¹ Проґинэ́ дэвэса́ и ца́рё Артаксе́рксо ґадыя́ Ама́нос, чявэ́с Амадафо́скирэс, вуґеянино́с, и чивдя́ лэ́с упрэды́р сарэ́ндыр шэралэ́ндыр, савэ́ исы́с па́ш лэ́стэ. ² И сарэ́ слу́ґи царё́скирэ, пэрэ́нас по чянґа́ анґи́л Амано́стэ, па́л одова́, со адя́кэ припхэндя́ ца́рё. А Мардохе́ё наˍпэрэ́лас по чянґа́ анґи́л лэ́стэ. ³ И ракирэ́нас Мардохеё́скэ слу́ґи царё́скирэ: “Со́скэ ту наˍкэрэ́с одова́ со припхэндя́ ца́рё?” ⁴ И ракирэ́нас лэ́скэ адава́ бу́т дэвэса́, а ёв наˍшунэ́лас лэ́н, и ёнэ́ роспхэндэ́ адава́ Амано́скэ, со́б тэˍдыкхэ́н со авэ́ла Мардохеё́са адя́кэ сы́р ёв пхэндя́ со ёв иуде́ё. ⁵ Сы́р удыкхья́ Ама́но, со Мардохе́ё наˍпэрэ́л по чянґа́ анґи́л лэ́стэ, и холясыя́ Ама́но барэ́ холя́са. ⁶ И наˍзакамья́ Ама́но тэˍумарэ́л екхэ́с Мардохеё́с, па́л одова́ со лэ́скэ роспхэндэ́ па́л ро́до Мардохеё́ско. И закамья́ Ама́но тэˍумарэ́л сарэ́н манушэ́н родо́стыр Мардохеё́скирэстыр савэ́ исы́н иуде́и, савэ́ исы́с до ца́рство Артаксерксо́скиро. ⁷ Дэ пе́рво чё́н. саво́ кхарэ́лпэ Ниса́но, до дэшуду́йто бэ́рш сы́р исы́с царё́са Артаксе́рксо, чюрдэ́нас жре́биё, анґи́л Амано́стэ дэвэ́с дэвэсэ́стыр и чё́н чёнэ́стыр, (тэˍуджинэ́н дэ саво́ дэвэ́с тэˍумарэ́н иудее́н) и выпэя́ пэ дэшуду́йто чё́н саво́ кхарэ́лпэ Ада́ро. ⁸ И пхэндя́ Ама́но царё́скэ Артаксерксо́скэ: “Исы́н е́кх народо саво́ дживэ́л до фо́ры пи́р саро́ тыро́ ца́рство, саво́ пририкирэ́лпэ кэ пэ́скирэ зако́ны, а пи́р тырэ́ зако́ны наˍдживэ́л, и мэ́к ца́рё наˍачки́рла адава́ адя́кэ. ⁹ Сы́р закамэ́ла ца́рё, то мэ́к зачинэ́л до лы́л со́б тэˍумарэ́н лэ́н, и мэ отда́ва дэ́ш барья́ рупунэ́ ловэ́ до васта́ ко́н кэрэ́ла адая́ буты́, тэˍавэ́л буты́р барвалыпэ́н кэ ца́рё”. ¹⁰ И злыя́ ца́рё анґрусны́ пэ́скирэстыр вастэ́стыр и отдыя́ Амано́скэ, чявэ́скэ Амадафо́скирэскэ, вуґеянино́скэ, саво́ исы́н вра́ґо иудее́нґо. ¹¹ И пхэндя́ ца́рё Амано́скэ: “Адава́ ту́кэ рупунэ́ ловэ́, со́б тэˍкэрэ́с адалэ́нса манушэ́нса со ту ґинэ́с хвэды́р”. ¹² И скхардэ́ одолэ́н ко́н зачинэ́л ца́рска лава́ до лы́л до пе́рво чё́н, дэшутри́то дэвэ́с, исы́с саро́ зачиндо́ адя́кэ сы́р пхэндя́ Ама́но, сарэ́нґэ шэралэ́нґэ дэ сарэ́ фо́ры царё́скирэ, и пи́р сарэ́ народы пэ лэ́нґири чи́б, – тэˍавэ́л зачиндо́ лавэ́стыр царёскирэ́стыр Артаксерксо́скирэстыр и пикады́ печя́ть анґрусня́са царё́скирьяса. ¹³ И розбичядэ́ мануша́ лыла́ пи́р сарэ́ фо́ры царё́скирэ, со́б тэˍумарэ́н, тэˍхаскирэ́н сарэ́н иудее́н, тыкнэ́н и пхурэ́н, чяворэ́н и джювле́н дэ дэшутри́то дэвэ́с дэ дэшуду́йто чё́н, саво́ кхарэ́лпэ Ада́ро, и лэ́нґиро барвалыпэ́н тэˍрозчёрэ́н. ¹⁴ Адалэ́ лыла́ авэ́на пиридынэ́ дэ сарэ́ фо́ры, тэˍджинэ́н сарэ́, со авэ́ла дэ адава́ дэвэ́с. ¹⁵ И бичявдэ́ исы́с мануша́ тэˍрозлыджя́н адалэ́ лыла́ сы́р припхэндя́ лэ́нґэ ца́рё, савэ́ исы́с зачиндэ́ дэ баро́ фо́ро Су́зы. Ца́рё и Ама́но бэшнэ́ тэˍха́н тэˍпье́н, а мануша́ дэ фо́ро исы́с дрыва́н пиридарадэ́.