¹ Дэ одова́ дэвэ́с ца́рё Артаксе́рксо отдыя́ Есфиря́кэ царица́кэ, кхэ́р Амано́скиро саво́ исы́с враґо́са иудее́нґэ, Есфи́рь роспхэндя́ царё́скэ ко́н ла́кэ Мардохе́ё, и ёв явья́ ко ца́рё. ² И злыя́ ца́рё анґрусны́ пэ́скири, сави́ исы́с ко Ама́но, и отдыя́ ла Мардохеё́скэ. И чивдя́ цари́ца Есфи́рь Мардохеё́с барэдырэ́са пэ саро́ со исы́с ко Ама́но. ³ И наˍпирьяче́лас Есфи́рь тэˍманґэ́л царё́с, и пэя́ лэ́скэ до гэра́ и ровэ́лас тэˍотлыджя́л би́да сави́ камья́ тэˍкэрэ́л Ама́но, вуґея́нино, пэ иудее́ндэ. ⁴ И протэрдыя́ ца́рё кэ Есфи́рь пэ́скиро сумнакуно́ дэсто́, и ґадыя́пэ Есфи́рь, и тэрдыя́ анґи́л царё́стэ, ⁵ и пхэндя́: “Сы́р ца́рё камэ́л и наˍхолясо́ла пэ ма́ндэ, и мэ попэё́м лачипэ́н дэ тырэ́ якха́, пхэн мэ́к зачинэ́н лыла́, савэ́ риски́рна лыла́ савэ́ чиндя́ Ама́но чяво́ Амадафо́скиро, вуґея́нино, саво́ камья́ тэˍумарэ́л иудее́н пи́р сарэ́ фо́ры царё́скирэ. ⁶ Па́л одова́ со ма́нґэ авэ́ла пхаро́ тэˍдыкха́в сы́р лэ́на тэˍхасё́н мирэ́ мануша́, и ило́ миро́ дукха́л па́л миро́ ро́до.” ⁷ И пхэндя́ ца́рё Артаксе́рксо царица́кэ Есфиря́кэ и иудеё́скэ Мардохеё́скэ: “Мэ, отдыё́м кхэ́р Амано́скиро Есфиря́кэ, а лэ́с убладэ́ по дэ́мбо па́л одова́, со ёв камья́ тэˍумарэ́л сарэ́н иудее́н. ⁸ А кана́ тумэ́ чинэ́н нэвэ́ лыла́ мирэ́ лавэ́стыр, адя́кэ сы́р тумэ́ камэ́н, ва́ш иудее́нґэ савэ́ заракхэ́на лэ́н и дэ́на лачё́ джиипэ́н, и чивэ́н печя́ть мирэ́ анґрусня́са, па́л одова́ со лы́л саво́ чиндо́ мирэ́стыр лавэ́стыр и марды́ печя́ть мирэ́ анґрусня́са, да́савэ лыла́ исы́н чячюнэ́.” ⁹ Ца́рё скхардя́ манушэ́н савэ́ зачиндэ́ лыла́, дэ три́то чё́н Сива́но, дэ би́шта три́то дэвэ́с, саро́ исы́с зачиндо́ адя́кэ сы́р пхэндя́ лэ́нґэ Мардохе́ё, ко иуде́и, и сарэ́нґэ шэралэ́нґэ пи́р сарэ́ фо́ры, савэ́ джя́н Индия́тыр кэ Ефио́пия – сарэ́ шэ́л би́ш эфта́ фо́ры: пи́р лэ́нґирэ чиба́ пэ савэ́ ёнэ́ ракирэ́нас и иудее́нґэ пи́р лэ́нґири чи́б и лэ́нґиро зачиныбэ́н. ¹⁰ И чиндя́ Мардохе́ё лавэ́стыр царёскирэ́стыр Артаксерксо́стыр и пикадя́ царё́скирьяса анґрусня́са печя́ть по лыла́, и розлыджинэ́ адалэ́ лыла́ пэ ґрэ́ндэ савэ́ исы́с ко ца́рё тэрдэ́ дэ шта́ла, дэ адалэ́ лыла́ исы́с чиндо́, ¹¹ со ца́рё наˍзапхэнэ́л иудее́нґэ дэ сарэ́ фо́ры тэˍскэдэ́нпэ и тэˍтэрдё́н па́л пэ́скиро джиипэ́н, тэˍхаскирэ́н и тэˍумарэ́н сарэ́н ко́н ґадэ́ла пэ лэ́ндэ ва́ст, чяворэ́н и джювле́н, и тэˍрозчёрэ́н лэ́нґиро барвалыпэ́н ¹² дэ е́кх дэвэ́с дэ сарэ́ фо́ры царё́скирэ Артаксерксо́скирэ – дэ дэшутри́то дэвэ́с дэ дэшуду́йто чё́н, саво́ кхарэ́лпэ чё́н Ада́ро. ¹³ Адалэ́ лыла́ мэ́к бичявэ́н дэ сарэ́ фо́ры, сы́р царё́скиро ла́в, саво́ пхэндо́ ва́ш сарэ́нґэ манушэ́нґэ, со́б иуде́и тэˍавэ́н скэдымэ́ тэˍмарэ́нпэ дэ одова́ дэвэ́с, сы́р явэ́на лэ́нґирэ вра́ґи. ¹⁴ Мануша́, сы́ґэс традынэ́ пэ царсконэ́ндэ ґрэ́ндэ, сы́р припхэндя́ лэ́нґэ ца́рё до баро́ фо́ро Су́зы. ¹⁵ И выґия́ Мардохе́ё царё́стыр уридо́ дэ ца́рско барвалы́ и́дя, дэ бари́ сумнакуны́ коро́на, дэ дрыва́н ґо́жо пла́що саво́ исы́с лэ́стэ по псикэ́. Мануша́ до фо́ро Су́зы исы́с лошалэ́. ¹⁶ Ко иуде́и исы́с бари́ ло́ш и ёнэ́ исы́с дрыва́н бахталэ́. ¹⁷ Пи́р саро́ ца́рство и дэ сарэ́ фо́ры ду́р доджя́нас адалэ́ лыла́, ко иуде́и исы́с ло́ш, ба́хт, баро́ свэ́нко и лачё́ дэвэ́с: и бу́т мануша́ савэ́ дживэ́нас дэ одолэ́ фо́ры лынэ́ тэˍкхарэ́н пэ́с иудее́нса па́л одова́ со пиридара́ндынэ иудее́ндыр.