¹ Па́вло, апо́столо Иисусо́ско Христо́ско пи́р во́ля Дэвлэ́скири, адя́кэ сы́р ракирдо́ па́л джиипэ́н, саво́ дэ Христо́стэ Иисусо́стэ, – ² Тимафеё́скэ чявэ́скэ савэ́с мэ кама́в. Лачипэ́н, ми́лость, ми́ро Дэвлэ́стыр Дадэ́стыр и Христо́стыр Иисусо́стыр амарэ́стыр Рае́стыр. ³ Наи́с пхэна́в Дэвлэ́скэ, савэ́с ґина́в мирэ́ дадэ́ндыр жужэ́ патыва́са, сы́р наˍпирьячя́в тэˍзрипира́в ту́т до манґипэ́н миро́ ра́т и дэвэ́с, ⁴ рипира́в тырэ́ ясва́ и кама́м тэˍдыкха́в ту́т, со́б тэˍпхэрдё́л лоша́са миро́ ило́, ⁵ адя́кэ ж зрипира́в чячюно́ патябэ́н дэ ту́тэ, саво́ исы́с дэ тырэ́ пхуромня́тэ Лоида́тэ и кэ тыри́ да́й Е́вника. Патя́в со, ёв и дэ ту́тэ. ⁶ Па́л адава́ ракира́в ту́кэ тэˍросхачкирэ́с яґ дэ да́ро Дэвлэ́скиро, саво́ исы́н кэ ту сы́р мэ чивдё́м васта́ мирэ́ пэ ту́тэ. ⁷ Па́л адава́ со Дэвэ́л наˍдыя́ амэ́нґэ ду́хо тэˍдара́с, нэ дыя́ зо́р и камлыпэ́н, и ґодя́са тэˍпола́с. ⁸ Па́л адава́ на́ˍладжя тэˍроспхэнэ́с па́л амарэ́стэ Рае́стэ Иисусо́стэ, и ма́ндыр на́ˍладжя саво́ до бэшыбэ́н, нэ пирилы́джя пхарипэ́н па́л Ла́в, зорья́са дэ Дэвлэ́стэ, ⁹ саво́ зракхья́ и прикхардя́ амэ́н тэˍава́с свэ́нта нанэ́ пи́р амарэ́ ры́нды, нэ адя́кэ сы́р скамья́ Ёв тэˍдэ́л лачипэ́н амэ́нґэ дэ Иисусо́стэ Христо́стэ кэ одова́ сы́р исы́с скэрдо́ свэ́то, ¹⁰ сыкадо́ а кана́ сы́р явья́ амаро́ Зракхипна́рё, Иису́со Христо́со, саво́ наˍачки́рла мулэ́нса, и дэ́ла ве́чно джиипэ́н сы́р чиндо́ дэ Лэ́скиро Ла́в, ¹¹ ва́ш саво́ ма́н чивдя́ апостоло́са, и сыклымарё́са саво́ лыджя́л Лэ́скиро ла́в. ¹² Па́л адава́ и лыджя́в адава́ пхарипэ́н и наˍладжя́в, па́л адава́ со джина́в, Конэ́скэ патя́ндыём, и джина́в, со Ёв зорало́ тэˍзракхэ́л миро́ зало́ґо кэ одова́ Дэвэ́с. ¹³ Дыкх пэ чячюно́ сыклярибэ́н, саво́ ту шундя́н ма́ндыр до патябэ́н и камлыпэ́н дэ Христо́стэ Иисусо́стэ. ¹⁴ Ракх лачё́ зало́ґо дэ зо́р Свэнтонэ́ Духо́са, саво́ дживэ́л дэ амэ́ндэ. ¹⁵ Ту адава́ джинэ́с, со отрисинэ́ ма́ндыр сарэ́, ко́н дэ А́сия, машки́р лэ́ндэ Фи́ґело и Ермоґе́но. ¹⁶ Мэ́к дэ́л Ра́й амаро́ ми́лость до кхэ́р Онисифоро́скэ, долэ́скэ со ёв бу́т мо́лы ма́н подрикирдя́ и мирэ́ бэшыбна́стыр наˍполаджя́ндыя, ¹⁷ нэ сы́р исы́с до Ри́мо зоралэ́с родэ́лас ма́н и попэя́. ¹⁸ Мэ́к дэ́л лэ́скэ Ра́й амаро́ тэˍпопэрэ́л ми́лость ко Дэвэ́л дэ одова́ Дэвэ́с. А со́са до Ефе́со ёв ма́нґэ дыя́ ра́да, ту хвэды́р джинэ́с.