¹ Дэ дэшуду́йто чё́н, саво́ кхарэ́лпэ Ада́ро, дэ лэ́ско дэшутри́то дэвэ́с, подґия́ одова́ дэвэ́с тэˍкэрэ́н одова́ со припхэндя́ ца́рё до лыла́, – со́б вра́ґи иудее́нґирэ тэˍумарэ́н лэ́н, нэ обрисия́ саро́ адя́кэ, со иуде́и выкхэлдэ́ адава́ марибэ́н кэ пэ́скирэ вра́ґи, ² и скэдынэ́пэ сарэ́ иуде́и дэ сарэ́ фо́ры царё́скирэ Артаксерксо́скирэ тэˍмарэ́нпэ пэ́скирэнса враґэ́нса, нэ нико́н наˍвыґия́ пэ лэ́ндэ марибна́са, па́л одова́ со да́р лыя́ лэ́н, сарэ́н враґэ́н иудее́нґирэн. ³ И сарэ́ шэралэ́ дэ сарэ́ фо́ры, кэрэ́нас ры́нды царё́скирэ и подрикирэ́нас иудее́н, па́л одова́ со дарэ́нас Мардохеё́стыр. ⁴ Мардохе́ё исы́с барэдырэ́са дэ ца́рско кхэ́р, и лэ́скиро вучипэ́н и сла́ва барьё́лас пи́р сарэ́ фо́ры буты́р и буты́р, адя́кэ сы́р адава́ ману́ш Мардохе́ё гадэ́ласпэ вучеды́р и вучеды́р. ⁵ Иуде́и умарэ́нас пэ́скирэн враґэ́н, и кэрэ́нас пэ́скирэнса враґэ́нса саро́ со камэ́нас. ⁶ Дэ фо́ро Су́зы, иуде́и умардэ́ и хаскирдэ́ панджшэла́ манушэ́н: ⁷ и Паршандафо́с, и Далфоно́с, и Асфафо́с, ⁸ и Порафо́с, и Ада́льёс, и Аридафо́с, ⁹ и Пармашфо́с, и Арисаё́с, и Аридаё́с, и Ваиезафо́с – ¹⁰ дэшэ́н чявэ́н Амано́скирэн, чявэ́с Амадафо́скирэс, враґэ́н иудее́нґирэн, ёнэ́ умардэ́, а пэ лэ́нґиро барвалыпэ́н наˍчивдэ́ пэ́скиро ва́ст. ¹¹ Дэ одова́ дэвэ́с допхэндэ́ царё́скэ скицы́к умардэ́ манушэ́н до баро́ фо́ро Су́зы. ¹² И пхэндя́ ца́рё Есфиря́кэ царица́кэ: “До фо́ро Су́зы иуде́и умардэ́ панджшэла́ манушэ́н, и дэшэ́н чявэ́н Амано́скирэн. Со ж тэ́нче ёнэ́ кэрдэ́ дэ ави́рта фо́ры царё́скирэ? Со камэ́л тыро́ ило́? Пхэн ма́нґэ мэ кэра́ва”. ¹³ И пхэндя́ Есфи́рь: “Манґа́в ту́т на́ˍотпхэн ма́нґэ мэ́к и тася́ иуде́и савэ́ до Су́зы кэрэ́н одова́ со кэрэ́нас дэ адава́ дэвэ́с, мэ́к ублавэ́н адалэ́н дэшэ́н чявэ́н Амано́скирэн пэ дэ́мбо”. ¹⁴ И припхэндя́ ца́рё тэˍкэрэ́н адя́кэ сы́р пхэндя́ цари́ца, и убладэ́ дэшэ́н чявэ́н Амано́скирэн. ¹⁵ И скэдынэ́пэ иуде́и, савэ́ исы́с до фо́ро Су́зы, до дэшушта́рто дэвэ́с до чё́н Ада́ро, и умардэ́ до Су́зы триншэла́ манушэ́н, а пэ лэ́нґиро барвалыпэ́н наˍчювдэ́ пэ́скирэ васта́. ¹⁶ А иуде́и пи́р сарэ́ фо́ры царё́скирэ, скэдынэ́пэ и марэ́наспэ па́л пэ́скиро джиипэ́н, и выкхэлдэ́ адава́ марибэ́н, и исы́с умардэ́ эфтадэша́ па́ндж барья́ манушэ́н савэ́ исы́с враґэ́нса лэ́нґэ, а пэ лэ́нґиро барвалыпэ́н наˍчивдэ́ пэ́скирэ васта́ ¹⁷ до дэшутри́то дэвэ́с до чё́н Ада́ро. А до дэшушта́рто дэвэ́с пирьячнэ́ тэˍумарэ́нпэ, и откхинё́нас и кэрдэ́ дэ адава́ дэвэ́с баро́ свэ́нко. ¹⁸ А иуде́и савэ́ дживэ́нас до Су́зы, скэдэ́наспэ до дэшутри́то и