¹ Пэ пуранэ́ манушэ́стэ на́ˍґадэ ґло́с нэ ра́кир лэ́са сы́р дадэ́са, тэрнэ́ чявэ́нса – сы́р пшалэ́нса, ² пуранэ́ джювле́нса сы́р дае́нса, тэрнэ́ чяе́нса – сы́р пхэне́нса саро́ жужэ́ илэ́са. ³ Джювле́нса савэ́ндэ мэя́ ро́м, обджя́пэ патыва́са. ⁴ Сы́р кэ сави́ джювлы́ исы́н чявэ́ чи вну́ки, то мэ́к ёнэ́ сыклё́н тэˍдыкхэ́н па́л пэ́скирэ се́мьи и мэ́к дыкхэ́н па́л пэ́скирэ дадэ́ндэ, па́л адава́ со ада́ ку́ч дэ Дэвлэ́скирэ якха́. ⁵ Сы́р манушны́ чяче́с ачя́пэ кокори́ би ромэ́скиро, ёй отдэ́лпэ и патя́л Дэвлэ́скэ и на́ˍпирьячел тэˍманґэ́л и тэˍманґэ́лпэ Лэ́скэ, дэвэ́с и ра́т. ⁶ А сави́ дживэ́л сы́р ла́кэ камэ́лпэ, ґи́н со ёй мулы́. ⁷ Припхэ́н адава́, со́б пэ лэ́ндэ тэˍна́ˍракирэн на́ˍлачё ла́в. ⁸ Сы́р ко́н па́л пэ́скирэндэ и па́л се́мьи наˍдыкхэ́л, одова́ отпхэндя́пэ патябна́стыр и ёв нанэ́ хвэды́р одолэ́стыр ко́н наˍпатя́л. ⁹ Мэ́к зачинэ́н до лы́л, одола́ джювля́ сави́ ачя́пэ би ромэ́ско, сы́р ла́кэ авэ́ла шовдэ́ша бэ́рш и буты́р, и ла́тэ исы́с е́кх ро́м, ¹⁰ ёй приджинды́ дэ лаче́ ры́нды, выбарьякирдя́ чяворэ́н, прилэ́лас кэпэ́ до кхэ́р манушэ́н, подэ́лас паны́ тэˍморэ́н гэра́ свэ́нта мануша́, подэ́лас ва́ст конэ́скэ исы́с пхаро́, сы́р кэрэ́лас бу́т лаче́ ры́нды. ¹¹ А тэрнэ́н джювле́н савэ́ндэ мэя́ ро́м на́ˍприлэ лэ́н. Па́л одова́ со ёнэ́ сы́р барвалё́н лэ́н тэˍнаˍкандэ́н Дэвлэ́с и камэ́н тэˍджя́н палэро́м, ¹² адалэ́са попэрэ́н до сэндякирибэ́н, со наˍачнэ́пэ чячюнэ́ пэ́скирэ патябна́скэ. ¹³ Кэ одова́ сы́р нанэ́ со тэˍкэрэ́н ёнэ́ сыклё́н тэˍпхирэ́н йивья́ кхэрэ́стыр до кхэ́р, и бу́т ракирэ́н со наˍтрэ́би. ¹⁴ Па́л адава́, мэ кама́м, со́б тэрнэ́ джювля́ савэ́ ачнэ́пэ би ромэ́скиро, тэˍвыджя́н палэро́м, тэˍбиянэ́н чяворэ́н, тэˍавэ́н хулане́нса до кхэ́р, тэˍна́ˍавэл пэ лэ́ндэ на́ˍлачё ракирибэ́н. ¹⁵ Па́л одова́ со исы́н да́савэ савэ́ порисинэ́ пэ дро́м бэнґэ́ско. ¹⁶ Сы́р кэ патянкуны́ джювлы́, исы́н джювлы́ савя́тэ мэя́ ро́м, мэ́к ла подркирэ́л, со́б кханґирья́кэ тэˍавэ́л локхэды́р, и тэˍдыкхэ́н па́л одолэ́ндэ джювле́ндэ савэ́ндэ никонэ́с нанэ́. ¹⁷ Рашая́, савэ́ ку́ч лыджя́н ры́нды, савэ́ исы́н до ла́в и сыклярибэ́н мэ́к авэ́на дэ бари́ паты́в. ¹⁸ Па́л одова́ со до Ла́в чиндо́: “На́ˍзакэр му́й ґурувэ́скэ саво́ кэрэ́л буты́” и “Молэ́л бутярно́ пэ́скирэ ловэ́”. ¹⁹ На́ˍприлэ пэ рашае́стэ банґипэ́н, сы́р наˍавэ́на ду́й чи три́н мануша́ тэˍдопхэнэ́н адава́. ²⁰ Ко́н кэрэ́л бэзэ́х, роспхэ́н па́ш сарэ́ндэ, со́б и ави́рта мануша́ тэˍдарэ́н тэˍкэрэ́н бэзэ́х. ²¹ Солаха́в анґи́л Дэвлэ́стэ и Иисусо́стэ Христо́стэ и анґолэ́ндэ савэ́н выкэдыя́ Дэвэ́л тэˍзракхэ́с и тэˍна́ˍпарувэс адава́, и нисо́ тэˍна́ˍкэрэс би камлыпна́ско. ²² На́ˍпраста тэˍчивэ́с васта́ ни пэконэ́стэ и на́ˍяв дэ е́кх бэзэ́х авирэ́нса манушэ́нса, ракх пэ́с до жужыпэ́н. ²³ Буты́р на́ˍпи е́кх паны́, нэ пи и на́бутка ви́но сы́р драб ва́ш тыро́ жэлу́тко и ва́ш тыро́ насвалыпэ́н. ²⁴ Исы́н бэзэха́ манушэ́нґирэ савэ́ душлэ́, и ёнэ́ джя́н анґи́л лэ́ндэ по сэ́ндо, а исы́н савэ́ джя́н па́л лэ́ндэ. ²⁵ Адя́кэж и лаче́ ры́нды исы́н савэ́ душлэ́, а исы́н савэ́ нанэ́ душлэ́ па́л савэ́ ґалё́на тэ́нче сарэ́ мануша́.