¹ Мэ солаха́в ту́т анґи́л Дэвлэ́стэ и Иисусо́стэ Христо́стэ, саво́ лэ́ла тэˍсындякирэ́л мулэ́н и джидэ́н, сы́р явэ́ла Ёв, Пэ́скирэ Ца́рствоса, – ² ра́кир Ла́в, сы́р ту́кэ локхэ́с и сы́р ту до пхарипэ́н. Сыка́в по банґипэ́н, запхэ́н, подри́кир сарэ́са вырикирибна́са и сыклярибна́са. ³ Па́л одова́ со авэ́на дэвэса́, со чячюно́ сыклярибэ́н тэˍприлэ́н наˍлэ́на, нэ пи́р пэ́скиро камлыпэ́н лэ́на тэˍвыкэдэ́н пэ́скэ сыклярибнаре́н, савэ́ ракирэ́н одова́ со ёнэ́ камэ́н тэˍшунэ́н, ⁴ а чячибна́стыр отрисё́на, и лэ́на тэˍшунэ́н парами́цы. ⁵ Нэ ту яв ґодяви́р дэ саро́, пирилы́джя пхарипэ́н, лы́джя Дэвлэ́скиро Ла́в, кэ́р буты́ тыри́ сы́р трэ́би. ⁶ Па́л одова́ со мэ отда́впэ мирэ́ Дэвлэ́скэ саро́, и джиипэ́н миро́ подґия́ кэ одова́, со́б тэˍуджя́л. ⁷ Бу́т зо́р причюдё́м мэ кэ буты́, саро́ скэрдё́м, патябэ́н зракхьё́м. ⁸ А кана́ дужакирэ́л ма́н Свэ́нто ве́нцо, саво́ дэ́ла ма́нґэ амаро́ Ра́й дэ одова́ Дэвэ́с, чячюно́ Сэнда́рё. И нанэ́ екхэ́скэ ма́нґэ, нэ и сарэ́нґэ ко́н до камлыпэ́н дужакирэ́л Лэ́с. ⁹ Манґа́в ту́т сы́ґэс яв кэ мэ, ¹⁰ адя́кэ сы́р Дима́со ма́н ачкирдя́, со воскамья́ адава́ свэ́то, и уґия́ дэ Фисало́ника, Криске́то дэ Ґа́лия, Ти́то дэ Далма́тия. ¹¹ Е́кх о Лука́ ма́нса. Ма́ркос лэ пэ́са, па́л одова́ со ёв ма́нґэ трэ́би ва́ш свэ́нто буты́. ¹² Тихико́с мэ бичявдё́м до Ефе́со. ¹³ Пла́що, саво́ мэ ачкирдё́м дэ Троа́да ко Ка́рпо, ян ма́нґэ сы́р лэ́са тэˍджя́с, и лыла́ на́ˍбистыр, одолэ́ савэ́ цыпы́тка. ¹⁴ Алекса́ндро кузне́цо дрыва́н бу́т кэрдя́ ма́нґэ холы́. Мэ́к дэ́л лэ́скэ амаро́ Ра́й пи́р лэ́скирэ ры́нды. ¹⁵ Лэ́стыр и ту ра́кхпэ, па́л одова́ со ёв дрыва́н ґадэ́ласпэ пэ амарэ́ лава́. ¹⁶ Пэ сэ́ндо ма́нса никонэ́с наˍисы́с, сарэ́ ма́н ачкирдэ́. Мэ́к лэ́нґэ адава́ наˍзаґинэ́лапэ. ¹⁷ Амаро́ Ра́й исы́с ма́нса и дыя́ ма́нґэ зо́р, со́б ла́в саво́ мэ ракира́в тэˍавэ́л пхэрдо́ и тэˍшунэ́н сарэ́ мануша́. И Дэвэ́л зракхья́ ма́н барэ́ бида́тыр. ¹⁸ Зракхэ́ла ма́н миро́ Ра́й сарэ́ндыр захалэ́ндыр рындэ́ндыр и зракхэ́ла ма́н ва́ш Ца́рство Пэ́скиро Болыбны́тко. Лэ́скэ сла́ва дэ сарэ́ бэрша́, ами́нь! ¹⁹ Пиридэ́ покло́но Прискила́скэ и Акила́скэ и до кхэ́р Онисифоро́ско. ²⁰ Ера́сто ачкирдя́пэ до Кори́нфо. А Трофимо́с мэ ачкирдё́м насвалэ́с до Мили́то. ²¹ Яв кэ мэ ко мра́зы. Пиридэ́л ту́кэ покло́но Евву́ло, и Пу́до, и Ли́но, и Кла́вдия, и пшала́. ²² Амаро́ Ра́й духо́са тырэ́са. Лачипэ́н тумэ́нґэ.