¹ И явнэ́ ца́рё и Ама́но по свэ́нко кэ цари́ца Есфи́рь. ² И сы́р пье́нас ви́но ца́рё пуче́лас пэ ави́рто дэвэ́с кэ Есфи́рь: “Пхэн ма́нґэ со ту камэ́с? и со камэ́с тэˍманґэ́с ма́ндыр? мэ адава́ саро́ со ту манґэ́са? Кэ па́ш ца́рство авэ́ла тыро́” ³ И пхэндя́ цари́ца Есфи́рь: “Сы́р мэ попэё́м лачипэ́н дэ тырэ́ якха́, чялыё́м ту́кэ и ту лошало́ тэˍдыкхэ́с ма́н, и сы́р ту камэ́с ца́рё, манґа́в ту́т на́ˍотлэ джиипэ́н миро́ и зара́кх миро́ ро́до ґэ́на со мэ манґа́в! ⁴ Па́л одова́ со бикиндэ́ амэ́н, ма́н и саро́ миро́ ро́до, камэ́н тэˍхаскирэ́н и тэˍумарэ́н. Мэ́к ава́сас бы амэ́ бикиндэ́ сы́р бутярнэ́, мэ ава́вас бы шты́л, па́л одова́ со адая́ би́да наˍмолэ́лас бы одова́, со́б мэ тэˍманґа́в ту́т ца́рё”. ⁵ И пхэндя́ ца́рё Артаксе́рксо, Есфиря́кэ царица́кэ: “Ко́н адава́ ману́ш, и ка́й ёв, саво́ наˍподара́ндыя адава́ тэˍкэрэ́л?” ⁶ И пхэндя́ Есфи́рь: “Амаро́ баро́ вра́ґо е́кх – ада́ захало́ Ама́но!” И Ама́но здара́ндыя анґи́л царё́стэ и царица́тэ. ⁷ И холясыя́ ца́рё барэ́ холя́са и вштыя́ скаминдэ́стыр и ґия́ до са́до саво́ исы́с до дво́ро, а Ама́но ачя́пэ тэˍманґэ́л Есфиря́ тэˍна́ˍхаскирэл лэ́скиро джиипэ́н, па́л одова́ со дыкхья́ холы́ царё́скири и ґалыя́ со ца́рё лэ́с ума́рла. ⁸ И рисия́ ца́рё садо́стыр до кхэ́р по свэ́нко, А Ама́но подґия́ кэ Есфи́рь и пэя́ по чянґа́ па́ш ла́тэ. И пхэндя́ ца́рё: “Ту камэ́с тэˍпоса́спэ царица́тыр па́ш ма́ндэ?” Сы́р пхэндя́ адалэ́ лава́ ца́рё, мануша́ царё́скирэ учякирдэ́ Амано́скэ шэро́ и улыджинэ́ лэ́с. ⁹ И пхэндя́ Харбо́но, е́внухо царё́скиро: “Ґэ́на баро́ дэ́мбо, кэрдя́ Ама́но ва́ш Мардохеё́скэ, саво́ зракхья́ джиипэ́н царё́скиро – ёв тэрдо́ па́ш Амано́скиро кхэ́р, дэ́мбо адава́ – дрыва́н вучё́” ¹⁰ И убладэ́ Ама́нос пэ адава́ дэ́мбо, саво́ ёв кэрдя́ ва́ш Мардохеё́скэ, и холы́ царё́стыр отґия́.