¹ Нэ джи́н, со явэ́на дэвэса́ пхарэ́. ² Мануша́ авэ́на тэˍкамэ́н кокорэ́ пэ́с, скэ́мпа, пхуткирдэ́, тэˍна́ˍдыкхэн пэ манушэ́ндэ, лэ́на тэˍкошэ́нпэ, тэˍнаˍкандэ́н пэ́скирья адая́ и дадэ́с, наˍпхэнэ́на наи́с, наˍпхирэ́н анґи́л Дэвлэ́стэ, ³ би илы́тка, наˍродэ́н ми́ро, кэрэ́н банґэ́са авирэ́н, нанэ́ зрикирдэ́, барунэ́ илы́тка, наˍкамэ́на лачипэ́н, ⁴ здыма́ря, наˍполэ́н со кэрэ́н, бу́т пэ пэ́стэ лэ́н, дживэ́н ва́ш пэ́скэ, а Дэвлэ́с наˍкамэ́н, ⁵ сыкавэ́нпэ со ґинэ́н Дэвлэ́с, а зорья́тыр лэ́скирьятыр отпхэндэ́пэ. А ада́савэндыр отрисё́в. ⁶ Па́л одова́ со машки́р лэ́ндэ исы́н одолэ́ савэ́ заджя́н до кхэра́ и хохаибна́са поджя́н ко джювля́ савэ́ дживэ́н до бэзэ́х, саво́ лыджя́л и росхачкирэ́л лэ́нґиро ило́, ⁷ савэ́ сыклё́н и ни сы́р наˍдоджя́на кэ одова́, со́б тэˍуджинэ́н чячибэ́н. ⁸ Адя́кэ сы́р Иани́ё и Иамри́ё ґадэ́наспэ пэ Моисеё́стэ, адя́кэ и адалэ́ ґадэ́нпэ по чячибэ́н, мануша́ хасютнэ́ ґодя́са, савэ́ наˍвырикирдэ́ до патябэ́н. ⁹ Ёнэ́ и дурэды́р наˍджя́на до патябэ́н, долэ́скэ со дылныпэ́н лэ́нґиро дыкхэ́на сарэ́, адя́кэж сы́р кэрдя́пэ долэ́нса. ¹⁰ Ту ж ґия́н па́л ма́ндэ до сыклярибэ́н, до джиипэ́н, дэ одова́ кэсо́ мэ тэрда́впэ, до патябэ́н, до вырикирибэ́н, до камлыпэ́н, пэ адава́ тэрдо́, ¹¹ сы́р традэ́нас, до пхарипэ́н, саво́ ма́нса кэрдя́пэ дэ Антио́хия, дэ Ико́ния, дэ Ли́стра. Мэ пирилыджиё́м одова́ сы́р ма́н традэнэ́, и сарэ́стыр ма́н зракхья́ миро́ Ра́й. ¹² Адя́кэж и сарэ́, ко́н камэ́л тэˍдживэ́л чячюнэ́с дэ Иисусо́стэ Христо́стэ одолэ́н лэ́на тэˍтрадэ́н. ¹³ А захалэ́ мануша́ авэ́на захалэды́р, лэ́на тэˍпатя́н хохаибна́скэ и залыджя́на до хохаибэ́н. ¹⁴ Ту а́чпэ дэ одова́, кэсо́ сыклякирдо́ и дэ со тэрдо́, джинэ́с, савэ́ манушэ́ндыр ту сыклыя́н, ¹⁵ и долэ́скэ со ту тыкнэ́ бэршэ́ндыр джинэ́с Свэ́нто Ла́в, саво́ дэ́л ту́кэ ґоды́ тэˍзракхэ́пэ пи́р патябэ́н дэ Иисусо́стэ Христо́стэ. ¹⁶ Саро́ свэ́нто Лы́л пхурдыно́ Дэвлэ́скирэ Духо́са и ёв сыклякирэ́л, сыкавэ́л по банґипэ́н, вылыджя́л по чячибэ́н, и сыкавэ́л сы́р тэˍдживэ́ до жужыпэ́н, ¹⁷ тэˍавэ́л Дэвлэ́скиро ману́ш кэ саро́ сыклякирдо́, и тэˍджинэ́л сы́р тэˍкэрэ́л лачё́ ры́ндо.