичявдэ Дэвлэстыр. ² Тэнче вштынэ Зоровавелё, чяво Салафиилоско, и Иисусо, чяво Иоседекоско, и лынэ тэ докэрэн кхэр Дэвлэскиро, саво до Иерусалимо, и лэнса пророки Дэвлэскирэ, савэ подрикирэнас лэн дэ буты. ³ До дова дэвэс явья кэ ёнэ Фафнаё, шэрала пир форы савэ пал река, и Шефар-Бознаё, и лэнгирэ мануша, и пхэндэ лэнгэ: "Кон домэкья тумэн соб тумэ тэ докэрэн адава кхэр, и тэ догадэн стены?" ⁴ И амэ пхэндям лэнгэ: "Сыр кхарэн адалэн манушэн, савэ кэрэн адая буты". ⁵ И Дэвлэскиро васт сыс пэ иудеенгирэндэ шэралэндэ, и на домэкья тэ тэрдёл буты лэнгири, кэ дова сыр рындо адава на догия ко Дариё и наявья лэстыр лав со тэ кэрэн дурэдыр. ⁶ Лыл саво, бичявдэ Фафнаё, шэралэ форэндыр савэ пал рэка, и Шефар-Бознаё, и лэнгирэ мануша афарсахеи, савэ пал рэка, царёскэ Дариёскэ. ⁷ Лэскэ бичявдэ лыл, и одой сыс чиндо: "Царё Дариё миро тукэ и састыпэн! ⁸ Мэк джинэл царё, со амэ сыс до форо Иудейско, до кхэр барэ Дэвлэскиро: и ёв кэрэлпэ барэндыр, и барэ кашта чивэн до стены; и дая буты кэрэн сыго, и кэрэлпэ саро лэнгирэ вастэнса. ⁹ И тэнче амэ пучьям кэ лэнгирэ шэралэ, кон домэкья тумэн тэ докэрэн адава кхэр и стена? ¹⁰ И дякэж амэ пучьям сыр лэнгирэ лава, соб тэ допхэнас тукэ, адалэн муршэн, савэ сын лэнгирэ шэралэ. ¹¹ И гэна сыр ёне пхэндэ амэнгэ до лыл: Амэ слуги Дэвлэскирэ Саво кэрдя болыбэн и пхув, и амэ кэрас кхэр, саво сыс кэрдо бут бэрша кэ амэ, барэ царёса Израилёскирэса. ¹² Пал одова, со амарэ дада холякирдэ Дэвлэс, Ёв отдыя лэн до васта Навуходоносороскэ, царёскэ Вавилонсконэскэ, саво сыс халдеё; адава кхэр ёв розмардя, а манушэн пирилыджия тэ дживэн до Вавилоно. ¹³ Нэ дэ перво бэрш Киро царё Вавилонско, Царё Киро дыя лыл дэ саво сыс зачиндо тэ кэрэн адава кхэр Дэвлэско. ¹⁴ А дякэж сумнакуны и рупуны посуда Дэвлэскирэстыр кхэрэстыр, сави вылыджия Навуходоносоро Иерусалимостыр, и отлыджия до кхэр дэвлэскэ, саво до Вавилоно, -- адая посуда вылыджия царё Киро кхэрэстыр, саво до Вавилоно, и пиридыя Шешбацароскэ, савэс ёв чивдя шэрэлэса пир форы. ¹⁵ И пхэндя лэскэ: "Лэ адая посуда, джя, чив ла до кхэр, саво до Иерусалимо. И мэк кэрэн кхэр Дэвлэско пэ дова штэто кай ёв сыс". ¹⁶ Тэнче Шешбацаро явья, зачивдя фундаменто до хкэр Дэвлэскиро, саво до Иерусалимо, и долэстыр дэвэсэстыр и кэ адава дэвэс ёв кэрэлпэ. ¹⁷ И акана сыр скамэла царё, мэк подыкхэн дэ царска лыла до Вавилоно, чячибэн ли со царёстыр Киростыр выгия лыл, дэ саво сыс чиндо тэ кэрэн кхэр Дэвлэскэ до Иерусалимо, мэк прыбичявэн амэнгэ воля царёскири пал дава рындо".