¹ Сарэ́ бутярнэ́, савэ́ дживэ́н до пхарипэ́н, мэ́к полэ́н пэ́скирэн хулае́н сарья́са патыва́са, со́б пэ Дэвлэ́скиро ла́в и сыклярибэ́н тэˍна́ˍпхэнэн дылныпэ́н. ² Бутярнэ́ конэ́стэ хулая́ патянкунэ́, мэ́к отлыджя́нпэ патыва́са, па́л одова́ со ёнэ́ пшала́, и мэ́к кэрэ́н буты́ сарэ́ илэ́стыр хулае́нґэ, па́л одова́ со ёнэ́ – патянкунэ́ савэ́н камэ́л Дэвэ́л, савэ́ кэрэ́н лачипэ́н. Сыкля́кир кэ адава́ и прикха́р. ³ Сы́р ко́н сыклякирэ́л авирэ́скэ и наˍприджинэ́л чячюнэ́ лава́ амарэ́ Рае́скирэ Иисусо́скирэ Христо́скирэ и сыклярибэ́н саво́ лыджя́л тэˍполэ́н Дэвлэ́с, ⁴ одова́ ману́ш пхуткирдо́ и нисо́ наˍполэ́л, нэ родэ́л сы́р тэˍзаха́пэ манушэ́са, камэ́л манушэнґи́ро, кэрэ́л холы́, кошэ́лпэ, наˍпатя́л манушэ́нґэ, ⁵ заха́лпэ манушэ́нса савэ́ндэ нанэ́ ґоды́ и ду́р чячибна́стыр, ґинэ́н, со тэˍполэ́ Дэвлэ́с ада́ исы́н закэрибэ́н. ⁶ Бари́ ба́хт тэˍпхира́с анґи́л Дэвлэ́стэ и тэˍава́с лошалэ́. ⁷ Па́л одова́ со амэ́ нисо́ наˍяндя́м дэ адава́ свэ́то, сы́р и ничи́ наˍвылыджя́са лэ́стыр. ⁸ Исы́н со тэˍха́с и со тэˍвря́с, ява́са лошалэ́ адалэ́са. ⁹ Мануша́ савэ́ камэ́н тэˍбарвалё́н ёнэ́ пэрэ́н до искуше́ние и вхтылэ́нпэ, и бу́т дылынэ́ и на́ˍлаче ры́нды, савэ́ ёнэ́ камэ́н, хаскирэ́л лэ́нґиро джиипэ́н. ¹⁰ Па́л одова́ со сари́ би́бахт – па́л камлыпэ́н ко ловэ́. Пи́р адава́ дро́м, бу́т ко́н ґия́ и одова́ отпэя́ патябна́стыр и кокорэ́ пэ́скэ домэкнэ́ пхарипэ́н до джиипэ́н. ¹¹ Нэ ту, Дэвлэ́скиро ману́ш, на́ˍкэр адя́кэ. Нэ ро́дэ чячибэ́н, сы́р тэˍполэ́с Дэвлэ́с, яв до патябэ́н, до камлыпэ́н, до вырикирибэ́н, яв ковло́ илы́тко. ¹² Ма́рпэ патябна́са дэ сари́ зо́р, ри́кирпэ па́л ве́чно джиипэ́н, кэ саво́ ту прикхардо́ и сы́р ту откэрдя́н и сыкадя́н патябэ́н анґи́л бутэ́ндэ манушэ́ндэ. ¹³ Припхэна́в ту́кэ анґи́л Дэвлэ́стэ, Саво́ дэ́л сарэ́скэ джиипэ́н, и анґи́л Иисусо́стэ Христо́стэ, Саво́ роспэнэ́лас чячибэ́н пэ сэ́ндо анґи́л Понтиемо́стэ Пилато́стэ. ¹⁴ Тэˍзракхэ́с адава́ ла́в до жужыпэ́н би доша́киро, кэ одова́ дэвэ́с сы́р явэ́ла Ра́й амаро́ Иису́со Христо́со, ¹⁵ саво́ дэ пэ́скиро дэвэ́с сыкавэ́ла амаро́ бахтало́ Хула́й Ёв е́кх, зорало́ Ца́рё пэ сарэ́ндэ царе́ндэ и Ра́й рае́ндыр, ¹⁶ Ёв е́кх, Саво́ наˍмэрэ́л, Дживэ́л до свэ́то, саво́ ни ко́н наˍдорэсэ́ла Савэ́с манушэ́ндыр нико́н наˍдыкхья́, Лэ́скэ бари́ паты́в и бари́ зо́р, ами́нь! ¹⁷ Барвалэ́нґэ дэ адава́ свэ́то припхэ́н тэˍна́ˍпхутён пэ́скирэ ґодя́са и тэˍна́ˍпатян барвалыпна́скэ саво́ дадэвэ́с исы́н, а тася́ нанэ́, а Дэвлэ́скэ, Саво́ дэ́л амэ́нґэ саро́ бу́т ва́ш амаро́ джиипэ́н, ¹⁸ со́б тэˍкэра́с лачипэ́н, тэˍбарвалёва́с до лаче́ ры́нды, тэˍподрикира́с конэ́скэ пхаро́, тэˍракира́с манушэ́нса, ¹⁹ тэˍскэда́с пэ́скэ барвалыпэ́н лаче́ рындэ́нса, со́б дурэды́р тэˍрикира́спэ па́л ве́чно джиипэ́н. ²⁰ Тимафе́ё, ракх со ту́кэ дыя́ Иису́со, отрисё́в и на́ˍшун со ракирэ́н мануша́, савэ́ дэ хохано́ сыклярибэ́н и патябэ́н, ²¹ савэ́ джя́нас пи́р адава́ дро́м и отґинэ́ патябна́стыр. Лачипэ́н тумэ́нса!