¹ Сы́р адава́ саро́ проґия́, и холы́ проґия́ ко ца́рё Артаксе́рксо, ёв зрипирдя́ па́л Асти́нь и па́л одова́, со ёй кэрдя́, и сэ́ндо саво́ ла сэндякирдэ́. ² И пхэндэ́ тэрнэ́ мануша́ слу́ґи царё́скирэ: “Мэ́к родэ́н ва́ш царё́скэ тэрнэ́н гожонэ́н чяе́н, ³ и мэ́к чивэ́л ца́рё манушэ́н савэ́ лэ́на тэˍдыкхэ́н до фо́ры пи́р саро́ ца́рство, и мэ́к ёнэ́ скэдэ́н тэрнэ́н гожонэ́н чяе́н до Су́зы баро́ фо́ро, до джювли́тко кхэ́р, па́л саво́ дыкхэ́л Ґеґа́ё – ца́рско е́внухо, и ёв дыкхэ́л па́л джювле́ндэ. И мэ́к дэ́н лэ́нґэ саро́, со трэ́би, ⁴ и чя́й, сави́ чялё́ла царё́скэ, авэ́ла цари́ца пэ Астина́ко штэ́то”. И чялыя́ адава́ ла́в царё́скэ и ёв адя́кэ и скэрдя́. ⁵ Дэ Су́зы, баро́ фо́ро, исы́с е́кх ману́ш, иуде́ё лэ́с кхарэ́нас Мардохе́ё, чяво́ Иаиро́ско, чяво́ Семеё́скиро, чяво́ Киса́скиро – вениамитя́нино, ⁶ саво́ исы́с пирилыджино́ Иерусалимо́стыр авирэ́нса пленникэ́нса, савэ́н пирилыджинэ́ Иехониё́са, царё́са Иудея́кирэса, савэ́н пирилыджия́ Навуходоно́соро ца́рё Вавило́нско. ⁷ Ёв выбарьякирдя́ Ґада́сса, ёй жэ исы́н Есфи́рь, чя́й какэ́скири, адя́кэ сы́р наˍисы́с ла́тэ ни да ни дадэ́с, и адая́ чя́й исы́с тэрны́ и дрыва́н ґо́жо, сы́р кэ ёй мэя́ да́й и да́д ла кэпэ́ лыя́ Мардохе́ё и выбарьякирдя́ сы́р пэ́скирья чя. ⁸ И тэ́нче сы́р выґия́ ла́в саво́ припхэндя́ ца́рё, и исы́с скэдынэ́ бу́т чяя́ до баро́ фо́ро Су́зы, до кхэ́р па́л саво́ дыкхэ́лас Ґеґа́ё, тэ́нче яндэ́ и Есфиря́ до кхэ́р царё́скиро, тэˍкандэ́н Ґеґаё́с саво́ дыкхэ́л па́л чяе́ндэ. ⁹ Чялыя́ адая́ чяёри́ лэ́скэ, адя́кэ сы́р ёй исы́с дрыва́н ґо́жо дэ лэ́скирэ якха́ и ёй попэя́ лачипэ́н лэ́стыр, и ёв пиридыя́ ла́кэ макхипэна́ тэˍмакхэ́лпэ и саро́ ва́ш ла́киро миштыпэ́н и эфта́ джювле́н савэ́ лэ́на ла́кэ тэˍслужынэ́н, и ёв пирилыджия́ ла и ла́кирэн служанкэ́н до хвэды́р штэ́то саво́ исы́с до джювли́тко кхэ́р. ¹⁰ Есфи́рь наˍроспхэнэ́лас катхы́р ёй и савэ́стыр родо́стыр, па́л адава́ со ла́кэ Мардохе́ё припхэндя́ тэˍна́ˍроспхэнэл. ¹¹ Сарэ́ дэвэса́ Мардохе́ё явэ́лас кэ джювли́тко кхэ́р, тэˍуджинэ́л сы́р састыпэ́н кэ Есфи́рь, и сы́р ла́кэ одо́й дживэ́лпэ. ¹² И сы́р поджя́лас дэвэ́с тэˍзаджя́л чя́кэ ко ца́рё Артаксе́рксо ёй дэшуду́й чёна́ макхэ́ласпэ ксилэ́са сми́рна и ла́дано