¹ Исы́с до дэвэса́ Артаксерксо́скирэ: ёв Артаксе́рксо исы́с царё́са Индия́тыр кэ Ефио́пия пэ шэ́л би́ш эфта́ фо́ры, – ² до дэвэса́ сы́р, исы́с бэшто́ ца́рё Артаксе́рксо пэ пэ́скиро ца́рско тро́но, саво́ исы́с до баро́ фо́ро Су́зы, ³ пэ три́то бэ́рш сы́р ёв исы́с царё́са скэрдя́ баро́ свэ́нко ва́ш сарэ́нґэ пэ́скирэнґэ шэралэ́нґэ и ко́н исы́с па́ш лэ́ндэ, ва́ш барэ́нґэ салдатэ́нґирэ шэралэ́нґэ пи́р Пе́рсия и Ми́дия, и шэралэ́нґэ сарэ́ форэ́ндыр анґи́л лэ́стэ, ⁴ ёв сыкавэ́лас пэ́скиро дрыва́н барвало́ ца́рство и пэ́скиро вучипэ́н савэ́са шарэ́ласпэ бу́т дэвэса́ – шэ́л охто́ дэвэса́. ⁵ Сы́р проґинэ́ адалэ́ дэвэса́ скэрдя́ ца́рё свэ́нко сарэ́нґэ манушэ́нґэ, барэдырэ́стыр ко тыкно́ савэ́ дживэ́нас до баро́ фо́ро Су́зы, свэ́нко адава́ исы́с эфта́ дэвэса́ дэ са́до саво́ исы́с до дво́ро царё́скиро: ⁶ парнэ́ лёно́ва и ґолу́бова мате́рьи, припхандэ́ сумнакунэ́ тхавэ́нса ко рупунэ́ анґрусня́ и ко мра́морна сто́лбы: штэ́ты па́л савэ́ исы́с пашлэ́ мануша́ сарэ́ до сумнака́й и ру́п и дроґонэ́ндыр барэ́ндыр. ⁷ пье́нас сумнакунэ́ндыр тахтае́ндыр, и тахтая́ исы́с савэ́ камэ́с, и ви́но ко ца́рё исы́с бу́т, пи́р барвалыпэ́н лэ́скиро. ⁸ Пье́нас ко́н скицы́к камэ́лас и нико́н наˍзапхэнэ́лас, па́л одова́ со ца́рё адя́кэ припхэндя́ бутярнэ́нґэ дэ пэ́скиро кхэ́р. ⁹ Адя́кэж Асти́нь, цари́ца, скэрдя́ свэ́нко ва́ш джювле́нґэ савэ́ исы́с до кхэ́р ко ца́рё Артаксе́рксо. ¹⁰ Пэ эфта́то дэвэ́с, сы́р подпия́ ца́рё и лэ́скиро ило́ исы́с лошало́ вино́стыр, ёв пхэндя́ Меґумано́скэ, Бизфе́скэ, Харбано́скэ, Биґфе́скэ и Аваґфо́скэ, Зафаро́скэ и Каркасо́скэ – эфта́ евнухэ́нґэ, савэ́ исы́с бутярнэ́нса анґи́л царё́стэ Артаксерксо́стэ, ¹¹ тэˍкхарэ́н цари́ца Асти́нь ко ца́рё, дэ ца́рско коро́на, ва́ш одова́ со́б ёй тэˍсыкавэ́л манушэ́нґэ пэ́скиро ґожыпэ́н, па́л одова́ со ёй исы́с дрыва́н ґо́жо пэ́са. ¹² Нэ цари́ца Асти́нь отпхэндя́пэ тэˍявэ́л ко ца́рё, саво́ бичявдя́ кэ ёй евнухэ́н. И дрыва́н розхоля́сыя ца́рё, и захачи́я дэ лэ́стэ холы́. ¹³ И пхэндя́ ца́рё ґодявирэ́нґэ манушэ́нґэ савэ́ джинэ́н пуранэ́ зако́ны, – па́л одова́ со адя́кэ кэрэ́лас ца́рё анґи́л сарэ́ндэ ко́н джинэ́лас зако́но и сэ́ндо, – ¹⁴ а па́ш лэ́стэ исы́с Каршэ́но, Шэфа́ро, Адма́фо, Фарси́со, Мере́со, Марсе́но, Мемуха́но – эфта́ шэралэ́ пи́р Пе́рсия и Ми́дия, ёнэ́ сарэ́ кхэтанэ́ роскэдэ́нас ца́рска ры́нды: ¹⁵ “Со трэ́би тэˍкэра́с пи́р зако́но царица́са Асти́нь па́л одова́ со ёй наˍкандыя́ и наˍявья́ сы́р припхэндя́ ла́кэ ца́рё Артаксе́рксо, сы́р бичявдя́ кэ ёй евнухэ́н?” ¹⁶ И пхэндя́ Мемуха́но анґи́л царё́стэ и шэралэ́ндэ: “Нанэ́ анґи́л екхэ́стэ царё́стэ банґи́ цари́ца Асти́нь, нэ анґи́л сарэ́ндэ шэралэ́ндэ и сарэ́ндэ манушэ́ндэ савэ́ дживэ́н пи́р сарэ́ фо́ры царё́скирэ Артаксерксо́скирэ, ¹⁷ па́л одова́ со ры́ндо ла́киро доджя́ла кэ сарэ́ джювля́ и тэ́нче ёнэ́ наˍлэ́на тэˍкандэ́н и тэˍполэ́н пэ́скирэн ромэ́н и пхэнэ́на: “Ца́рё Артаксе́рксо припхэндя́ тэˍявэ́л кэ ёв Асти́нь а ёй наˍявья́”. ¹⁸ И дэ одова́ дэвэ́с пхэнэ́на княґи́ни Перси́дска и Миди́йска, савэ́ шунэ́на ла́киро ры́ндо со кэрдя́ цари́ца, и тэ́нче авэ́ла сарэ́нґэ шэралэ́нґэ холы́ и наˍлэ́на тэˍполэ́н е́кх – екхэ́с. ¹⁹ Сы́р камэ́л ца́рё, мэ́к выджя́л лэ́стыр ца́рско ла́в, саво́ авэ́ла зачиндо́ до зако́но пи́р Пе́рсия и Ми́дия и наˍотлэ́лапэ, со́б Асти́нь буты́р тэˍна́ˍзаджял ко ца́рё Артаксе́рксо, и пэ ла́киро штэ́то тэˍвыкэдэ́н авирья́ цари́ца сави́ лэ́ла тэˍкандэ́л. ²⁰ И розджя́лапэ ла́в саво́ припхэндя́ ца́рё пи́р саро́ лэ́скиро баро́ ца́рство, и сарэ́ ромня́ тэ́нче лэ́на тэˍполэ́н и тэˍкандэ́н пэ́скирэн ромэ́н”. ²¹ И адава́ ла́в чялыя́ царё́скэ и сарэ́нґэ шэралэ́нґэ, и кэрдя́ ца́рё пи́р ла́в Мемухано́скиро. ²² И бичявдя́ ёв лыла́ пи́р сарэ́ фо́ры царё́скирэ, пи́р чиба́ пэ савэ́ ракирэ́н дэ адалэ́ фо́ры, со́б мурша́ тэˍавэ́н хулае́нса дэ пэ́скиро кхэ́р.