¹ И сыр мангэласпэ Ездра и прынджинэлас пэскирэ бэзэха, ровэлас и пэрэлас ангил хкэр Дэвлэскиро, скэдынэпэ паш лэстэ Израилёстыр бут муршэн, и джювлен, и чяворэн пал одова со ровэнас мануша барэ роибнаса. ² И пхэндя Шеханиё, чяво Иехиилоско чявэндыр Еламоскирэндыр, и пхэндя Ездраскэ: "Амэ кокорэ бангэ со на кандыям амарэс Дэвлэс, и лыям пэскэ ромнэм авирэстыр родостыр и авирьятыр пхувьятыр, нэ дадывэс ко Израилё исын надежда. ³ Акана трэби тэ кэрэс договоро амарэса Дэвлэса, соб тэ одмэкас сарэн ромнен и лэнгирэн чяворэн, подпхэндя Шехаё и мануша савэ дарэн Дэвлэскирэндыр заповедендыр, и мэк саро кэрэлпэ пир Законо. ⁴ Вшты, ада тыро рындо, и амэ тут подрикираса: зоралёв и кэр!" ⁵ И вштыя Ездра и припхэндя шэралэнгэ пэ рашаендэ, левитэндэ и пэ саро Израилё тэ солахан, со ёнэ кэрэна саро пир лава далэ, и ёнэ солахадэ. ⁶ И вштыя Ездра и выгия кхэрэстыр Дэвлэскирэстыр и гия ко кхэр Иохананоскиро, чявэскиро Елияшивоскиро, и явья одорик. На хая маро и на пия паны, пал дава со сыс лэскэ пхаро со накандынэ Дэвлэс иудеи савэ рисинэ пленостыр. ⁷ И припхэндэ дэ Иудея и до Иерусалимо сарэнгэ иудеенгэ савэ рисинэ плэностыр тэ скэдэнпэ до Иерусалимо. ⁸ И дынэ пэ дава шэралэ и пхурома трин дэвэс, а кон на явэла дякэ и дякэ авэла лэскэ и лэскирэскэ барвалыпнаскэ, а кокоро мэк уджял иудеендыр. ⁹ И скэдынэпэ сарэ мурша Иудаскирэ и Вениаминоскирэ до Иерусалимо пал трин дэвэс. Адава исыс до бишто дэвэс инято чён. И бэштэ сыс сарэ мануша ангил Дэвлэскиро кхэр, и гия пэ лэндэ мразо адалэстыр рындостыр, и брышындэстыр. ¹⁰ И вштыя рашай Ездра, и пхэндя лэнгэ: Тумэ кэрдэ бэзэх со лынэ пэскэ ромнэн авирэстыр родостыр адалэса додынэ бангипэн Израилёскэ. ¹¹ Акана приджинэн пэскиро бангипэн ангил Яхвэ, саво сын Дэвэл тумарэ дадэнгиро, и кэрэн со Ёв камэл, отджянте авирэндыр народэндыр и ачявэн ромнен савэн тумэ лынэ авиртонатыр пхувьятыр". ¹² И лынэ тэ ракирэн сарэ мануша, и ракирэнас барэ глосаса: "Дякэ сыр ту амэнгэ пхэндян, дякэ трэби и тэ кэрас, ¹³ нэ манушэн бут и джян брышында, и нанэ зор тэ тэрдёвас аври. И адава рындо на кэрэлпэ пал дэвэс чи пал дуй, пал дава со амэ бут кэрдям бэзэха дэ дава рындо. ¹⁴ Мэк тэрдён амарэ шэралэ пал сарэндэ манушэндэ, и сарэ, кон дэ амарэ форы лынэ ромнем авирьятыр пхувьятыр, мэк явэн дэ пэскиро дэвэс, и лэнса шэралэ лэнгирэстыр форостыр и лэнгирэ сэндарья, кэ дова сыр на