¹ Ракира́в, ту, чяворо́ миро́, зоралё́в до лачипэ́н, саво́ дэ Христо́стэ Иисусо́стэ, ² и одова́ со шундя́н ма́ндыр анґи́л бутэ́ндэ манушэ́ндэ, одова́ пиридэ́ одолэ́нґэ, ко́н джинэ́ла тэˍсыклякирэ́л авирэ́н манушэ́н. ³ Лы́джя пхарипэ́н сы́р састо́ во́ино Иисусо́ско Христо́ско. ⁴ Адя́кэж сы́р салда́то трэ́би тэˍвырикирэ́л саро́ до кандыпэ́н пэскирэ́скэ шэралэ́скэ и на́ˍдуминэл па́л джиипны́тка ры́нды. ⁵ Нэ сы́р ко́н праста́л па́л ве́нцо и наˍвыкхэлэ́л лэ́с, адава́ долэ́скэ со праста́л нанэ́ пи́р зако́но. ⁶ Ко́н кэрэ́л буты́ пэ маля́ одова́ пе́рво ха́ла ла́кирэ пло́ды. ⁷ Полэ́, со мэ, ракира́в, па́л одова́ со дэ́ла ту́кэ амаро́ Ра́й тэˍроскэдэ́спэ дэ саро́. ⁸ Ри́пир Иисусо́с Христосо́с, саво́ вштыя́ мулэ́ндыр, родо́стыр Давидо́скирэстыр, адя́кэ сы́р чиндо́ до Ла́в ми́ро, ⁹ дэ саво́ мэ лыджя́в пхарипэ́на ко бэшыбэ́н. Нэ ва́ш Ла́в Дэвлэ́скиро бэшыбэ́н нанэ́. ¹⁰ Па́л адава́ мэ саро́ вырикира́в па́л выкэдынэ́ндэ манушэ́ндэ, со́б и ёнэ́ тэˍдорэсэ́н ко зракхипэ́н дэ Иисусо́стэ Христо́стэ дэ ве́чно сла́ва. ¹¹ Чячюно́ ла́в: “Сы́р амэ́ кхэтанэ́ мэя́м, кхэтанэ́ ла́са и тэˍджива́с, ¹² сы́р лыджя́с пхарипэ́н, кхэтанэ́ и ца́рствовать ла́са, сы́р отпхэна́сапэ, тэ́нче и Ёв отпхэнэ́лапэ амэ́ндыр, ¹³ сы́р амэ́ хоханэ́, Ёв ачкирэ́лпэ чячюно́, па́л одова́ со Кокоро́ Пэ́стыр наˍотпхэнэ́лапэ”. ¹⁴ Адава́ прири́пир, и допхэ́н анґи́л Дэвлэ́стэ тэˍна́ˍзаханпэ па́л лава́. Адалэ́стыр нанэ́ нисаво́ лачипэ́н, а отчюрдэ́л одолэ́н ко́н шунэ́л. ¹⁵ Причю́в зо́р тэˍавэ́с анґи́л Дэвлэ́стэ вырикирдо́ до пхарипэ́н, саво́ наˍдарэ́л и наˍладжя́л нисавя́тыр бутя́тыр, прочивэ́л дро́м чячюнэ́ Лавэ́скэ. ¹⁶ Йивьятунэ́ ракирибна́стыр на́ш, па́л одова́ со ёнэ́ дурэды́р отлыджя́н Дэвлэ́стыр, ¹⁷ и лава́ адалэ́ сы́ґэс розджя́нпэ сы́р насвалыпэ́н. Машки́р лэ́ндэ Имени́ё и Фили́то, ¹⁸ савэ́ отґинэ́ чячибна́стыр, ракирэ́н, со уштыпэ́н мулэ́нґиро проґия́ и адалэ́са розмарэ́н патябэ́н манушэ́нґэро. ¹⁹ Нэ зорало́ фунда́менто Дэвлэ́скиро тэрдо́, пэ саво́ чиндо́: “…ґалыя́ амаро́ Ра́й, ко́н Лэ́скирэ” и “Мэ́к отджя́л бэзэхо́стыр одова́ ко́н прикхарэ́л ла́в амарэ́ Рае́скиро”. ²⁰ А дэ баро́ кхэ́р исы́н сумнакунэ́ кхорэ́ и рупунэ́, исы́н и каштунэ́ и ґлина́тыр. И адя́кэж сы́р е́кх ва́ш жужыпэ́н, а ави́рта ва́ш мэлалыпэ́н. ²¹ А кана́ ко́н жужаки́рла пэ́с адалэ́стыр, авэ́ла жужо́, свэ́нто, саво́ трэ́би Хула́скэ, ва́ш лачё́ ры́ндо тэрдо́. ²² Уджя́ бэзэхо́стыр кэ саво́ тэрдэ́лпэ тэрнэпэ́н, а ты́рдэпэ ко жужыпэ́н, патябэ́н, камлыпэ́н, ми́ро кхэтанэ́ долэ́нса ко́н прикхарэ́л амарэ́ Рае́с жужэ́ илэ́са. ²³ Дылынэ́ и на́ˍлаче ракирибна́стыр уджя́, джи́н со адава́ лыджя́л ко кошыбэ́н. ²⁴ Бутярнэ́скэ Хула́са наˍтрэ́би тэˍзаха́пэ, нэ тэˍавэ́л ковлэ́ илэ́са кэ сарэ́, тэˍджинэ́л тэˍсыклякирэ́л, тэˍавэ́л вырикирдо́, ²⁵ нэ ковлэ́ лавэ́нса тэˍдопхэнэ́л ко́н заха́лпэ: чи наˍдэ́ла лэ́нґэ Дэвэ́л тэˍпорисё́н и тэˍґалё́н чячибэ́н, ²⁶ и ёнэ́ бы нашэ́нас бэнґэ́скирэстыр вастэ́стыр, саво́ ухтылдя́ лэ́н тэˍкэрэ́н лэ́скири во́ля.