¹ Адалэ́ лава́ чячюнэ́: ко́н тэрдэ́лпэ тэˍавэ́л раша́са, одова́ камэ́л тэˍкэрэ́л лачё́ ры́ндо. ² Раша́й трэ́би тэˍавэ́л би доша́киро. Ёв ро́м екхэ́ ромня́кэ, ґодяви́р дэ саро́ хула́й, прилэ́л манушэ́н илэ́са, джинэ́л сы́р тэˍсыклякирэ́л, ³ нанэ́ матима́рё, джинэ́л тэˍрикирэ́л пэ́с до васта́, нанэ́ захало́, ило́ саво́ наˍпасё́л ко ловэ́, ⁴ лачё́ хула́й дэ пэ́скиро кхэ́р, чяворэ́ кандэ́н лэ́с екхэ́стыр лавэ́стыр, ⁵ а сы́р ко́н наˍджинэ́л сы́р тэˍлыджя́л пэ́скиро кхэ́р, сы́р ёв авэ́ла тэˍдыкхэ́л па́л Дэвлэ́скири кханґири́. ⁶ Раша́й трэ́би тэˍавэ́л нанэ́ одолэ́ндыр ко́н наґа́ра патя́ндыя дэ Дэвлэ́стэ, со́б пхуткирдыпна́стыр тэˍна́ˍпэрэл до сэ́ндо бэнґэ́стыр. ⁷ Трэ́би па́л лэ́стэ тэˍавэ́л лачё́ ла́в манушэ́ндыр, а нанэ́ дылыно́ па́л саво́ ухтылэ́ла лэ́с бэ́нґ. ⁸ Адя́кэж и дья́коны – тэˍавэ́н ґодяви́р, тэˍна́ˍхохавэн тэˍна́ˍприпасёл ило́ ко ви́но и ко ловэ́, ⁹ лэ́нґэ откэрдо́ патябэ́н дэ жужы́ паты́в. ¹⁰ И мэ́к ёнэ́ сыкавэ́на пэ́с до вырикирибэ́н, тэ́нче сы́р нико́н наˍпопэрэ́ла дэ лэ́ндэ до́ш, мэ́к домэкэ́н лэ́н кэ Дэвлэ́скири буты́. ¹¹ И адя́кэж и джювля́ – мэ́к лыджя́н пэ́с ґодяви́р, тэˍна́ˍхохавэн пэ манушэ́ндэ, чячюнэ́ тэˍавэ́н дэ саро́. ¹² Дья́коно мэ́к авэ́ла ромэ́са екхэ́ ромня́кэ, хула́са дэ пэ́скиро кхэ́р пэ́скирэ чяворэ́нґэ. ¹³ Па́л да́савэстэ хула́стэ джял лачи́ ма́вла и ёв зоралэ́с патя́л дэ Иисусо́стэ Христо́стэ. ¹⁴ Чина́в ту́кэ адава́ лы́л, нэ думина́в сы́ґо тэˍява́в кэту́. ¹⁵ Сы́р зарикира́вапэ, со́б ту тэˍджинэ́с, сы́р трэ́би тэˍлыджя́ пэ́с дэ Дэвлэ́скиро кхэ́р, саво́ исы́н Кханґири́ джидэ́ Дэвлэ́скири, сави́ тэрды́ зоралэ́с по чячибэ́н. ¹⁶ Баро́ чячибэ́н откэрдо́ манушэ́нґэ, тэˍґина́с лэ́с: Со Одова́ ко́н явья́ сы́р ману́ш, исы́с допхэндо́ Духо́са, со Ёв Христо́со, сыкадя́ Пэ́с анґолэ́нґэ, роспхэндо́ исы́с манушэ́нґэ, савэ́ндыр бу́т патя́ндынэ дэ Лэ́стэ, Ёв исы́с ґадэмо́ дэ сла́ва.