отрисёла амэндыр бари холы амарэскирэ Дэвлэскири пал адава рындо". ¹⁵ Дякэ Ионафано, чяво Асаилоскиро, и Яхзеия, чяво Фиквоскиро, на подрикирдэ адава рындо, а Мешулламо и Шавфаё левито сыс лэнса. ¹⁶ И кэрдэ дякэ мануша савэ явнэ плэностыр, и сыс откэдынэ рашай Ездра, мурша, шэралэ родостыр, и сарэ ёнэ пир лава. И бэштэ сыс ёнэ до перво дэвэс до дэшто чён, тэ роскэдэн адава рындо. ¹⁷ И ёнэ уджиндэ сарэн муршэн, савэ лынэ ромнэн авирьятыр пхувьятыр, дэ перво чён и перво дэвэс. ¹⁸ И попэнэпэ чявэндыр рашаенгирэндыр, савэ лынэ пэскэ ромнен авирьятыр пхувьятыр: чявэндыр Иисусоскирэндыр, чяво Иоседеко, и лэскирэ пшала -- Маасеё, и Елиезеро, и Иариво. И Гедалиё. ¹⁹ И ёнэ дынэ лав со одмэкэна пэскирэн ромнен и пал пэскиро бангипэн янэна бакрэс дэ жэртва. ²⁰ Чявэндыр Иммероскирэндыр: Хананиё и Зевадиё, ²¹ чявэндыр Харимоскирэндыр: Маасеё, и Елиё, и Шемаиё, и Иехиило, и Уззиё. ²² И чявэндыр Пашхуроскирэндыр: Елиоенаё, Маасеё, Исмаило, Нафанаило, Иозавадо и Эласаё. ²³ Левитэндыр: Иозавадо, и Шимеё, и Келаиё, ёв жэ Клито, Пафахиё, Иуда и Елиезеро. ²⁴ Долэндыр кон багэл: Елияшиво. Кон ракхэл выдары: Шаллумо, и Телемо, и Уриё. ²⁵ И Израилёстыр -- чявэндыр Парошоскирэндыр: Рамаиё, и Иззиё, и Малхиё, и Миямино, и Елеазаро, и Малхиё, и Бенаиё. ²⁶ Чявэндыр Еламоскирэндыр: Матфаниё, Захаро, и Иехиило, и Авдиё, и Иремофо, и Елиё. ²⁷ Чявандыр Заффулоскирэндыр: Елиоенаё, Елияшиво, Матфаниё, и Иремофо, и Завадо, и Азисо. ²⁸ Чявэндыр Беваёскирэндыр: Иоханано, Ханано, Забваё, Афлаё. ²⁹ Чявэндыр Ваниёскирэндыр: Мешулламо, Маллухо, и Адаё, и Иашуво, и Шеало, Иерамофо. ³⁰ Чявэндыр Пахаф-Моавоскирэндыр: Адно, и Хелало, Венаиё, Маасеё, Матфаниё, Веселеило и Биннуё, и Манассиё. ³¹ Чявэндыр Харимоскирэндыр: Елиезеро, Ишшиё, Малхиё, Шемаиё, Симеоно, ³² Вениамино, Маллухо, Шемариё. ³³ Чявэндыр Хашумоскирэндыр: Мафнаё, Мафафо, Завадо, Елифелето, Иеремаё, Манассия, Шимеё. ³⁴ Чявэндыр Ваниёскирэндыр: Маадаё, Амрамо и Уело, ³⁵ Бенаиё, Бидьё, Келуго, ³⁶ Ванеё, Меремофо, Елияшиво. ³⁷ Матфаниё, Мафнаё, и Иаасаё, ³⁸ и Ваниё, и Биннуё, Шимеё, ³⁹ и Шелемиё, и Нафано, и Адаия, ⁴⁰ Махнадбаё, Шашаё, Шараё. ⁴¹ Азариело, и Шелемияго, Шемариё, ⁴² Шаллумо, Амариё, Иосифо, ⁴³ Чявэндыр Невоскирэндыр: Иеиело, Матфифиё, Завадо, Зевино, Иаддаё, и Иоелё, Бенаиё. ⁴⁴ Сарэ ёнэ лынэ пэскэ авирьятыр пхувьятыр ромнен, и лэнгирэ ромня бияндэ чяворэн.