¹ Дэ одоя́ ра́т уґия́ суно́ царё́стыр, и пхэндя́ ёв тэˍянэ́н лэ́скэ лыла́ дэ савэ́ зачиндэ́ сарэ́ ры́нды савэ́ кэрэ́наспэ до ца́рство, и лэ́н ґинэ́нас анґи́л царё́стэ. ² И попэнэ́ лы́л дэ саво́ исы́с зачиндо́ сы́р Мардохе́ё допхэндя́ па́л Ґавафо́стэ и Фаррэ́стэ, па́л дуе́ндэ евнухэ́ндэ царё́скирэндэ савэ́ ракхэ́нас царё́с, сы́р ёнэ́ закамнэ́ тэˍумарэ́н царё́с Артаксерксо́с. ³ И пхэндя́ ца́рё: “Со́са плоскирдя́м и сы́р ґадыя́м Мардохеё́с па́л одова́ со ёв зракхья́ миро́ джиипэ́н?” И пхэндэ́ тэрнэ́ мануша́ царё́скирэ: “Ва́ш лэ́скэ ничи́ наˍисы́с кэрдо́”. ⁴ И пхэндя́ ца́рё: “Ко́н до дво́ро?” А Ама́но явья́ до машкиратуно́ дво́ро ко ца́рё тэˍпхэнэ́л лэ́скэ, со́б тэˍублавэ́н Мардохеё́с по дэ́мбо саво́ ёв скэрдя́ ва́ш лэ́скэ. ⁵ И пхэндэ́ тэрнэ́ мануша́ царё́скирэ лэ́скэ: “Ґэ́на Ама́но тэрдо́ до дво́ро”. И пхэндя́ ца́рё: “Мэ́к заджя́л”. ⁶ И заґия́ Ама́но, и пучья́ лэ́стыр ца́рё: “Со тэˍкэрэ́ манушэ́скэ савэ́с ца́рё камэ́л тэˍґадэ́л упрэ́?” И пхэндя́ Ама́но кокоро́ пэ́скэ до ило́: “Конэ́с скамэ́ла тэˍґадэ́л ца́рё буты́р ма́ндыр?” ⁷ И тэ́нче пхэндя́ Ама́но царё́скэ: “Манушэ́с савэ́с ту камэ́с тэˍґадэ́с, ⁸ мэ́к лэ́скэ янэ́н ца́рско и́дя, дэ сави́ вре́лпэ ца́рё, и дэ́н лэ́скэ ґрэ́с пэ савэ́стэ традэ́лас ца́рё, и по шэро́ мэ́к вре́н ца́рско коро́на; ⁹ и мэ́к дэ́н и́дя и ґрэ́с до васта́ манушэ́скэ саво́ барэды́р кэ ца́рё, и мэ́к адава́ ману́ш урье́л одолэ́с конэ́с ца́рё камэ́л тэˍґадэ́л упрэды́р, и мэ́к вылыджя́н лэ́с пэ ґрэ́стэ машки́р фо́ро и мэ́к ґодлэ́н анґи́л лэ́стэ: “Адя́кэ кэрэ́л ца́рё манушэ́скэ савэ́с камэ́л тэˍґадэ́л упрэды́р!”” ¹⁰ И пхэндя́ ца́рё Амано́скэ: “Сыґэды́р джя́, лэ и́дя и ґрэ́с, сы́р ту пхэндя́н, и кэ́р адава́ Мардохеё́скэ, иудеё́скэ саво́ бэшто́ па́ш царё́скирэ вуда́ры, и на́ˍумэк ничи́ одолэ́стыр со ту пхэндя́н”. ¹¹ И лыя́ Ама́но и́дя и ґрэ́с, и вридя́ Мардохеё́с, и вылыджия́ лэ́с пэ ґрэ́стэ и лыджия́ машки́р фо́ро и ґодлэ́лас анґи́л лэ́стэ: “Адя́кэ кэрэ́л ца́рё манушэ́скэ, савэ́с камэ́л тэˍґадэ́л упрэды́р!” ¹² И рисия́ Мардохе́ё кэ царё́скирэ вуда́ры, а Ама́но рисия́ до пэ́скиро кхэ́р ладжя́кирдо и обмэклэ́са шэрэ́са. ¹³ И роспхэндя́ Ама́но пэ́скирэ ромня́кэ и друґэ́нґэ саро́ со кэрдя́пэ лэ́са. И пхэндэ́ лэ́скэ дру́ґи и ромны́ Зере́шь: “Мардохе́ё саво́ исы́н иуде́ё ёв ту́т ладжякирдя́ анґи́л сарэ́ндэ, а кана́ ту лэ́с наˍхаскирэ́са, а ёв ту́т хаски́рла”. ¹⁴ Ёнэ́ наˍпирьячнэ́ тэˍракирэ́н сы́р явнэ́ е́внухи царё́стыр тэˍотлыджя́н Ама́нос пэ свэ́нко саво́ скэрдя́ Есфи́рь.