¹ а Свэ́нто Ду́хо ракирэ́л, со явэ́на да́савэ дэвэса́ со ко́йˉсавэ́ мануша́ отжя́на патябна́стыр, па́л одова́ со лэ́на тэˍдыкхэ́н пэ хохаибны́тка ду́хи и пэ сыклярибэ́н бэнґы́тко, ² дуемуи́тка хоханэ́, савэ́ндэ схачия́ ладжь и паты́в, ³ адалэ́ мануша́ запхэнэ́н, тэˍвыджя́н палэро́м, тэˍлэ́н ромне́н, тэˍха́н хабэ́н, саво́ Дэвэ́л дыя́, со́б патянкунэ́ савэ́ уджиндэ́ чячибэ́н, тэˍха́н и тэˍпхэнэ́н наи́с. ⁴ Па́л одова́ со саро́ хабэ́н саво́ дыя́ Дэвэ́л исы́н лачё́, сы́р прила́с и пхэна́с Лэ́скэ наи́с. ⁵ Па́л одова́ со саро́ жужакирэ́лпэ Дэвлэ́скирэ лавэ́са и манґипна́са. ⁶ Сы́р сыклякирэ́са адалэ́скэ пшалэ́н, авэ́са лачё́ раша́й Иисусо́скэ Христо́скэ, до ла́в и патябэ́н и лачё́ сыклярибэ́н пи́р саво́ ту джяс. ⁷ На́ˍприлэ ко́н роспхэнэ́л на́ˍлаче пхури́тка парами́цы, нэ хвэды́р дэ сари́ зо́р сыклё́в тэˍпхира́с анґи́л Дэвлэ́стэ. ⁸ Па́л одова́ со ко́н дыкхэ́л па́л пэ́скирэ трупо́скирэ маса́, адалэ́стыр нанэ́ бу́т лачипэ́н, а ко́н пхирэ́л дэ да́р анґи́л Дэвлэ́стэ адава́ дрыва́н ку́ч, ва́ж джиипэ́н адава́ и саво́ авэ́ла анґи́л. ⁹ Ла́в адава́ исы́н чячюно́ и молэ́л лэ́с тэˍприлэ́н. ¹⁰ Ва́ш адава́ амэ́ кэра́с буты́ дэ сари́ зо́р и вырикира́с сы́р амэ́н кошэ́н, со патя́с дэ джидэ́ Дэвлэ́стэ, Саво́ Зракхэ́л сарэ́н манушэ́н, а буты́р сарэ́стыр ко́н патя́л дэ Лэ́стэ. ¹¹ Роспхэ́н и сыкля́кир адава́. ¹² Мэ́к нико́н на́ˍчюрдэлпэ тырэ́ тэрнэпна́са, нэ сыка́в сы́р трэ́би тэˍлыджя́с пэ́с машки́р патянкунэ́ндэ до ла́в, машки́р манушэ́ндэ, до камлыпэ́н, до патябэ́н, до жужыпэ́н. ¹³ Сы́р ява́ва, кэ адава́ ґи́н ла́в, подри́кир, и сыкля́кир манушэ́н. ¹⁴ На́ˍрозчюрдэпэ даро́са саво́ ту́кэ дыно́ дэ проро́често рашае́нса, савэ́ манґэ́наспэ па́л ту́тэ и чивэ́нас пэ ту́тэ васта́. ¹⁵ Па́л адава́ ду́минэ, дэ адава́ джив, со́б сарэ́ тэˍдыкхэ́н тыри́ духо́вно буты́. ¹⁶ Дыкх пэ пэ́стэ и пэ сыклярибэ́н, зоралэ́с ри́кирпэ па́л адава́ сы́р лэ́са адава́ тэˍкэрэ́с то зракхэ́са пэ́с, и одолэ́н ко́н лэ́ла тэˍшунэ́л ту́т.