и кэрэ́нас ла́кэ саро́ со трэ́би ва́ш джювле́нґэ и сы́р проджя́нас адалэ́ дэвэса́, ¹³ чя́й заджя́лас ко ца́рё. И саро́ со ёй камэ́лас тэˍлэ́л пэ́са джювлитконэ́стыр кхэрэ́стыр до кхэ́р царё́скиро ла́кэ наˍзапхэнэ́нас тэˍлэ́л пэ́са. ¹⁴ Бэвэля́ко ёй заджя́лас. а утро́са рисё́лас дэ ави́р джювли́тко кхэ́р, па́л саво́ дыкхэ́лас Шаазґа́зо, е́внухо царё́скиро саво́ дыкхэ́л па́л ромне́ндыр. Ёй буты́р наˍзаджя́лас ко ца́рё, кэ одова́ сы́р ца́рё ла наˍзакамэ́ла, и ла наˍкхарэ́на пи́р ла́ко ла́в. ¹⁵ И сы́р подґия́ дэвэ́с Есфиря́ко, чя́кэ Абихаило́скирякэ, какэ́скири Мардохеё́скири, саво́ выбарьякирдя́ ла сы́р пэ́скирья чя, тэˍджя́л ко ца́рё, ёй наˍманґья́ ничи́, е́кх одова́ со пхэндя́ ла́кэ Ґеґа́ё, е́внухо царё́скиро саво́ дыкхэ́л па́л чяе́ндэ. И чялыя́ Есфи́рь сарэ́нґэ ко́н дыкхья́ ла. ¹⁶ И лыджинэ́ Есфи́рь ко ца́рё Артаксе́рксо, дэ лэ́скиро кхэ́р, до дэшы́тко чё́н, саво́ кхарэ́лпэ Тебе́фо, дэ эфта́то бэ́рш сы́р ёв исы́с царё́са. ¹⁷ И покамья́ ца́рё Есфиря́ буты́р сарэ́ндыр ромне́ндыр, и отлыджя́ласпэ кэ ёй лачипна́са буты́р сарэ́ндыр чяе́ндыр, и ёв вридя́ ла́кэ по шэро́ коро́на и кэрдя́ ла царица́са пэ Астина́ко штэ́то. ¹⁸ И кэрдя́ ца́рё баро́ свэ́нко ва́ш пэ́скирэнґэ шэралэ́нґэ и слуґэ́нґэ – свэ́нко Есфиря́кэ! И дэ сарэ́ фо́ры ёв кэрдя́ свэ́нко, со́б дэ адалэ́ дэвэса́ мануша́ тэˍна́ˍпокинэн нало́ґи и роздыя́ лэ́нґэ лачипэна́ пэ́скирэ вастэ́стыр. ¹⁹ Сы́р скэдынэ́ чяе́н ави́р мо́ло, Мардохе́ё исы́с бэшто́ па́ш царё́скирэ вуда́ры, ²⁰ Есфи́рь наˍроспхэнэ́лас конэ́скири ёй и савэ́стыр родо́стыр, сы́р припхэндя́ ла́кэ Мардохе́ё, И Есфи́рь наˍвыджя́лас лэ́скирэ лавэ́стыр, и кандэ́лас лэ́с адя́кэ сы́р ёй дживэ́лас кэ ёв. ²¹ Дэ одолэ́ дэвэса́ сы́р исы́с Мардохе́ё бэшто́ па́ш вуда́ры царё́скирэ, холясынэ́ Ґава́фа и Фа́рра, ду́й царё́скирэ е́внухи савэ́ дыкхэ́нас па́л лэ́скиро кхэ́р, ёнэ́ закамнэ́ тэˍумарэ́н царё́с Артаксе́рксо. ²² И уджиндя́ адава́ ры́ндо Мардохе́ё. и пирипхэндя́ ёв саро́ Есфиря́кэ, царица́кэ, а Есфи́рь роспхэндя́ царё́скэ со ла́кэ пирипхэндя́ Мардохе́ё. ²³ И роздыкхнэ́ адава́ ры́ндо и попэнэ́ ко́н банґо́, и лэ́н сарэ́н дуе́н убладэ́ и исы́с зачиндо́ адава́ ры́ндо до лыла́ савэ́ лыджя́наспэ до дэвэса́ царё́скирэ.