¹ Сы́р Мардохе́ё саро́ адава́ уджиндя́, то починдя́ пэ пэ́стэ ґа́д, и уридя́ ґоны́тко и́дя и чивэ́лас пэ пэ́стэ пра́хо, выґия́ машки́р фо́ро, и дрыва́н ровэ́лас и ґодлэ́лас. ² Доґия́ кэ ца́рска вуда́ры, нэ до вуда́ры нашты́ исы́с тэˍзаджя́л дэ да́сави и́дя. ³ И дэ сарэ́ фо́ры, ко́н шунэ́нас царё́скиро ла́в саво́ припхэндя́ тэˍумарэ́н иудее́н, ёнэ́ до по́сто наˍха́нас и наˍпье́нас ровэ́нас и ґадэ́нас ґо́дла: ґоны́нко и́дя и пра́хо исы́с пэ лэ́ндэ дэвэ́с и ра́т. ⁴ Явнэ́ кэ Есфи́рь служа́нки и е́внухи и роспхэндэ́ ла́кэ саро́ со кэрэ́лпэ, цари́ца Есфи́рь шундя́ адава́ и дрыва́н пиридара́ндыя, и бичявдя́ Мардохеё́скэ и́дя, со́б ёв тэˍзлэ́л пэ́стыр ґоны́тко и́дя, и тэˍпиривре́лпэ, нэ ёв наˍприлы́я. ⁵ Тэ́нче кхардя́ Есфи́рь Ґафаха́с, евнухо́с саво́ ца́рё чивдя́ тэˍракхэ́л ла, и бичявдя́ лэ́с ко Мардохе́ё тэˍуджинэ́л со кэрдя́пэ. ⁶ И ґия́ Ґафа́хо ко Мардохе́ё саво́ исы́с машки́р фо́ро пашы́л вуда́ры царё́скирэ. ⁷ И роспхэндя́ Мардохе́ё па́л саро́, со кэрдя́пэ лэ́са и скицы́к рупунэ́ ловэ́ дэ́ла Ама́но дэ ца́рско кхэ́р па́л иудее́ндэ, со́б лэ́н тэˍумарэ́н. ⁸ И дыя́ лэ́скэ лы́л тэˍсыкавэ́л Есфиря́кэ саво́ исы́с чиндо́ дэ Су́зы баро́ фо́ро, со умарэ́на сарэ́н иудее́н, и тэˍпхэнэ́л ла́кэ, со́б ёй тэˍджя́л ко ца́рё тэˍровэ́л и тэˍманґэ́л лэ́с тэˍзракхэ́л ла́ко народо. ⁹ Явья́ Ґафа́хо кэ Есфи́рь и пирипхэндя́ ла́кэ саро́ со пхэндя́ Мардохе́ё. ¹⁰ Пхэндя́ Есфи́рь Ґафахоґо́скэ тэˍпиридэ́л Мардохеё́скэ: ¹¹ “Сарэ́ слу́ґи царё́скирэ и ко́н дживэ́л до фо́ро сарэ́ джинэ́н, му́рш чи джювлы́, ко́н заджя́ла ко ца́рё до машкиратуно́ дво́ро, и ёв нанэ́ кхардо́, лэ́с ума́рна; и аче́лапэ джидо́ одова́ кэ ко́н ца́рё протырдэ́ла пэ́скиро сумнакуно́ дэсто́; а ма́н наˍкхарэ́нас кэ ца́рё триндэша́ дэвэ́с”. ¹² И пирипхэндэ́ Мардохеё́скэ сарэ́ лава́ Есфиря́кирэ. ¹³ И пиридыя́ Мардохе́ё, со́б тэˍпхэнэ́н Есфиря́кэ: “На́ˍдуминэ со ту зракхэ́са пэ́скиро джиипэ́н, до кхэ́р царё́скиро кокори́ машки́р сарэ́ндыр иудее́ндыр. ¹⁴ Сы́р ту проштылё́са и ничи́ наˍпхэнэ́са дадэвэ́с, тэ́нче явэ́ла зракхипэ́н иудее́нґэ авирэ́стыр штэто́стыр, а ту и тыро́ ро́до хасё́са; и ко́н джинэ́л чи нанэ́ ва́ш адава́ дэвэ́с ту́т чивдэ́ царица́са?” ¹⁵ И пиридыя́ Есфи́рь Мардохеё́скэ: ¹⁶ “Джя́, скэ́дэ сарэ́н иудее́н савэ́ исы́н до фо́ро Су́зы, и лэ́нте по́сто па́л ма́ндэ, на́ˍханте и наˍпье́н три́н дэвэ́с и три́н ратя́. И мэ пэ́скирэнса служанкэ́нса лава́ адя́кэж тэˍрикира́в по́сто, а тэ́нче мэ джя́ва ко ца́рё, тэˍпоракира́в лэ́са нэ лэ́нґиро зако́но запхэнэ́л адава́ тэˍкэра́в, и сы́р хасёва́ва – хасёва́ва”. ¹⁷ И ґия́ Мардохе́ё, и кэрдя́ адя́кэ сы́р припхэндя́ лэ́скэ Есфи́рь.