¹ И шундэ мануша савэ сыс холямэ по Израилё, со ёнэ рисинэ и кэрэн кхэр Яхвэ, саво сын Дэвэл Израилёскиро. ² И подгинэ ёнэ ко Зоровавелё и ко хулуя семьитка, и пхэндэ лэнгэ: "Амэ камас тэ кэрас тумэнса, пал одова со, сыр тумэ дякэж и амэ родас тумарэс Дэвлэс и Лэскэ янас жэртвы дэвэсэндыр сыр сыс Асардано, царё Ассирийско, саво яндя амэн адарик". ³ И пхэндя лэнгэ Зоровавелё, и Иисусо, и сарэ хулая семьендыр Израилёскирэндыр: "Нашты тумэнгэ амэнса тэ кэрэн кхэр амарэскэ Дэвлэскэ, амэ кокорэ ласа тэ кэрас ваш амарэскэ Яхвэ, саво сын Дэвэл Израилёскиро, сыр припхэндя амангэ Киро, царё Персидско". ⁴ Тэнче адолэ мануша савэ сыс авирьятыр пхувьятыр лынэ тэ даракирэн манушэн Иудаскирэн, соб ёнэ тэ дарэн тэ кэрэн кхэр Дэвлэскиро. ⁵ Ёнэ попэрэнас барэн манушэн савэ сыс до царство, и плоскирэнас лэнгэ, соб ёнэ тэ надомэкэн тэ кэрэн кхэр Дэвлэскэ дэ сарэ дэвэса сыр сыс Киро царё Персидско и ко дэвэса сыр Дариё на тэрдыя царёса пир Персия. ⁶ И сыр тэрдыя царёса Ахашверошо, ёнэ чиндэ лыл дэ саво бангякирэнас иудеен, савэ рисинэ дэ Иудея и Иерусалимо. ⁷ И до дэвэса Артаксерксоскирэ чиндэ лыл Бишламо, Мифредато, Табеело и авирта лэнгирэ мануша Артаксерксоскэ, царёскэ Персидсконэскэ; и дава лыл сыс чиндо пэ-арамейско чип и пирилыджины сыс пэ арамейко чип. ⁸ Царёскиро мануш Рехумо и Шимшаё саво чинэл лыла, ёнэ зачиндэ лыл по Иерусалимо царёскэ Артаксерксоскэ. ⁹ Тэнче царёскирэ мануша Рехумо, и Шимшаё саво чинэл лыла и лэнгирэ мануша: динеи и афарсафхеи, тарпелеи, апарсы, арехьяны, вавилоняны, сусанцы, даги, еламитяны, ¹⁰ и авирта мануша савэн баро и патывало Аснафаро пирилыджия до форы Самарийска а авирэн пал рэка. ¹¹ Гэна дасаво лыл, саво ёнэ бичявдэ лэскэ: "Царёскэ Артаксерксоскэ, тырэ слуги савэ дживэн пал река. ¹² Мэк джинэл царё, со иудеи, савэ явнэ тутыр кэ амэ, гинэ до Иерусалимо; адава захало, и нанэ кандуно форо ёнэ лынэ тэ кэрэн, и лэскирэ стены гадынэ, и фундаменто кэрэн. ¹³ Акана мэк джинэл царё, со сыр адава форо докэрна, и о стены авэна тэ тэрдён, тэнче ёне на лэна тэ покинэн налоги, и пошлины и кэ царёскиро барвалыпэн на додэлапэ. ¹⁴ Адякэ сыр амэ хас маро царёскирэстыр кхэрэстыр, амэнгэ нанэ куч тэ дыкхас сыр царё на долэл пэскирэ ловэ, пал адава амэ долыджяс царёскэ, ¹⁵ соб тэ породэн до лыла савэ сыс зачиндэ царенца кэ ту, и ту попэрэса до далэ лыла и дыкхэса, со адава форо -- форо нанэ кандуно, ёв на плоскирэлас и гадэласпэ пэ царендэ гаратунэ бэршэндыр, пал со адава форо и сыс розмордо. ¹⁶ Амэ долыджяс царёскэ, со сыр адава форо авэла скэрдо и лэскирэ стены докэрна, тэнче одола мануша савэ пал рэка пирьячена тэ покинэн". ¹⁷ Царё бичявдя пэскиро лав Рехумоскэ и Шимшаёскэ саво чинэлас лыла, и лэнгирэ манушэнгэ, савэ дживэн дэ Самария, и долэнгэ кон дживэл пал река: "Лачипэн и бахт тумэнгэ. ¹⁸ Лыл саво тумэ бичявдэ амэнгэ, сыс прогиндо ангил мандэ. ¹⁹ И мэ прыпхэндём, и мануша роздыкнэ и попэнэ, со адава форо гаратунэ бэршэндыр гадэласпэ пэ царендэ, и лэскирэ мануша сыс захалэ и гадэнаспэ пэ царендэ. ²⁰ И зоралэ царя сыс до Иерусалимо, ёнэ сыс хулаенса пэ сарэндэ пал рэка, и лэнгэ плоскирэнас подати, налоги и пошлины. ²¹ Акана припхэнэн тэ тэрдякирэн адалэн манушэн, и соб адава форо и лэскирэ стены тэ на докэрэн, кэ дова сыр мэ на пхэнава. ²² И дыкхэн тэ авэл скэрдо саро со трэби дэ адава рындо. Пал со царенгэ тэ надолэн подати, пошлины и налоги?" ²³ Тэнче, сыр лыл саво сыс царёстыр Артаксерксостыр прогиндэ ангил Рехумостэ и Шимшаёстэ саво чинэлас лыла, и паш лэнгирэ манушэндэ, ёнэ сыгэс прастандынэ до Иерусалимо ко иудеи и тэрдякирдэ лэн зорьяса. ²⁴ И тэнче буты кхэрэскири Дэвлэскири, до Иерусалимо сыс тэрдякирды, и тэрды сыс кэ авирто бэрш сыр царствовал Дариё, царё Персидско.