¹ Пэ три́то дэвэ́с по́сто Есфи́рь уридя́пэ дэ ца́рско и́дя, и ґия́ дэ машкиратуно́ дво́ро ко ца́рё. А ца́рё исы́с бэшто́ пэ пэ́скиро штэ́то дэ пэ́скиро кхэ́р. ² И удыкхья́ ца́рё Есфиря́, сави́ исы́с тэрды́ до дво́ро, ёй чялыя́ царё́скэ и ёв исы́с лошало́ тэˍдыкхэ́л ла, и протэрдыя́ ца́рё кэ ёй сумнакуно́ пэ́скиро дэсто́, саво́ исы́с до васта́ лэ́стэ И подґия́ Есфи́рь кэ ёв и лыя́пэ па́л дэсто́. ³ И пхэндя́ ла́кэ ца́рё: “Со ту явья́н цари́ца Есфи́рь? И со ту камэ́с тэˍманґэ́с? Кэ па́ш ца́рство адава́ ту́кэ”. ⁴ И пхэндя́ Есфи́рь: “Сы́р скамэ́ла ца́рё, то мэ́к явэ́л ца́рё Амано́са дадэвэ́с по свэ́нко, саво́ мэ кэра́ва ва́ш ту́кэ”. ⁵ И пхэндя́ ца́рё слуґэ́нґэ: “Сыґэды́р кхарэ́н Ама́нос, со́б тэˍджя́с лэ́са по свэ́нко саво́ амэ́нґэ скэрдя́ Есфи́рь”, ⁶ И сы́р ца́рё подпия́ ви́но по свэ́нко лыя́ тэˍпуче́л кэ Есфи́рь: “Пхэн ма́нґэ со ту камэ́с? и со камэ́с тэˍманґэ́с ма́ндыр? мэ адава́ саро́ со ту манґэ́са? кэ па́ш ца́рство авэ́ла тыро́”. ⁷ И пхэндя́ Есфи́рь царё́скэ: “ґэ́на со мэ манґа́в и кама́м: ⁸ сы́р мэ попэё́м дэ тырэ́ якха́ лачипэ́н и чялыё́м ту́кэ и ту лошало́ тэˍдыкхэ́с ма́н, и ту камэ́с тэˍджинэ́с, со мэ кама́м, тэ́нче яв ту Амано́са и тася́ по свэ́нко, саво́ мэ кэра́ва ва́ш тумэ́нґэ и мэ пхэна́ва со мэ кама́м ту́тыр” ⁹ И выґия́ Ама́но дэ одова́ дэвэ́с лошалэ́ илэ́са, нэ сы́р здыкхья́ Ама́но Мардохеё́с па́ш вуда́ры царё́скирэ, и ёв наˍвштыя́ анґи́л лэ́стэ и наˍздара́ндыя лэ́стыр, тэ́нче дрыва́н росхоля́сыя Ама́но пэ Мардохеё́стэ. ¹⁰ Нэ зрикирдя́пэ Ама́но и явья́ дэ пэ́скиро кхэ́р, скхардя́ пэ́скирэн друґэ́н и пэ́скирья ромня́ Зере́шь. ¹¹ И шарэ́ласпэ Ама́но лэ́нґэ пэскирэ́са барвалыпна́са, и пэ́скирэнса чявэ́нса, и па́л саро́ одова́ сы́р ґадыя́ лэ́с ца́рё, и чивдя́ лэ́с барэдырэ́са машки́р сарэ́ндэ царё́скирэндэ слуґэ́ндэ. ¹² И пхэндя́ Ама́но: “Буты́р пхэна́ва тумэ́нґэ, по свэ́нко саво́ скэрдя́ цари́ца Есфи́рь, ни конэ́с наˍкхардэ́ екхэ́с царё́с и ма́н, и тася́ пэ ави́р дэвэ́с ёй ма́н кхардя́ по свэ́нко кхэтанэ́ царё́са. ¹³ Нэ адава́ саро́ наˍдэ́л ло́ш дэ миро́ ило́ па́л адава́ со мэ дыкха́в Мардохеё́с, адалэ́с иудеё́с, саво́ бэшэ́л па́ш ца́рска вуда́ры”. ¹⁴ И пхэндэ́ лэ́скэ Зере́шь, лэ́скири ромны́, и лэ́скирэ дру́ґи: “Мэ́к кэрэ́н вучё́ дэ́мбо, а утро́са пхэн царё́скэ мэ́к ублавэ́н Мардохеё́с пэ лэ́стэ, и джя́ царё́са по свэ́нко. И чялынэ́ Амано́скэ адалэ́ лава́, и ёв скэрдя́ вучё́ дэ́мбо.