¹ Пэ пуранэ манушэстэ нагадэ глос, нэ ракир лэса сыр дадэса, тэрнэ чявэнса - сыр пшалэнса, ² пуранэ джювленса сыр даенса, тэрнэ чяенса -- сыр пхэненса саро жужэ илэса, ³ Джювленса савэндэ мэя ром, обджяпэ патываса. ⁴ Сыр кэ сави джювлы сын чявэ чи внуки, то мэк ёнэ сыклён тэ дыкхэн пал пэскирэ сэмьи и мек дыкхэн пал пэскирэ дадэндэ, пал дава, со ада куч дэ Дэвлэскирэ якха. ⁵ Сыр манушны чачес ачяпэ кокори би ромэско, ёй отдэлпэ и патял Дэвлэскэ и на пирьячел тэ мангэл и тэ мангэлпэ Лэскэ, дэвэс и рат. ⁶ А сави дживэл сыр лакэ камэлпэ, гин со ёй мэя, джидяса. ⁷ Припхэн адава, соб пэ лэндэ тэ авэл на лачё лав. ⁸ Сыр кон пал пэскирэндэ и пал семьи на дыкхэл, дова отпхэндяпэ патябнастыр и нанэ хвэдыр долэстыр кон на патял.. ⁹ Мэк зачинэн до лыл одола джювля сави ачьяпэ би ромэско сыр лакэ авэла шовдэша бэрш и бутыр, и латэ сыс екх ром, ¹⁰ ёй приджинды дэ лачэ рынды, выбарьякирдя чяворэн, прылэлас кэпэ до кхэр манушэн, подэлас паны тэ морэн гэра свэнта мануша, подэлас васт конэскэ сыс пхаро, сыр кэрэлас бут лачэ рынды. ¹¹ А тэрнэн джювлен савэндэ мэя ром оджя лэндыр. Пал дова со ёнэ на кандэн Дэвлэс и камэн тэ джян палором, ¹² далэса попэрэн дэ сэндякирибэн, пал дова со на ачнэпэ чячунэ екхэ ромэскэ. ¹³ Кэ дова ёнэ сыклён ивья тэ пхирэн кхэрэстыр до кхэр, бут ракирэн со на трэби. ¹⁴ Пал дава, мэ камам, соб тэрнэ джювля савэ ачнэпэ би ромэскиро, тэ выджян палором, тэ биянэн чяворэн, тэ авэн хуланенса до кхэр, тэ наавэл пэ лэндэ налачо ракирибэн. ¹⁵ Пал дава со исын дасавэ савэ порисинэ пэ дром бэнгэско. ¹⁶ Сыр кэ патянкуны джювлы , исын джювлы савятэ мэя ром, мэк ла подркирэл, соб кхангирькэ тэ авэл локхэдыр, и тэ дыкхэн пал долэндэ джювлендэ савэндэ никонэс нанэ. ¹⁷ Рашая, савэ куч лыджян рынды , савэ исын до лав и сыклярибэн мэк авэна дэ бари патыв. ¹⁸ Пал дава со до Лав чиндо" Назакэр муй гурувэскэ," и Молэл бутярно пэскирэ ловэ". ¹⁹ На прылэ пэ рашаестэ бангибэн, сыр на авэна дуй чи трин мануша тэ допхэнэн дава . ²⁰ Кон кэрэл бэзэх, роспхэн паш сарэндэ, соб и авирта тэ дарэн тэ кэрэн бэзэх. ²¹ Солахав ангил Дэвлэстэ и Исусостэ Христостэ и анголэндэ савэн выкэдыя Дэвэл тэ зракхэс и тэ напарувэс дава, и нисо тэ на кэрэс би камлыпнаско. ²² Напраста тэ чивэс васта ни пэконэстэ и на яв дэ екх безэх авирэнса манушэнса, ракх пэс до жужипэн. ²³ Бутыр напи екх паны, нэ пи и набутка вино сыр драб ваш тыро жэлутко и ваш тыро насвалыпэн. ²⁴ Исын бэзэха манушэнгирэ савэ душлэ, и ёнэ джян англ лэндэ по сэндо, а исын савэ джян пал лэндэ. ²⁵ Дякэш и лаче рынды сын савэ душлэ, а сын савэ нанэ душлэ пал савэ галёна тэнчэ сарэ мануша.