¹ И подгия эфтато чён, и чявэ Израилёскирэ сыс дэ пэскирэ форы, и скэдынэпэ сарэ мануша, сыр екх, до Иерусалимо. ² И вштыя Иисусо, чяво Иоседекоско, и авирта рашая, и Зоровавелё, чяво Салафиилоскиро, и авирта шэралэ, и скэрдэ жэртвеннико Дэвлэскэ Израилёскирэскэ, соб пэ лэстэ тэ схачкирэн жэртвы, сыр чиндо до Законо Моисеёскиро, саво сын Дэвлэскиро мануш. ³ И скэрдэ жэртвинико по штэто кай ёв сыс, пал адава со ёнэ дарэнас манушэндыр авирэстыр народостыр, ёнэ яндэ жэртвы тэ схачкирэн по жэртвенико ваш Дэвлэскэ Яхвэ, и янэнас жэртвы ваш Дэвлэскэ утроса и бэвэле. ⁴ И кэрдэ свэнко пэ саво чивэнас Шатры сыр зачиндо, и янэнас жэртвы скици трэби дэвэс до дэвэс, сыр зачиндо до законо, ⁵ и на пирьяченас тэ янэн жэртвы, и по нэвочён, и пэ сарэ свэнта свэнки Яхвэ, и важ сарэнгэ кон камэлас тэ янэл бакрорэс или авирто ското дэ жэртва Дэвлэскэ Яхвэ. ⁶ Дэ эфтато чён первонэ дэвэсэстыр ёнэ лынэ тэ янэн жэртвы важ Яхвэ, а кхэр Дэвлэскиро Яхвэ на сыс скэрдо. ⁷ И покинэнас рупунэ ловэнса манушэнгэ савэ кэрэнас буты барэндыр и каштэндыр, и дэнас лэнгэ хабэн, и тэ пьен, и ксил сидонянэнгэ и тирянэнгэ, соб ёне тэ лыджян кашта кэдрова Ливаностыр пир паны, дэ форо Яфа, дякэ сыр Киро царё Персидско дыя лэнгэ лыла савэ на запхэнэн дая буты. ⁸ И пэ авирто бэрш сыр ёнэ явнэ до Иерусалимо тэ кэрэн Дэвлэскиро кхэр, дэ авирто чён Зоровавелё, чяво Салафиилоско, и Иисусо, чяво Иоседекоско, и авирта пшала, рашая и левиты, и сарэ кон явья пленостыр до Иерусалимо, ёнэ сыс перва кон лынэ тэ кэрэн Дэвлэскиро кхэр, и чивдэ левитэн конэскэ биш бэрш и бутыр, тэ дыкхэн пал буты сави джял до кхэр Яхвэ. ⁹ И вштыя Иисусо, и лэскирэ чявэ и лэскирэ пшала, Кадмиило и лэскирэ чявэ, и чявэ Иудаскирэ, сарэ сыр екх дыкхэнас сыр кэрэлпэ буты до кхэр Дэвлэскиро: чявэ Ханададоскирэ, и лэнгирэ чявэ и пшала, левиты. ¹⁰ И кэрдэ бутярнэ фундаменто кхэрэскиро Яхвэ, и чивдэ рашаен, уридэ дэ лэнгиря идя, тэ башавэн пэ трубы, и левитэн, чявэн Асафоскирэн, тэ башавэн по кимвалы тэ славинэн Яхвэ дякэ сыр ракирэлас Давидо, царё Израилёскиро. ¹¹ И за башавдэ ёнэ и гадынэ Дэвлэскэ Яхвэ слава, пал Лэскиро лачипэн, и камлыпэн саво на пирьячела ко Израилё". И сарэ мануша загодлынэ барэ годласа, слава Тукэ Яхвэ пал одова, со кэрдо фундаменто кхэрэскэ Яхвэ. ¹² И бут рашая, и левиты, хулая семьитка, пуранэ мануша, савэ дыкхнэ перво кхэр, и сыр пэ лэнгирэ якха кэрэнас фундаменто адалэскиро кхэрэскиро, ёнэ ровэнас барэ глосаса, и бут лэндыр кон годлэлас барэ лошатыр. ¹³ И нашты сыс тэ роскэдэ глос лошатыр и глос манушэнгири савэ ровэнас, пал одова, со мануша годлэнас барэ годласа и глос сыс шунды дурал.