¹ Сарэ бутярнэ, савэ дживэн до пхарипэн, мэк полэн пэскирэн хулаен сарьяса патываса, соб пэ Дэвлэскиро лав и сыклярбэн тэ напхэнэн дылныпэн. ² Бутярнэ конэстэ хулая патянкунэ, мэк отлыджянпэ патываса, пал дова со ёнэ пшала, не мэк бутыр кэрэн буты хулаенгэ, пал дава со ёнэ -- патянкунэ савэн камэл Дэвэл, савэ кэрэн лачипэн. Сыклякир кэ дава и прыкхар. ³ Сыр кон сыклякирэл авирэскэ и на приджинэл чячунэ лава амарэ Раескирэ Иисусоскирэ Христоскирэ и сыклярибэн саво лыджял тэ полэн Дэвлэс, ⁴ дова мануш пхуткирдо и нисо на полэл, нэ родэл сыр тэ захапэ манушэса ни палсо, камэл нанэ пэскиро, кэрэл манушэнгэ холы, кошэлпэ, на патял манушэнгэ, ⁵ захалпэ манушэнца савэндэ нанэ годы, и хаскирдэ чячибэн, гинэн, со тэ полэ Дэвлэс- ада сын закирибэн. ⁶ бари бахт тэ пхирэ ангил Дэвлэстэ и тэ авэ лошалэса. ⁷ Пал дава со амэ нисо на яндям дэ дава свэто, сыр и ничи на вылыджяса лэстыр. ⁸ Исын со тэ хас и со тэ вряс, яв лошало далэса. ⁹ Мануша савэ камэн тэ барвалён ёнэ пэрэн до искушэение и вхтылэнпэ, и бут дылоно и на лачё дова со ёнэ камэн хаскирэл лэнгиро джиипэн. ¹⁰ Пал дова со сари бибахт --- пал камлыпэн ко ловэ, Пир дава дром, бут кон отгия патябнастыр и кокорэ пэскэ домэкнэ пхарипэн до джиипэн. ¹¹ Нэ ту, Дэвлэскиро мануш, накэр дякэ. Нэ родэ чячибэн, сыр тэ полэс Дэвлэс, яв до патябэн, до камлыпэн, до вырикирибэн, яв ковло илытко . ¹² Марпэ патябнаса дэ сари зор, рикирпэ пал вэчно джиипэн, кэ саво ту прыкхардо и сыкадян патябэн ангил бутэндэ манушэндэ. ¹³ Припхэнав тукэ ангил Дэвлэстэ, Саво дэл сарэскэ джиипэн, и Иисусустэ Христостэ, Саво роспэнэлас чячибэн пэ сэндо ангил Понтиемостэ Пилатостэ. ¹⁴ Тэ ракхэс дава лав до жужипэн би дошакиро, кэ дова дэвэс сыр явэла Рай амаро Иисусо Христосо, ¹⁵ саво дэ пэскиро дэвэс амаро бахтало Хулай саво сын екх саво Припхэнэл , Царё пэ сарэндэ царендэ и Рай раендыр, ¹⁶ Ёв екх Дасава саво на мэрэла, Дживэл дэ дасаво свэто со ни кон на дорэсэла Савэс манушэндыр никон на дыкхья, Лэскэ бари патыв и бари зор, аминь! ¹⁷ Барвалэнгэ дэ дава свэто припхэн тэ напхутён пэскирэ годяса и тэ на патян барвалыпнаскэ саво дадывэс сын а тася нанэ, а Дэвлскэ, саво дэл амангэ саро бут ваш аморо джиипэн, ¹⁸ соб тэ кэрас лачипэн, тэ барвалёвас до лачэ рынды, тэ подрикирас конэско пхаро, тэ ракирас манушэнса, ¹⁹ скэдас пэскэ барвалыпэн лаче рындэнса, соб дурэдыр тэ рикираспэ пал вечно джиипэн. ²⁰ Тимафеё, ракх со тукэ дыя Иисусо , отрисёв и нашун со ракирэн мануша савэ дэ хохано сыклярибэн и патябэн, ²¹ савэ джян пир дава дром отгинэ патябнастыр. Лачипэн тумэнса!