дэшушта́рто дэвэ́с, и пирьячнэ́ тэˍумарэ́нпэ и откхинё́нас, до дэшупа́нджто дэвэ́с кэрдэ́ баро́ свэ́нко. ¹⁹ Па́л адава́ мануша́ савэ́ дживэ́нас до на́ˍбарэ фо́ры и до ґава́, кэрэ́нас свэ́нко до дэшушта́рто дэвэ́с до чё́н Ада́ро, адава́ свэ́нко пролыджя́н дэ бари́ ло́ш чивэ́н барэ́ скаминда́ и бичявэ́н е́кх екхэ́скэ лачипэ́н. ²⁰ Зачиндя́ Мардохе́ё адалэ́ лава́, и бичявдя́ лыла́ кэ сарэ́ иуде́и пи́р сарэ́ фо́ры царё́скирэ Артаксерксо́скирэ: ко́н пашы́л и ко́н дура́л, ²¹ со́б тэˍавэ́л адава́ свэ́нко дэ дэшушта́рто и дэшупа́нджто дэвэ́с дэ чё́н Ада́ро бэ́рш до бэ́рш, ²² адя́кэ сы́р дэ адалэ́ дэвэса́ иуде́и выкхэлдэ́ марибэ́н кэ пэ́скирэ вра́ґи, и откхинынэ́ дэ адава́ чё́н лэ́нґири да́р обрисия́ дэ бари́ ло́ш и лэ́нґири би́да обрисия́ дэ бахтало́ дэвэ́с, со́б тэˍкэрэ́н адалэ́ дэвэса́ барэ́са свэнко́са, и тэˍбичявэ́н е́кх екхэ́скэ лачипэ́н и тэˍподрикирэ́н чёрорэ́н. ²³ И прилынэ́ иуде́и адалэ́ дэвэса́ и со чиндя́ лэ́нґэ Мардохе́ё: ²⁴ па́л одова́ со Ама́но, чяво́ Амадафо́скиро, вуґея́нино, вра́ґо сарэ́нґэ иудее́нґэ, закамья́ тэˍумарэ́л иудее́н и чюрдэ́лас пу́ро саво́ кхарэ́лпэ жре́биё со́б тэˍґалё́л дэ саво́ дэвэ́с тэˍумарэ́н лэ́н; ²⁵ и сы́р явья́ цари́ца ко ца́рё, ёв припхэндя́ и зачиндэ́ до лы́л, со́б би́да сави́ камья́ тэˍкэрэ́л Ама́но иудее́нґэ, обрисия́ пэ лэ́скиро шэро́, и убладэ́ лэ́с и лэ́скирэн чявэ́н по дэ́мбо. ²⁶ Па́л адава́ прокхардэ́ адалэ́ дэвэса́ Пури́мо, лавэ́стыр пу́р”. И пи́р сарэ́ лава́ савэ́ исы́с зачиндэ́ до лыла́ и пи́р одова́ со дыкхнэ́ и пириджиндэ́ ёнэ́, ²⁷ иуде́и прилынэ́ ва́ш пэ́скэ, и ва́ш саро́ ро́до, и одолэ́ мануша́ савэ́ авэ́на иудее́нса тэˍкэрэ́н адава́ свэ́нко ду́й дэвэ́с сы́р зачиндо́ до лы́л бэ́рш до бэ́рш, ²⁸ дэ адалэ́ дэвэса́ тэˍна́ˍзабистрэн и тэˍкэрэ́н адава́ свэ́нко родо́стыр ко ро́до, семья́тыр кэ се́мья, до барэ́ фо́ры и тыкнэ́ ґава́, и адалэ́ дэвэса́ Пури́мо тэˍрипирэ́н и тэˍна́ˍзабистрэлпэ дэ иудее́нґиро ро́до. ²⁹ И чиндя́ цари́ца Есфи́рь, чя́й Абихаило́скири, и Мардохе́ё иуде́ё зорья́са сави́ дыя́ лэ́скэ ца́рё, тэˍкандэ́н со зачиндо́ дэ ави́рто лы́л па́л свэ́нко Пури́мо. ³⁰ Ёв бичявдя́ адалэ́ лыла́ кэ сарэ́ иуде́и дэ шэ́л би́ш эфта́ фо́ры до ца́рство Артаксерксо́скирэ лавэ́нса а кана́ явья́ миро́ и ба́хт ³¹ тэˍкэрэ́н адава́ свэ́нко Пури́мо до одова́ дэвэ́с ва́ш саво́ чивдя́ лэ́нґэ иуде́ё Мардохе́ё и цари́ца Есфи́рь ва́ш пэ́скэ и саро́ ро́до тэˍрипирэ́н дэвэса́ сы́р лэ́нас по́сто и манґэ́наспэ. ³² И Есфи́рь припхэндя́, со́б тэˍавэ́л свэ́нко Пури́мо ва́ш иудее́нґэ, и лэ́с зачиндэ́ до лы́л.